2 કુરિંથીઓ પત્રો 4

કાદુ બાસનામે ધન

1ઈયા ખાતુરે જાંહા આમાપે એહેડી દયા વેયી, કા આમનેહે પરમેહેરુ સુવાર્તા પ્રચાર કેરા સેવા મીલી, તા આમુહુ હિંમત રાખતાહા. 2પેન આમુહુ શર્મ આવે એહેડે આને ગુપ્ત કામે છોડી દેદેહે, આને નાય તા આમુહુ ચતુરાય કેતાહા આને નાહ પરમેહેરુ વચનુમે કાંવીહી મિલાવટ કેતાહા. પેન આમુહુ પરમેહેરુ હુંબુર ખાલી હાચાય આખતાહા, આને દરેક માંહુ સાક્ષી આપેહે કા તોઅ હાચો હાય. 3આને જો આમનેહે હારી સુવાર્તા ઉનાવેહે, કાદાચ તોઅ દોબલો હાય તા ખાલી નાશ વેનારાકીજ દોબલો હાય. 4ઈયા જગતુ ભગવાન શૈતાનુહુ અવિશ્વાસી લોકુ બુદ્ધિ આંદલી કી દેદેહી, ઈયા ખાતુરે તે ખ્રિસ્તુલે જો પરમેહેરુ રુપુમે હાય, આને તે મહિમા જે ખ્રિસ્તુ વિશે હારી સુવાર્તાકી આવેહે, હોમજી નાહ સેકતા. 5કાહાકા આમા વિશે નાહ, પેન ખ્રિસ્તુ વિશે પ્રચાર કેતાહા કા તોઅ પ્રભુ હાય, આને પોતા વિશે ઇ આખતાહા, કા આમુહુ ઇસુ ખ્રિસ્તુ માટે તુમા સેવક હાય. 6ઈયા ખાતુરે પરમેહેરુહુ આખ્યોહો, “અંધકારુમેને ઉજાલોં વેઅ,” આને તીયાજ ઉજાલા હોચે ઇસુ ખ્રિસ્ત પરમેહેરુહુ આપુ મનુમે હોમુજ આપીહી, કા આપુહુ તીયા મહિમા હીઅ સેક્જી.

7આમી ઇ ઉજાલોં આપુ મનુમે ચોમકેહે, પેન આપુહુ પોતે કાદુ બાસના હોચે હાય. જીયામે એ માલ-મિલકત ઈયા ખાતુરે થોવામે આલોહો, કા ઇ સાફ વી જાય કા મહાન સામર્થ આપુ નાહ પેન પરમેહેરુ હાય. 8આપુહુ બાદા બાજુમે તકલીફ તા વેઠતાહા, પેને મુસીબતુ નાહ પોળતા, ખુબુજ સમય પરેશાન તા વી જાતાહા, પેન નાશ નાહ વેતા. 9સતાવામે તા આવતાહા, પેન છોડી દેવામે નાહ આવતા, પાળી ટાકવામે આવતાહા, પેન નાશ નાહ વેતા. 10આપુહુ ઇસુ ખ્રિસ્તુ હોચે સાદા મૃત્ય ખતરામે નાહ રેતાહા, કા આપુહુ જે કામે કેતાહા, તીયા મારફતે લોક ઇસુ ખ્રિસ્તુ જીવનુલે હી સેકે. 11કાહાકા આપુહુ સાદા જીવતા રીને બી ઇસુ ખ્રિસ્તુ લીદે બીજા આથુકી માય ટાકુલો ખતરામે રેતાહા, કા ઇસુ જીવન બી આપુ મોનારા શરીરુમે જાહેર વેઅ. 12ઈયુ રીતીકી આપુહુ મૃત્ય ખતરામે રેતાહા, પેન તીયા બદલો ઓ હાય, કા તુમુહુ સાદા મફતે જીવન મીલવ્યોહો.

13આમા તેહેકીજ વિશ્વાસ હાય, જેહેકી પવિત્રશાસ્ત્રમે લેખલો હાય કા, “માયુહુ વિશ્વાસ કેયોહો, ઈયા ખાતુરે આંય ગોગ્યો.” આમનેહે બી વિશ્વાસ હાય, ઈયા ખાતુરે ગોગતાહા. 14કાહાકા આમુહુ પરમેહેરુલે જાંતાહા, જીયાહા પ્રભુ ઇસુલે મોલામેને ફાચો જીવાવ્યો, તોજ આપનેહે બી ઇસુ ખ્રિસ્તુ ભાગીદાર હોમજીને ફાચા જીવતા કેરી, આને પોતા હુંબુર હાજર વેરા ખાતુરે આમનેહે તુમા હુંબુર લાલોહો. 15કાહાકા તે બાદે દુઃખે જે આમુહુ વેઠ્યેહે તે તુમા ફાયદા ખાતુરે હાય, કા વાદારેને વાદારે લોકુહુને માલુમ વી જાય, કા પરમેહેર કોતો કૃપાલો હાય, આને ખુબુજ લોક તીયાલે આદર આને મહિમા આપી.

16ઈયા ખાતુરે આમુહુ હિંમત રાખતાહા, કાદાચ આમા શારીરિક જીવન ધીરે-ધીરે મોતો બી જાહે, તા આમા આત્મા રાત-દિહ નવી વેતી જાહે. 17કાહાકા આમા વર્તનમાન પરેશાની હાની હાય, આને વાદારે સમય લોગુ નાય રીઅ. પેન ઈયા પરિણામ સાદા માટે મહિમા વેરી જો તીયા બાદા કેતા વાદારે વેરી, જીયા આમુહુ વિચાર કી સેક્તાહા. 18આને આમુહુ તા ઈયા જગતુલે દેખાનારી વસ્તુપે ધ્યાન નાહ કેતા, પેન જો દેખાતો નાહ તીયાપે ધ્યાન કેતાહા. કાહાકા દેખાનારી વસ્તુ ખાલી થોડા સમયુ માટેજ રેહે, પેન જે વસ્તુ દેખાતી નાહ તે સાદા રેહે.

Currently Selected:

2 કુરિંથીઓ પત્રો 4: DUBNT

Highlight

Copy

Compare