હિબ્રૂઓને પત્રો 2

મહાન ઉદ્ધાર

1ઈયા ખાતુરે આમુહુ જાંહા ઉનાયાહા, તીયુ હાચાયુકી ભટકી નાય જાજી પેન તીયુપે વાદારે ધ્યાન આપજી. 2કાદાચ પરમેહેર સુવાર્તા જે હોરગાદુતુ મારફતે આપનેહે આપવામે આલી, તે સાદા સત્ય રીયીહી, આને જીયાહા તીયા આજ્ઞા પાલન નાહ કેયો તીયાહાને પરમેહેરુહુ દંડ આપ્યોહો. 3આમુહુ એહેડા ઉદ્ધારુ વિશે ધ્યાન આપજી તા કેલ્લી રીતીકી વાચાય સેકુહુ? ઈયા ઉદ્ધારુ ગોઠ બાદા પેલ્લા પ્રભુ ઇસુ ખ્રિસ્તુહુ આખલી, આને જે લોક ઉનાયા તીયાહા તે સુવાર્તા હાચી એહેકી સાબિત કેયી. 4તીયા આરી-આરી પરમેહેરુહુ બી ચિન્હ ચમત્કાર આને અલગ-અલગ પ્રકારુ અદભુત કામે કીને આને પોતા ઈચ્છાકી પવિત્રઆત્મા વરદાન આપીને ઇયાલે સાબિત કેતો રીયો.

આમા ઉદ્ધાર કેનારો

5પરમેહેરુહુ તીયા આવનારા યુગુલે જીયા વિશે આપુહુ ગોઠયા કેતાહા, તોઅ હોરગાદુતુ આથુમે નાહ હોપ્યો, પેન પ્રભુ ઇસુ આથુમે હોપ્યોહો. 6પવિત્રશાસ્ત્ર કાંહી બી એહેકી નાહ આખવામે આલો કા, “માંહુ કાય હાય, કા તુ તીયા દેખભાલ કીહો? માંહા પોયરો કેડો હાય કા તુ તીયા ચિંતા કીહો?” 7તુયુહુ તીયાલે હોરગાદુતુ બરાબર આદર આને મહિમા આપી, આને તોઅ બોનાવલી દુનિયાપે તીયાલે અધિકાર આપ્યો.

8કા તોઅ બાદી વસ્તુપે રાજ કે. જાંહા પરમેહેરુહુ બાદોજ તીયા આધિનુમે કી દેદોહો, તા તીયાહા કાય બી એહેડો છોડયો જો તીયા આધિનુમે નાય વેરી, પેન આમી લોગુ આમા નજર ઇ દેખાવેહે કા બાદી વસ્તુ તીયા આધિનુમે નાય વેઅ. 9પેન આમુહુ ઇસુલે હેતાહા કા થોડા સમયુ માટે હોરગાદુતુ કેતા ઓછા સામર્થું કેયો, કા પરમેહેરુ કૃપા માટે તોઅ બાદા લોકુ માટે મોય જાય. તીયાહા ખુબુજ દુઃખ વેઠયો આને મોય ગીયો, ઈયા કારણુકી તીયાલે આદર આને મહિમા મુગુટ પોવાવ્યો. 10કાહાકા પરમેહેરુહુ બાદોજ બોનાવ્યોહો આને બાદી વસ્તુલે પોતા માટે હાંબાલી રાખીહી, આને ખુબુજ લોકુહુ પોતા મહિમામે ભાગીદાર કેયા, ઈયા ખાતુરે પરમેહેરુલે ઇંજ હારો લાગ્યો કા ઉદ્ધારુ વેલે લી જાનારો પ્રભુ ઇસુ ખ્રિસ્ત દુઃખ વેઠીને પુરો સિદ્ધ વી જાય. 11કાહાકા લોકુહુને પવિત્ર કેનારો એટલે ઇસુ ખ્રિસ્ત આને જો પવિત્ર વેહે, બેનુ એકુજ બાહકા પોયરો-પોયરી હાય, એટલે પરમેહેરુ, ઈયા કારણુકી ઇસુ ખ્રિસ્ત તીયાહાને પાવુ-બોંય આખુલોકી નાહ નાજવાતો. 12આને ઇસુ ખ્રિસ્ત પરમેહેરુલે ઇ આખેહે કા, “જો કેડો તુયુહુ માઅ ખાતુરે કેયોહો તોઅ પાવુ-બોયુહુને આખેહે, જાંહા લોક તોઅ આરાધના કેરા માટે એકઠા વેરી, તાંહા આંય તોઅ મહિમા કેહે.” 13આને તોઅ ફાચે આખેહે કા, “આંય પરમેહેરુપે ભોરોષો રાખેહે,” આને ફાચે ઇ બી આખતાહા, “ઇહી આંય તીયા લોકુ આરી હાય જીયાહાને પરમેહેરુહુ માને આપ્યાહા, તે માઅ પોયરા હોચે હાય.”

14કાહાકા પરમેહેરુહુ પોયરો-પોયરી લોક હાય, જે માહ આને રોગુતુ બોનલા હાય, આને ઇસુ બી એક માંહુ બોની ગીયોહો, કા તીયા મૃત્ય મારફતે શૈતાનુલે નાશ કે, જીયાલે મોતુપે અધિકાર હાય. 15ઈયા મારફતે પ્રભુ ઇસુ ખ્રિસ્તુહુ જો પોતા બાદો જીવન મૃત્ય બીખીમે જીવતલા તીયાં ઉદ્ધાર કેયો. 16કાહાકા પ્રભુ ઇસુ તા હોરગાદુતુ નાહ પેન ઇબ્રાહીમુ પીઢી લોકુ મદદ કેહે. 17ઈયા કારણુકી તીયાલે બાદી ગોઠીમે બાદા લોકુ હોચે વેરા જોજે, કા તોઅ એક દયાલુ આને ઈમાનદાર મહાયાજકુ રુપુમે પરમેહેરુ સેવા કી સેકે આને આપુ પાપુ માફી માટે પોતે બલિદાન વી સેકે. 18કાહાકા જાંહા તીયા પરીક્ષા વેયી તા તીયાહા દુઃખ વેઠયો, ઈયા ખાતુરે તોઅ પરિક્ષામે પોળલા લોકુ મદદ કી સેકેહે.

Currently Selected:

હિબ્રૂઓને પત્રો 2: DUBNT

Highlight

Copy

Compare