એફેસીઓ પત્રો 3

અન્યજાતિ લોકુમે પાઉલુ મારફતે સેવા

1ઈયા ખાતુરે આંય પાઉલ અન્યજાતિ લોકુમે ઇસુ ખ્રિસ્તુ કામુલે કેરુલોકી જેલુમે બંદી હાય. 2જરુર તુમુહુ ઉનાયા વેરી કા પરમેહેરુહુ માને હારી સુવાર્તા પ્રચાર કેરા જવાબદારી તીયા કૃપાકી આપીહી. 3એટલે પરમેહેરુ રહસ્ય જો ખુબુજ સમય પેલ્લા કેડાલે બી માલુમે નાય આથો, તીયાહા માને તીયા ગુપ્ત યોજનાલે જાહેર પ્રગટ કેયી, જીયા વિશે માયુહુ પેલ્લાજ ટુકુમે લેખ્યોહો. 4જીયાકી પત્રમે લેખલી ગોઠીહીને તુમુહુ વાંચીને હોમજી સેકતાહા, કા જીયાલે કેડોજ નાહ જાંતો તીયા ખ્રિસ્તુ યોજના વિશે આંય કોતો જાંહુ. 5ફાચલી પીઢી લોકુહુનને ઈયુ યોજનાલે જાહેર નાહ કેરામે આલી, પેન આમી તીયાહા પવિત્રઆત્મા મારફતે પવિત્ર ચેલો આને ભવિષ્યવક્તામે પ્રગટ કેયોહો. 6પરમેહેરુ યોજના એ હાય, કા ખ્રિસ્ત ઇસુમે હારી સુવાર્તા મારફતે અન્યજાતિ લોકુ વિરાસતુમે ભાગીદાર, આને એકુજ શરીરુ ભાગ આને પરમેહેરુ કેલા વાયદામે ભાગીદાર વેરી. 7પરમેહેરુ કૃપાકી તીયા ચમત્કારી કામે કેરા અનુસાર, જો માને આપવામે આલી, તીયુ હારી સુવાર્તા આંય સેવક બોન્યો.

8આંય જો પરમેહેરુ પસંદ કેલા લોકુમે બાદા કેતા હાનો હાય, તેબી માપે ખ્રિસ્તુ કૃપા વીયો કા આંય અન્યજાતિ લોકુહુને અપાર આશિષુ હારી સુવાર્તા ઉનાવુ. 9આને બાદા લોકુમેને તીયુ ગોઠી રહસ્ય પ્રગટ કીવ્યુ, કા તીયા ભેદુ ઈરાદો કાય હાય, જીયુ ગોઠી રહસ્ય બાદાહાને બોનાવનારા પરમેહેરુ જગત બોનાવા શુરુવાતુમે જાહેર નાહ કેયો. 10એટલે આમી મંડળી બાદા લોકુ મારફતે, પરમેહેરુ અલગ-અલગ પ્રકારુ જ્ઞાન, આકાશુમે રાજ્ય કેનારો આત્મિક જાનવર આને અધિકારીપે જાહેર કેયોહો. 11પરમેહેર અનંત ઇરાદા અનુસાર, આપુ પ્રભુ ઇસુ ખ્રિસ્તુ મારફતે પુરો કેરી. 12જીયાકી આપનેહે વિશ્વાસ કેરુલોમે હિંમત આને ભોરોષાકી પરમેહેરુ સંગતી કેરામે અધિકાર મીલ્યોહો. 13ઈયા ખાતુરે આંય વિનંતી કીહુ કા જે તકલીફ તુમા લીદે માને વી રીયીહી, તીયા લીદે હિંમત માઅ હારાહા, કાહાકા ઇ બાદો તુમા ફાયદા માટેજ વી રીયોહો.

ઇસુ ખ્રિસ્તુ પ્રેમ

14-15ઇયાજ કારણુકી, આંય જીયા નામુકી હોરગા આને તોરતી દરેક પરિવારુ નામ રાખવામે આવેહે, તીયા પરમેહેરુ હુંબુર ઘુટણે પોળીને પ્રાર્થના કીહુ. 16કા તોઅ પોતા મહિમા ધનુંમેને તુમનેહે ઇ વરદાન આપે, કા તીયા આત્મા તુમનેહે તોઅ સામર્થ્ય આપે કા તુમુહુ આત્મામે મજબુત રી સેકા. 17આને વિશ્વાસુ મારફતે તુમા રદયુમે ખ્રિસ્ત રીઅ સેકે, કા તુમુહુ પ્રેમુમે મજબુત આને સ્થિર રીને, 18આને પરમેહેરુ બાદા લોકુ આરી ઇ હોમજા સામર્થ્ય મિલવા, કા તીયા પ્રેમ પોહળાય, આને લંબાઇ, આને ઉચાઇ આને ઉંડાઈ કોતી હાય. 19આંય પ્રાર્થના કીહુ કા તુમુહુ ખ્રિસ્તુ પ્રેમુલે જાંય સેકા જો આપુ હોમજુ બારે હાય, કા પરમેહેરુ બાદી ભરપુરીકી તુમુહુ પરિપુર્ણ વેરા.

20આમી પરમેહેરુ એહેડો સામર્થ્ય હાય, કા આપુ માગુલો કા વિચાર કેરુલો વાદારે કામ કી સેકેહે, તીયા સામર્થ્ય અનુસાર જો આપુમે કામ કેહે. 21તીયા મહિમા મંડળીમે આને ઇસુ ખ્રિસ્તુમે પીઢી-પીઢીહીને યુગા-યુગ વેતી રેઅ, આમીન.

Currently Selected:

એફેસીઓ પત્રો 3: DUBNT

Highlight

Copy

Compare