1 કુરિંથીઓ પત્રો 4
4
ખ્રિસ્તુ સેવક
1લોક આમનેહે ખ્રિસ્તુ સેવક આને પરમેહેરુ ભેદ આખનારા ભંડારી હોમજુતાહા. 2એક ભંડારીલે હોપલા કામુમે ઈમાનદાર રાંઅ જોજે. 3પેન માઅ માટે કેલ્લીજ ચિંતા ગોઠ નાહ, તુમુહુ નેતા બીજો કેલ્લો બી અધિકારી માને પારખે, કા આંય ઈમાનદાર હાય કા નાહ. ઇહી લોગુ કા આંય પોતે નાહ પારખુતો કા આંય ઈમાનદાર હાય કા નાહ. 4કાહાકા માઅ મન માને કેલ્લીજ ગોઠીમે દોષી નાહ ઠેરવુતો, પેન ઈયા આધારુકી કા આંય નિર્દોષ સાબિત નાહ વેતો, કાહાકા માને પારખુનારો આને ન્યાય કેનારો પ્રભુ હાય. 5ઈયા ખાતુરે જાંવ લોગુ પ્રભુ નાય આવે, તાંવ લોગુ કેડાજ ન્યાય માઅ કીહા, તોજ અંધકારુમે દોબલી ગોઠીમે જ્યોતિ લાવી, આને દરેક મનુ ઇરાદા બાદા હુબુર જાહેર કેરામે આવી, તાંહા દરેક માંહાલે મીલનારી પ્રસંશા પરમેહેરુ મારફતે મીલી.
6ઓ વિશ્વાસી પાવુહુ, માયુહુ ઇ હિક્વા ખાતુરે માઅ આને અપુલ્લોસુ દાખલો આપીને ચર્ચા કેયીહી કા પવિત્રશાસ્ત્રમે જો લેખલો હાય, તીયાસે આગલા તુમનેહે વાદા નાય જોજે, તાંહા તુમુહુ ઇ આખીને ઘમંડ નાય કેરા કા માઅ આગેવાન હારો હાય તોઅ આગેવાન ખારાબ હાય. 7તુમનેહે બીજા કેતા હારા કેડાહા બોનાવ્યાહા? આને જો કાય તુમાપે હાય તોઅ બાદો પરમેહેરુહુ આપ્યોહો, તા ફાચે તીયામે ઘમંડ કેરા સમાન કાયજ ગોઠ નાહ.
8તુમુહુ તા પોતા વિશે વિચાર કેતાહા કા આમા બાદી આત્મિક જરુરત પુરી વી ગીયીહી, આને આમુહુ તા માલદાર વી ગીયાહા. આને તુમનેહે ઇ બી લાગેહે કા આમનેહે તા તુમા વગર રાજા હોચે રાજ કેરા શુરુ બી કી દેદોહો. કાદાચ તુમુહુ ખરેખર રાજ કેરા શુરુ કી ધ્યાહા તા આંય ખુશ વી જાહે કા આમુહુ બી તુમા આરી રાજ કી સેક્જી. 9માને તા લાગેહે કા પરમેહેરુહુ આમનેહે ચેલાહાને તીયાં મોનારા હોચે છેલ્લી લાયનુમે ઉબી રાખ્યાહા. કાહાકા આમુહુ હોરગાદુતુ આને ઈયા જગતુ લોકુ માટે તમાશો બોની ગીયાહા. 10આમુહુ ખ્રિસ્તુ વિશે પ્રચાર કેતાહા ઈયા ખાતુરે કા લોકુ નજરીમે આમુહુ મુર્ખ વેજી, આને તુમનેહે આદર મીલેહે, પેન આમનેહે તા આદર બી નાહ મીલતો. 11આમુહુ આજ લોગુ પુખા આને ફાંપ્યા હાય, આને આમાપે પોવા ખાતુરે હારે પોતળે બી નાહ, આમુહુ લોકુ મારફતે સતાવ વેઠતાહા, આને આમાપે રેવુલો ખાતુરે પોંગો બી નાહ. 12પોતા પાલન-પોષણ કેરા આમુહુ ખુબુજ ઓછી મેહનત કેતાહા, જાંહા લોક આમા વિરોધુમે આખતાહા તાંહા આમુહુ તીયાહાને આશીર્વાદ આપતાહા. જાંહા આમા સતાવ વેહે તા આમુહુ સહન કેતાહા. 13જાંહા લોક આમનેહે બદનામ કેતાહા, તા આમુહુ તીયા આરી નમ્રતાકી ગોઠયા કેતાહા. આજ લોગુ લોક આમનેહે આદર નાહ આપતા, તે આમનેહે કોચરા હોચે હોમજુતેહે.
