1 कुरिन्थियों 2

क्रुसा में मसीहा रे बारे में सन्देश

1हे भाईयो, जेबा हाऊं तमा सेटा परमेश्वरा रे भेदा शुणाउदअ आऊओ, तेबा शब्द होर ज्ञाना री गला संघे नांई आओ। 2किबेकि मांये यह बिचार करू, थारे बीच यीशु मसीहा जोह क्रुसा में चढ़ाऊ, मसीहा छाडी होर कासी गला नांई जाणू। 3हाऊ कमजोरी होर कमजोरी संघे कांमदे-कांमदे तमा संघे रहू। 4होर मेरे वचन होर प्रचारा में ज्ञाना री गला नांई, पर आत्मा होर सामर्थ्या रे प्रमाण थी। 5तेबा थारा बुशाह माणशा रे ज्ञाना पेन्दे नांई, पर परमेश्वरा रे सामर्थ्या में बिना डरा सघे होए।

परमेश्वरा रा ज्ञान

6तेऊकी भी हामे सिद्ध लोका में ज्ञान शुणाऊदा, पर एउ संसारा रे होर एऊ संसारा रे नाश हुणे आले हाकिम रा ज्ञान नांई। 7पर हाम परमेश्वर रा सह गुप्त ज्ञान, भेदा री रीति रे सावे खोजा, जासू परमेश्वरे संसारा का पहिले म्हारी महिमा वै ठहराऊ। 8होर जासुये एऊ संसारा रे हाकिमा में का कासी नांई जाणी, किबेकि अगर त्याह जांणदा तेबा त्याह महिमा आले परमेश्वरा क्रुसा पेन्दे नांई पाऊंदे। 9पर जेहड़ा लिखुदा साहा,

जोह गल्ला आंछी नांई हेरी होर कनेटे नांई शूणी,

होर जोह गला मणशा रे मना में नांई साहा,

त्याह ही साहा जोह परमेश्वरे आपणे प्रेमा डाहण आले वै तैयार करी दी साहा।

10पर परमेश्वर त्याह आपणी आत्मा संघा हामा पेन्दे प्रकट करी, किबेकि आत्मा सभी गला, होर परमेश्वर री गुप्त गला भी जांणदा। 11मणशा में का कुण कासरी गला जांणदा, सीधी मणशा री आत्मा जोह तेऊमें साहा तेहडी ही परमेश्वर री गला भी कूण जांणदा, सीधी तेऊरी आत्मा। 12पर हामे संसारा री आत्मा नांई पर सह आत्मा पाईदी साहा जोह परमेश्वर री तरफा का साहा कि हामे त्याह गला जाणा कि जोह परमेश्वरे हामा वै दीनी दी साहा। 13जासू हामे मणशा रे ज्ञान री सिखाईदी गला रे साबे नांई पर पवित्र आत्मा री सिखाईदी गला रे साबे आत्मा, आत्मिक, गला री ब्याख्या करा। 14पर शारीरिक मणशा परमेश्वर री आत्मा री गला नांई मनदे, किबेकी तेऊरी नजरा में या गला मुर्खता री गला साहा, होर नाह सह त्याह जांणी सकदअ, किबेकि त्याह री जाँच आत्मिक रीति सघे हूंदा। 15आत्मिक मणश सबे कुछ जांणदा, पर सह आपे ही कासी का जाँच नांई करदअ। 16किबेकी धर्मग्र्न्ता में बोलु दा साहा, “प्रभु रे मना कूहण जाणा? कूहण तेऊबै सलाह देई सका?” पर हामा में तो मसीहा री आत्मा साहा।

Currently Selected:

1 कुरिन्थियों 2: ISJNT

Highlight

Copy

Compare