1 कुरिन्थियों 7
7
ब्याहा रे बारे में प्रश्न
1त्याह गला रे बारे में जोह तमे मेरे बारे में लिखुदा, यह राम्ब्डा साहा, की मर्द वेटडी ना छुए 2पर ब्यभिचारा पापा री डरा का सभी मर्दा रे आपणी बेटड़ी लोड़ी होई होर सभी बेटड़ी रे आपणे मर्द लोडी होई।
3मर्द आपणी बेटड़ी रा हक पूरा करे, होर तेहडा ही बेटड़ी भी मर्दा रा हक पुरा करे। 4बेटड़ी वै आपणी देहा में अधिकार नांई आन्धा पर मर्दा रा अधिकार साहा, तेहडा मर्दा रा भी आपणी देहा रा अधिकार नांई आन्धा पर बेटड़ी पेन्दे अधिकार साहा।
5तमे एकी दूजे का अलग नांई होए, की थोडे वक्ता तणी आपु में सहमत्ती करी करे थोडे वक्ता प्रार्थना करी करे आपु में मिली करे अधिकारा री एडा ना होए की शैतान तमा परीक्षा में पाए। 6पर हाऊं जोह बोला सह अनुमती साहा ना की आज्ञा साहा। 7हाऊं एडा चहान्दा की जेड़अ हाऊं साहा की तेहडे सावै लोका होए, पर सभी परमेश्वरा री तरफा कअ खासे वरदान भेटे, कासु होरी तरहा पर कासु होरी तरहा रा।
8पर हाऊं जासु ब्यहा नांई आंदा करूदा होर बिधबा रे बारे में यह बोला की त्याहा वै महा जेह रहणा ठीक साहा। 9पर अगर त्याह एड़ी नांई रही सकदी, तेबा त्याह ब्यहा करी सका किबेकि ब्यहा करना कामातुरा का ठीक साहा।
10जासु ब्यहा करुदा साहा त्याहा वै हाऊं नांई बोला की परमेश्वर री आज्ञा साहा की आपणी बेटड़ी होर मर्दा कअ अलग नांई होए। 11अगर अलग भी होए तेबा बिना ब्यहा करी रहे या आपणे मर्दा संघे भिआका मेल ठीक होए होर ना मर्द आपणी बेटड़ी छाडे।
12दूजे कि परमेश्वर नांई पर हाऊं तमावै बोला की, अगर कासु भाई री बेटड़ी बिशवास नांई ड़ाहे होर तेऊ संघे रहण वै खुश सहा, तेबा सह तेसा नांई छाडे। 13होर जासु बेटड़ी रे मर्द जोह बिश्बासी नांई डाहनदे, सह बेटड़ी संघे रहणे में खुश साहा सह आपणे मर्दा नांई छाडे। 14किबेकि एड़अ भाई जोह बिश्बास नांई डाहनद, सह बेटड़ी संघे पवित्र हुणअ। होर एडी बेटड़ी जोह विशवास नांई डाहदी सह मर्दे संघा पवित्र हुंदा; नांही थारे बाल बच्चे अशुद्ध हुणे, पर एबा तो पवित्र साहा।
15पर जोह मर्द बिश्बास नांई ढाहले, अगर सह अलग हुणा चाहन्दा तेबा तेऊ अलग हुणे दे एडी दशा में कोहे भाई बहीण बन्धना में नांई हुणे पर परमेश्वरा तअ हामे मेल मिलापा वै होर शांति री तणी भेजी दे साहा। 16किबेकि हे स्त्री तूह कैह जाणा, कैह तूह आपणे पति रा उद्धार करी सका? होर हे मर्दा तूह कैह जाणा की तूह आपणी बेटड़ी रा उद्धार करी सका?
