2 कुरिन्थियों 5
5
महारअ स्वर्गा रअ घर
1किबेकि हामे जाणा कि जेबा महारा धरती पेन्धला डेरा सरीखा घर ढोल़णअं, तेबा हामा परमेश्वर री तरफा का स्वर्गा में एक एढअ घर बेटणअं जोह हाथे संघे बणु दअ घर नांई, पर आपणे आप अनन्त बे बणू दअ आसा। 2एता पेन्दे तअ हामे कराहंदा होर लालसा डाहंदा कि आपणे स्वर्गीय घरा बान्हे। 3कि एतके बानणे संघे हामें नेगे नांई होए।
4होर हामे एसा डेरे में रहंदे वकते बोझा का दबी करे कराहंदे रहंदा, किबेकि हामा उतारना नांई पर बानणा चाहंदा, कि जोह मरणहार साहा जीबना में डूबण। 5जूणी हामे एसा गला री तणी त्यार करी दे साहा परमेश्वर साहा, जूणी हामा बे बयाना में आत्मा भी दिना दा भी साहा।
6पर हामें सदा ढाढ़स बान्हीं रहंदा होर यह जाणा कि जेबरे तणी हामे देहा में रहंदा, तेबरे तणी परमेश्वर का अलग साहा 7किबेकि हामे रूप हेरी करे नांई, पर बुशाह री रीति संघे चला 8एतकि तणी हामे ढाढ़स बान्हीं डाहंदा, होर देहा का अलग होई करे परमेश्वर संघे रहंणा होर भी उत्तम समझा।
9एसा बजा का माहरे मना री खुशी यह साहा कि चाहे तमे संघे रहे या नांई रहे, पर हामे तेऊ याद करदे रहे। 10किबेकि जरूरी साहा कि हामा सभी रा हाल मसीहा रे न्याय आसना रे सामने खुले, कि हर एक मणश आपणे-आपणे भले बुरे कामा रा बदल़ा जोह तेऊ देहा रे साबे करी पाए।
परमेश्वरा संघे मेल मिलाप
11एतकि तणी परमेश्वरा री डर मनीकरे हामे लोका समझा; पर परमेश्वरा पेन्दे महारा हाल प्रकट साहा, होर मेरी आशा साहा कि थारे बिबेका में भी प्रकट होऊ होला। 12हामे तेबा भी आपणी बड़ाई तमा सामने नांई करदे, पर हामे आपणे बारे में तमाबे घमण्डा करने रा मोका दिंदा कि तूह त्याहबे उतर देई सके, जोह मना में नांई पर दिखाबटी गला में घमण्ड करा। 13अगर हामे बसुध साहा तेबा परमेश्वरा री तणी, होर समझ साहा तेबा थारी तणी साहा। 14किबेकी मसीहा रा प्रेम हामा बे मजबूर करा; एतकि तणी कि हामे यह बिचार करा कि जेवा एक सभी री तणी मुँअं तेबा सभे मुंऐं। 15होर सह एसा निमित्त सभी री तणी मुअं कि जोह जिऊंदअ साहा, त्या जेहा बे आपणी तणी नांई जिए पर तेऊरी तणी जोह त्याहरी तणी मुँअं होर भी जिऊंदअ भी होऊ।
मसीहा में नऊंई सृष्टि
16पर एबरा का हामा कोह भी शरीरा रे साबे नांई समझण। पर हामा भी मसीहा भी शरीरा रे साबे ज़ाणु, तेबा भी एबरा का सह एढअ नांई ज़ाणनअं। 17एतकि तणी जोह मसीहा में साहा तेबा त्या नऊंई सृष्टि साहा, पुराणी गला बीती दी साहा; हेरा, सभे गला नऊंईं होई। 18या सभे गला परमेश्वर री तरफा का साहा, जूणी मसीहा रे साबे आपु संघे महारा मेल मिलाप करू, होर मेल मिलापा री सेवा हामा बे दिंनी। 19मतलब परमेश्वर मसीहा में होई करे आपु संघे संसारा रा मेल मिलाप करू, होर त्याहरे अपराधा रा दोष त्या पेन्दे नांई लाऊ, होर तेऊ मेल मिलापा रा बचन हामा बे दिंना। 20एतकि तणी, हामे मसीहा रे राजदूत साहा; मना परमेश्वर महारे साबे बिनती करदअ लागअ। हामे मसीहा री तरफा का निबेदन करा की परमेश्वरे संघे मेल मिलाप करा। 21जोह पापा का अनजान थी, सह तेऊ हामा बे पाप लाऊ कि हामे तेता में होई करे परमेश्वरा री धार्मिकता बणे।
Currently Selected:
2 कुरिन्थियों 5: ISJNT
Highlight
Copy
Compare
Share
Want to have your highlights saved across all your devices? Sign up or sign in
Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.