ચેતવણી
14આંય તુમનેહે નાજવાવા ખાતુરે એ ગોઠયા નાહ લેખતો, પેન માઅ મકસદ તુમનેહે શિક્ષણ આપુલો હાય, કાહાકા તુમુહુ માઅ મેરાલા પોયરા હોચે હાય આને આંય તુમનેહે પ્રેમ કીહુ. 15ભલે આંય ખ્રિસ્તુમે તુમા હિકવુનારા હાજારુ લોક વેરી, તેબી તે બાદે તુમા બાહકા હોચે નાહ ગોણવામે આવતે, પેન બાદાસે પેલ્લા ઇસુ ખ્રિસ્તુ હારી સુવાર્તા માયુહુ તુમનેહે ઉનાવીહી તીયા ખાતુરે આંય તુમા બાહકા સારકો હાય. 16આને આંય તુમનેહે વિનંતી કીહુ કા માઅ સમાન જીવન જીવા. 17ઈયા કારણુકી માયુહુ તિમોથીલે જો પ્રભુ ઇસુ ખ્રિસ્તુમે માઅ મેરાલો આને વિશ્વાસ યોગ્યો પોયરો સમાન હાય જીયાલે આંય પ્રેમ કીહુ, તીયાલે તુમા પાહી મોક્લ્યો. તોઅ તુમનેહે માઅ વિશે આખી કા આંય કેહેડો જીવન જીવુહુ, જેહેકી કા જીહી બી આંય જાહુ દરેક મંડળીલે એહેકીજ શિક્ષણ આપુહુ. 18તુમામેને થોડાક લોક ઇ વિચાર કેતાહા કા આંય તુમનેહે મીલા ખાતુરે આવનારોજ નાહ, ઈયા ખાતુરે તે ઘમંડી વી ગીયેહે. 19કાદાચ પરમેહેરુ ઈચ્છા વેયી તા આંય તુમા પાહી માહરીજ આવેહે, તાંહા આંય તીયા ઘમંડી લોકુહુને ખાલી શિક્ષણુજ નાય પેન તીયાં સામર્થ બી જાંય લેહે. 20કાહાકા પરમેહેરુ રાજય લોકુ જીવનુમે તીયાં ગોઠીકી નાહ પેન તીયાં સામર્થી કામુકી દેખાહે. 21તુમુહુ કાય ઈચ્છતાહા? કા જાંહા આંય તુમા આરી પાહી આવુ તા કાય કીવ્યુ? કાદાચ તાંમ લોગુ તુમુહુ ખોટા તરીકા નાય છોડયા વેરી તા તુમનેહે ખરેખર ગાય દિહી, પેન કાદાચ છોડી દેદા વેરી તા નમ્રતાકી આને પ્રેમુકી વેહવાર કેહે.
Currently Selected:
1 કુરિંથીઓ પત્રો 4: DUBNT
Highlight
Copy
Compare
Share
Want to have your highlights saved across all your devices? Sign up or sign in
Dubli (દુબલી) Bible by The Love Fellowship is licensed under Creative Commons Attribution-ShareAlike 4.0 License.