परमेश्वरा रे शादणे रे साबे च़ला
17पर जेहड़ परमेश्वरे हर एकी वै दीना दा साहा होर तेहडा ही परमेश्वरे हर एक शादी दे साहा त्याह तेहडे ही रीति त्या चले होर हाऊं सभी कलीसिया में एडा ठहराउनदा। 18जोह खतना करी करे शादू दअ साहा सह खतना रहित ना रहू जोह खतना रहित शादू दअ साहा सह खतना रहित नांई करे। 19ना खतना कुछ साहा होर ना खतना रहित पर परमेश्वरा री आज्ञा मनना ही सवै सा साहा।
20हर एक मणश जोह जासु देशा में शादू दअ साहा सह तेडअ रहे। 21अगर तूह नोकरा री दशा में शादू दअ साहा तेबा चिंता नांई करे पर अगर तूह स्वतंत्र होई सका तेबा तेहडा ही काम करे। 22किबेकि जोह नोकरा री दशा में शादू दअ साहा सह प्रभु रे स्वतंत्र करूद साहा होर जोह स्वतंत्र दशा में शादू दअ साहा सह मसीहा रअ नोकर साहा। 23तमे दाम देई करे लईदे साहा तेबा मणश रे नोकर नांई बणा। 24हे भाईयो जोह जासु दशा में शादू दअ साहा सह तेसी दशा में परमेश्वरे संघे रहे।
ब्याह रे बारे मे प्रश्नन उतर
25कुवारियो रे बारे में प्रभु री किछे भी आज्ञा नांई दीनी पर बुशाह लायक करने री तणी जोह दया प्रभु महा पेन्दे करी दी साहा तेथी रे साबे हाऊं तमा वै सम्मति दिंदा। 26तेबा मेरी समझा में यह शोभला साहा, कि आजकल जोह मणश कलेशा री बजा का जेहड़ साहा सह तेडअ रहे। 27अगर तेरी बेटड़ी साहा तेबा तूह तेसका अलग हुणे री कोशिश ना करे, अगर तेरी लाड़ी नांई आनधी तेबा लाड़ी नांई लोडे। 28पर अगर तुह ब्याह भी करे, तेबा पाप नांही पर अगर कुआरी ब्याह तेबा कोई पाप नांही पर एडा शरीरा में दुःख हुणे। होर हाऊं बचाउणा चाहदा। 29हे मेरे भाईयो हाऊं तमावै यह बोला की वक्त कम होऊ तेबा लोडी की ज़ासरे लाडी आसा त्याह यह सोचे की त्याह रे लाडी नांई आंधी। 30होर लेरन आले एडे होआ, कि माना कि लेरदे नांई, होर खुशी करन आले एडा होए की मन खुश नांई होए। होर जोह सेठ साहा त्याह एडा सोचे की हामा जेह किछे नांई आन्धा। 31होर एऊ संसार संघे व्यबहार करन आले यह सोचे की एऊ संसारा रे नांई होए, किबेकि एऊ संसारा री रीति होर व्यबहार बदलदे रहंदा।
32तेबा हाऊं चाहन्दा कि, तमे चिंता ना करे, कुआरअ शोहरू प्रभु री गला में ज्यादा ध्याना में रहंदा कि प्रभु कैहडे सावै खुश डाहे। 33पर जासुये ब्याह करूदा होऊ, सह मणश संसारा री चिंता में रहंदा की, आपणी लाड़ी केहडे सावै खुश डाहणी, एती सोचतअ रहंदा। 34ब्याहा करूदा होर कुआरी मेंज भी भेद साहा, अविवाहिता प्रभु री चिंता में रहंदा की त्याह देह होर आत्मा दुही में पवित्र होए पर जासुये ब्याह करूदा होऊ, त्याह संसारा री चिंता में होर आपणें मर्द खुश करने में रहंदा। 35हाऊं याह गला थारे फायदे री तणी बोला, नाह की तमा पसाऊणे री तणी, तेबा जोह जेहड़ा सोचा तेऊवै तेहडा हुंदा, तेबा तमे एकमन होई करे प्रभु री सेवा में लागी रहे।
36अगर कोई यह समझे कि, हाऊं आपणी कुआरी रा हक मारदअ लागअ, ज़ासकी जुआनी ढलदी लागी, होर ज़ासकी मजबूरी भी होई, तेबा सह जेड़ा चाहे तेहडा करी सका, सह पाप नांई आनधा, होर तेसका ब्याह जरूर हुणे दे। 37पर जोह आपणे मन रा न्याय करा, होर तेत्की जरूरत नांई साहा, पर आपणी इच्छा पेन्दे अधिकार डाहंदा, होर आपणे मने यह ठानी दी साहा कि आपणी कुआरी शोहरी रे ब्याह नांई करणा, सह राम्ब्डे काम करदा। 38तेबा कुण आपणी कुआरी शोहरी रा व्याह करदा, सह ठीक करदा, होर जोह ब्याह नांई करदा त्याह होर भी ठीक करदा।
39जेबरे तणी कासु बेटड़ी रअ मर्द जिऊंदअ साहा, तेवरे तणी तेऊ मे बान्दी दी साहा; पर अगर तेसकअ मर्द मरे, तेबा सह जासु का चाहे ब्याह करी सका, पर सीघी प्रभु में। 40पर जेहड़ा साहा पर तेहडी ही रहे, तेबा मेरे विचारा में होर भी धन्य साहा; होर हाऊं समझदा कि परमेश्वरा रा आत्मा महा में भी साहा।
Currently Selected:
1 कुरिन्थियों 7: ISJNT
Highlight
Copy
Compare
Share
Want to have your highlights saved across all your devices? Sign up or sign in
Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.
