2 कुरिन्थियों 2

1मांई आपणे मने यह बिचार करू कि भी तमा सेटा नराझ होई करे नांई इछु। 2किबेकि अगर हाऊं तमा नराझ करे, तेबा महा खुशी कर्ण आल़अ कुण हूँणअं, पर सह जूण मांई नराझ करू? 3होर मांई याह गला तमाबे एतकि तणी लिखी कि एडा नांई होए कि मेरे ईहंण पेन्दे, जासु का महा खुशी रा सुसमाचार भेटा लोडी हाऊं त्याह ही का नराझ होऊ; किबेकी महा तमा सभी पेन्दे ऐसा गला रा बुशाह साहा कि जोह मेरी खुशी साहा, सह तमा सभी री भी साहा। 4बडे क्लेश होर मना रे कष्टा का, मांई बखे आर्शु वहाई-वहाई करे तमा बे लिखूदा थी, एतकि तणी नांई कि तमे नराझ हो पर एतकि तणी कि तमे तेऊ बडे प्रेमा जाणा, जोह महा तमा का साहा।

दोषी बे माफी

5अगर तमे कुंणी नराझ करी दे साहा, तेबा महाही नांई पर (कि तेऊ संघे बखे कड़ाई नांई करूँ) कुछ-कुछ तमे सभे भी नराझ करी दे। 6एडे मणशा बे यह दण्ड जोह भाई मेंज़ा का बहू कै दिंना, बहू साहा। 7एतकि तणी एताकअ भला यह साहा कि तेऊरा अपराध क्षमा करा होर शांति देया, नांई हो कि ऐढअ मणश बहू नराज़गी में डूबणे। 8एउ कारण हाऊं तमा का बिनती करा कि तेऊबे आपणे प्रेमा रा प्रमाण देआ। 9किवकि मांई एतकि तणी भी लिखू दा थी कि तमा परेखी लऊ कि तमे मरी सभी गला मनणे बे तयार साहा कि नांई। 10ज़ासका तमे कुछ क्षमा करा थी तेता में हाऊं भी माफ करदा, किबेकि मांई जोह कुछ भी माफ करूदा, अगर करूदा हो, तेबा थारी बजा का मसीहा री जागहा में होई करे माफ करू 11कि शैताना रा हामा पेन्दे बश नांई चले, किबेकि हामे तेऊरी चाला का अनजान नांई।

त्रोआसा में पौलुसा री परेशानी

12जेबा हाऊं मसीहा रा सुसमाचार शुणाउंणे बे त्रोआस आउअ, होर परमेश्वरे मेरी तणी एक दुआर खोलू, 13तेबा मेरे मन चैन नांई आउआ, एतकि तणी कि मेरे भाई तीतुस नांई पाऊ; एतकि तणी त्याह का बिदा होई करे हाऊं मकिदुनिया बे नाठअ।

मसीहा में बिजय उत्सब

14पर परमेश्वर रा धन्यवाद हो जोह मसीहा में सदा हामा जय रे उत्सबा में फिरा, होर आपणे ज्ञाना री बास माहरे सब हर जागहा फलाउंदा। 15किबेकि हामे परमेश्वरा रे नेड उद्धार पाउंण आले होर नाश हूँण आले दुही बे मसीहा री सुगन्ध साहा। 16कासु बे तअ मरने रे बारे मे मृत्यु री गन्ध थी कासु बे तअ मरने रे बारे मे निमित मउती री गन्ध, होर केथरे बे जीबना रे निमित जीबना री सुगन्ध। भला याह गला रे लायक कुण साहा? 17किबेकि हामे त्याह बहू रे बराबर नांई जोह परमेश्वरा रे बचना में मिलाबट करा; पर मना में सचाई का होर परमेश्वरा री तरफा का परमेश्वरे हाज़र जाणी करे मसीहा में बोला।

Currently Selected:

2 कुरिन्थियों 2: ISJNT

Highlight

Copy

Compare