એફેસીઓ પત્રો 2

મૃત્યમેને જીવનુવેલે

1વિતલા સમયુમે પરમેહેરુ આજ્ઞા ઉલંઘન કેરુલોકી આને પાપુ લીદે આત્મિક રીતીકી મોલા આથા. 2તીયા સમયુમે તુમુહુ ઈયા જગતુ લોકુ અનુસાર જીવન જીવતલા, આને તુમુહુ શૈતાનુ આજ્ઞા એટલે અધિકારી જો પુથુપે રાજ કેહે તીયા આજ્ઞા પાલન કેતલા, જો આમી બી પરમેહેરુ આજ્ઞા પાલન કેનારાપે રાજ્ય કેરા કોશિશ કેહે. 3આપુહુ પેલ્લાજ તીયા હોચુજ આપુ પાપી સ્વભાવુલે પુરો કેરુલો ઈચ્છાકી જીવન જીવતલા, આને શરીર આને મનુકી ખારાબ ઈચ્છા પુરી કેતલા, આને આપુ સ્વભાવ બી અન્ય લોકુ સમાન પરમેહેરુ દંડુ યોગ્યો આથો. 4પેન પરમેહેર ખુબુજ દયાલો હાય, આને તીયાહા આપુ આરી મોડો પ્રેમ કેયોહો.

5જાંહા આપુ પાપ કેરા લીદે આત્મિક રીતીકી મોલા આથા, તાંહા આપનેહે ઇસુ ખ્રિસ્તુ આરી જીવતા કેયા આને પરમેહેરુ કૃપાકી તુમા ઉદ્ધાર કેયો. 6તીયાહા આપનેહે ઇસુ ખ્રિસ્તુ આરી મોલામેને જીવાવ્યા, આને આપનેહે હોરગા ખ્રિસ્તુ આરી રાજ્ય કેરા યોગ્ય બોનાવ્યા. 7પરમેહેરુહુ ઇસુ ખ્રિસ્તુ મારફતે એહેકી દાખલો ઈયા ખાતુરે દેખાવ્યો, કા આવનારા દિહુમે તોઅ જગતુ લોકુહુને આખી સેકે તીયા કૃપા કોતી મહાન હાય, જો તીયાહા ખ્રિસ્તુમે આપુ બાદાપે દેખાવ્યોહો. 8-9કાહાકા તુમા વિશ્વાસુ લીદે, પરમેહેરુ કૃપાકી તુમા ઉદ્ધાર વીયોહો, ઇ તુમા ભલા કામુ મારફતે નાહ વીયો, પેન પરમેહેરુ દાન હાય, ઈયા ખાતુરે કેડો બી પોતા મનુમે ઘમંડ નાય કે. 10કાહાકા આપુહુ પરમેહેરુ આથુ રચના હાય, તીયાહા આપનેહે ઇસુ ખ્રિસ્તુમે તીયા ભલા કામુહુને કેરા માટે બોનાવ્યાહા, જીયાં કામુહુને આપનેહે કેરા માટે પરમેહેરુહુ પેલ્લાજ તીયાર કેયાહા.

ઇસુ ખ્રિસ્તુમે બાદા એક હાય

11ઈયા ખાતુરે યાદ રાખા કા તુમુહુ જન્મકી અન્યજાતિ હાય, આને યહુદી લો એટલે સુન્નત કેલા લોક, તે તુમનેહે સુન્નત વોગર્યા આખતાહા. 12તુમુહુ ખ્રિસ્તુલે તીયા સમયુલને જાંતલા, આને તુમા ગણતરી પરમેહેરુ પસંદ કેલા ઇસ્રાએલી લોકુમે બી આથી. આને તુમુહુ તીયા મારફતે વાચા કેલા વાયદામે ભાગીદાર નાય આથા, આને તુમુહુ ઈયા જગતુ આશા વોગર્યા આને પરમેહેરુ વોગર્યા આથા. 13એક સમય આથો જાંહા તુમુહુ પરમેહેરુ સે દુર આથા, પેન આમી ઇસુ ખ્રિસ્તુ બલિદાનુ રોગુતુ મારફતે પાહી લાવામે આલાહા. 14કાહાકા કા ખ્રિસ્ત પોતે આપુ મિલાપ કેરાવનારો હા, આને યહુદી લોક આને અન્યજાતિ વાલાહાને દુર કેનારી દુશ્મની દીવાલુલે તીયા શરીરુ મારફતે તોડીને બેનુહુને એક કી દેદાહા. 15આને પોતા મૃત્ય મારફતે તીયાહા મુસા બાદા નિયમુહુંને આને વિધિહીને લેખુલે રદ કી દેધ્યાહા, આને તીયાકી યહુદી લોક આને અન્યજાતિ લોકુમે મિલાપ કેરાવ્યો, આને પોતામે એક નવી જાતિ બોનાવીને તીયાંમે શાંતિ સ્થાપિત કેયી. 16આને ક્રુસુપે પોતા મૃત્ય મારફતે દુશ્મનીલે મીટવીને, યહુદી આને અન્યજાતિ લોકુહુને એક કી દેદાહા આને તીયાં પરમેહેરુ આરી મેલ-મિલાપ કી દેદોહો. 17આને તીયાહા આવીને તુમનેહે એટલે અન્યજાતિ વાલાહાને જે પરમેહેરુ પાહી આથા, બેનુ શાંતિ હારી સુવાર્તા ઉનાવી. 18કાહાકા ઇસુ ખ્રિસ્તુ લીદે, આપુહુ બાદા પવિત્રઆત્મા મારફતે પિતા પરમેહેરુ પાહી આવી સેક્તાહા.

19ઈયા ખાતુરે તુમુહુ અન્યજાતિ વાલા લોક આમી પારાયા, કા અન્ય દેશુમેને આલ્લા નાહ ગોણવામે આવતા, પેન તુમુહુ પરમેહેરુ પસંદ કેલા લોકુ આરી પોતા દેશુ આને પરમેહેરુ પરિવારુ વી ગીયાહા. 20આને પરમેહેરુ સેવા માટે પસંદ કેલા ચેલા આને ભવિષ્યવક્તા ટાક્લા પાયાપે તુમનેહે જોળવામે આલાહા, જીયા ખુણા ખાશ ડોગળો ઇસુ ખ્રિસ્ત પોતે હાય. 21જીયામે બાદા એક-બીજા આરી જોળાયને પ્રભુ માટે પવિત્ર ભવન બોનાવતા જાતાહા. 22જીયામે તુમુહુ બી પવિત્રઆત્મા મારફતે એકબીજા આરી જોળાયને પવિત્ર ભવન બોનાવામે આવતેહે, જીહી પરમેહેર રેહે.

Currently Selected:

એફેસીઓ પત્રો 2: DUBNT

Highlight

Copy

Compare