प्रेरित 12

पतरसा री जेला कअ मुक्ति

1तेऊ वक्ते हेरोदेस राजे कलीसिया रे बहू मणश सताऊँणे लाई। 2तेऊ यूहन्ना रअ भाई याकूब तलबारे संघे मारू। 3जेबा तेऊ हेरू की यहूदी लोका एताका खुश हुंदा, तेबा तेऊ पतरस भी ढाकू। त्याह धयाडी अखमीरी रोटी रे ध्याड़े थी। 4तेऊ सह ढाहकी करे जेला में ठोकू, होर चऊ-चऊ सिपाही री पहरे में डाहू; एऊ न्याय की फसह बाद सह लोका सेटा आंणनअ। 5जेला में पतरसा री देख भाल हुंदा थी, पर कलीसिया में लोका लगातार करे मन लाई तेऊरी तणी परमेश्वरा का प्रार्थना करदे लागेदे थी।

6जेबा हेरोदेसे सह लोका सेटा लाऊ आंणनअ, तेसी राची पतरस दुई शांगली में बानहूदअ होर दुई सिपाही बीचे सूतअदअ थी; होर चौकीदार दुआर सेटा जेला री रखबाली करदअ लागदअ थी। 7तेबा हेरा परमेश्वरा रअ एक स्वर्गदूत तखे खडअ होऊ होर तेसा कोठरी में प्रयाषा चमकू होर तेऊ पतरसा री टांगा बाही करे भजयाऊ होर बोलू, उठ छेको कर। होर तेऊरे हाथा का शांगली खुली होर नेहटे पड़ी। 8तेबा स्वर्गदूते तेऊबै बोलू, कमर कश सुटा बूटा बानह। तेऊ तेडहा ही करू तेबा तेऊये तेऊबै बोलू, आपणे झिकड़े बानह होर माहा पीछे हाँड। 9सह निकद होर तेऊ पीछे हांडदअ लागअ; पर यह नांई जाणदअ, की जोह कुछ स्वर्गदूत करदअ लागअदअ सह सच सा, तेऊ जाणू की हाँऊ दर्शन भालदअ लागदअ। 10तेबा त्याह पहिले होर दूजे पहरे का निखली करे तेऊ लोहे रे गेटा सेटा पूजे जोह नगरा फेरा बे साहा। सह त्याह वे आपणे आप खुलू होर त्याह निखली करे एकी गली बे नाठे होर तेभरी स्वर्गदूत तेऊ छाडी करे नाठअ। 11तेबा पतरस सचेत होई करे बोलू, एबा मांई जांणू कि परमेश्वरे आपणें स्वर्गदूत भेजी करे हाँऊ हेरोदेसा रे हाथा का छुड़ाऊ, होर यहूदी री सारी आशा चोडी।

12यह जाणी करे सह यूहन्ना री आमा मरियमा रे घरा बे आऊअ जोह मरकुस कहलाऊँदा। तखे बहू लोका कठे होई करे प्रार्थना करदे लागदे थी। 13जेबा पतरस डेहली रअ दुआर टोकू, तेबा रुदे ना री एक दासी हेरदी आई। 14पतरसा रा शब्द शूणी तेसे खुशी में डेहली रअ दुआर नांई खोलू, पर ठुरी करे भितरा बे नाठी होर खोजू की पतरस बागे दुआरा सेटा खडअ साहा। 15त्याहे तेसा बे बोलू, तूह पागल साहा। पर सह बुशाह संघे बोली की एडा ही साहा। तेबा त्याहे बोलू, तेऊरअ स्वर्गदूत हूंणअ। 16पर पतरस दुआरा टोकतअ रहू; तेबा त्याहे ताकी खोली होर तेऊ हेरी करे हैरान होई। 17तेबा तेऊ त्याहबे इशारे संघे बोलू चुप रहा; होर त्याह बे खोजू की परमेश्वरा कासु रीति संघे सह जेला का काह्डी आणू। तेबा तेऊ बोलू, याकूब होर भाई बे ऐसा गला खोजे। तेबा निखली करे दूजी जागह बे नाठअ। 18दोती सिपाही में हलचल मची कि पतरसा रा कैह होऊ।

हरोदसा री मृत्यु

19जेबा हेरोदेस तेऊरी खोज करी होर नांई पाऊ; तेबा पहरेदार जाँच करी दोषी होर आज्ञा दीनी त्याह मारी पाए; होर सह यहूदिया छाडी कैसरिया में रंहदअ लागअ। 20हेरोदेस सोर होर सीदोन होर सैदा रे लोका का खुश नांई आंहदअ थी, तेबा त्याह एक चित होई करे तेऊरे कमरे बे आए, होर बलास्तुसा बे जोह राज रअ एक कर्मचारी थी, समझाई करे मेल करणा चाहू; किबेकी राज रे देशा कअ तेऊ देशा रा पालन पोषण हूंदा थी। 21न्याय रे ठहराईदे धयाडे मे हेरोदेस राजे झिकड़े बानही सिंहासना पैंदे बेठअ होर त्याहरे व्याख्याना करदअ लागअ। 22तेबा लोके पुकारू, यह तअ मणशा रा नांई पर ईश्बरा रअ शब्द साहा। 23तेऊ वक्ते परमेश्वर रे एकी स्वर्गदूते सह तेभरी मारु, किबेकी तेऊ परमेश्वरा री महिमा नांई करी; होर तेउ मे चींऊ पड़ी होर सह मूअ। 24पर परमेश्वर रा बचन बढ़दा होर फैलदा रहू। 25जेबा बरनबास होर शाऊल आपणी सेवा पूरी करी छेकी तेबा यूहन्ना बे जोह मरकुस कहलांऊदा संघे नी करे यरूशलेमा बे नाठे।

Currently Selected:

प्रेरित 12: ISJNT

Highlight

Copy

Compare