હિબ્રૂઓને પત્રો 1

પરમેહેરુ વચન, પોયરા મારફતે

1જુના યુગુમે પરમેહેરુહુ આપુ આગલા ડાયા આરી ભવિષ્યવક્તા મારફતે ખુબુજ વાર અલગ-અલગ રીતીકી ગોઠયા કેયા. 2પેન ઈયા છેલ્લા દિહુમે પરમેહેરુહુ આમા આરી તીયા પોયરા મારફતે ગોઠયા કેયા, આને તીયાહા પોયરા મારફતેજ બાદો જગત બોનાવ્યો, આને તીયાજ જગતુ વારીસદાર બી ઠેરવ્યા. 3પોયરો, પરમેહેરુ મહિમા ઉજવાળો હાય, આને તીયામે પરમેહેરુ હોચેજ સ્વભાવ હાય, તોઅ આખા જગતુલે પોતા સામર્થી વચનુકી સાબાંલેહે. તોઅ આપુ પાપુહુને માફકીને, હોરગામે જાયને મહિમામય પરમેહેરુ હુદીવેલે બોહી ગીયો. 4ઈયા મતલબ ઓ હાય કા પોયરો, હોરગાદુતુ કેતા બી વાદારે મહાન હાય, કાહાકા પરમેહેરુહુ પોયરાલે હોરગામે એહેડો નામ આપ્યો કા તોઅ ખુબુજ મહાન હાય.

પરમેહેરુ પોયરા મહાનતા

5કાહાકા પરમેહેરુહુ કીદીહી બી હોરગા દુતુલે એહેકી નાહ આખ્યો કા,

“તુ માઅ પોયરો હાય,

આજ આંય તુલે પોયરા રુપુમે જાહેર કીહુ,”

આને ફાચે તીયાહા કેલ્લા બી હોરગા દુતુલે એહેકી નાહ આખ્યો કા,

આંય તીયા બાહકો બોનેહે.

આને તોઅ માઅ પોયરો બોની,

6પેન પરમેહેર પોતા પેલ્લા પોયરાલે ઈયા જગતુમે મોકલા પેલ્લા ઇ આખેહે કા “પરમેહેરુ બાદા હોરગા દુત તીયા આરાધના કે.” 7આને તોઅ હોરગાદુતુ વિશે આખેહે,

“તોઅ પોતા હોરગા દુતુહુને હવા હોચે આને પોતા સેવકુહુને ધગધકતી આગુ હોચે બોનાવેહે.” 8પેન તોઅ પોતા પોયરા વિશે આખેહે, “ઓ પરમેહેર, તોઅ સાદા માટે ટીકી રેઅ, તુ પોતા રાજ્યપે ધાર્મિકતાકી રાજ કીહો.

9તુ ધાર્મિકતા કામુકી પ્રેમ કીહો, પેન ગલત કામુહુને કેરુલોકી નફરત કીહો. ઈયા ખાતુરે આંય પરમેહેરુ, તોઅ પરમેહેરુહુ તોઅ આર્યામેને તુલે પસંદ કી લેદોહો.”

10પવિત્રશાસ્ત્ર આખેહે કા, “ઓ પ્રભુ શુરુવાતુમે તુયુહુ તોરતીપે જુગ બોનાવ્યો. 11તોઅ બાદો તા નાશ વી જાય, આને પોતળા હોચે જુને વી જાય, પેન તુ સાદા જીવતો રીહો.” 12આને તુ તીયાહાને એક ચાદરા હોચે ચોંડાવી લીહો, આને જેહેકી લોક મોલવાલા પોતળાહાને કાડીને બીજે હારે પોતળે પોવતેહે, તીયુજ રીતીકી તુ તીયાહાને બદલી દિહો, પેન તુ કીદીહી બી નાય બોદલો, આને તુ સાદા જીવતો રીહો. 13આને પરમેહેરુહુ પોતા હોરગા દુતુમેને કેડાલે કીદીહી બી ઇ નાહ આખ્યો કા, “જાંવ લોગુ આંય તોઅ દુશ્મનુહુને હારવીને તોઅ આથુમે નાય હોપી દીવ્યુ, તામ લોગુ તુ માઅ હુદીવેલે બોહ.” 14હોરગા દુતુહુ તા ખાલી પરમેહેરુ સેવા કેનારા દુતુ હાય, આને પરમેહેર તીયાહાને ઉદ્ધાર પામનારા લોકુ સેવા કેરા ખાતુરે મોક્લેહે.

Currently Selected:

હિબ્રૂઓને પત્રો 1: DUBNT

Highlight

Copy

Compare