1 કુરિંથીઓ પત્રો 5

મંડળીમે પાપ કેનારાપે મુક્દમો

1માયુહુ લોકુહુને આખતા ઉનાયોહો કા, તુમા મંડળીમે થોડાક લોક વ્યેભિચાર કેતાહા, ઈયુ રીતી વ્યભિચાર તા અવિશ્વાસી લોક બી નાહ કેતા, તોઅ એહેકીજ હાય કા એક માંહુ પોતા બીજી કોઅવાલી આરી વ્યેભિચાર કેહે. 2તીયા વિશે તુમનેહે દુઃખી વેરા જોજે, પેન તુમુહુ તા તીયાપે ઘમંડ કેતાહા. એહેકી કેનારાહાને મંડળીમેને કાડી થોવા જોજે. 3કાદાચ આંય તુમાસે દુર રીવ્યુ, પેન જાંહા આંય તુમા મંડળી પરેશાની વિશે વિચારુહુ તા, એહેકી લાગેહે કા આંય તુમા પાહીજ હાય આને તીયા માંહાલે જો વ્યેભિચાર કેહે તીયા ફેસલો કીહુ. 4તુમનેહે ઇ કેરુલો જરુર નાહ, કા બાદે વિશ્વાસી એકઠે વીને આને ઇ હોમજે કા આંય બી તુમા વોચ્ચે રીવ્યુ, પ્રભુ ઇસુ ખ્રિસ્તુ અધિકારીકી એહેડા માંહાલે. 5જો માંહુ એહેડો પાપી વેહવાર કેહે તીયાલે મંડળીમેને કાડી થોવા, આને ફાચે શૈતાનુ હવાલે વી જાઅ ધ્યા, કા તોઅ પોતા પાપુ પાસ્તાવો કે આને જાંહા પ્રભુ ન્યાય કેરી તાંહા તીયા આત્મા ઉદ્ધાર પામે.

6ઘમંડ કેરા બંદ કેરા, તુમુહુ હારી રીતીકી જાંતાહા કા કાદાચ એક માંહુ મંડળીમે વ્યેભિચાર કેનારો વેઅ, આને મંડળીમેને નાય નીગે તા એહેકી કેરા કા જીયુ રીતીકી થોડો ખમીર આખા મોગલુલા નોટુલે ખમીર બોનાવી દેહે. 7જુનો ખમીર મતલબ એહેડો પાપી માંહુ જો મંડળીમેને નીગીને પોતે વગર ખમીરુ મોગલુલા નોટુ સારકો પવિત્ર બની જાવુલો, કાહાકા આમુહુ આમા પાપુમેને છુટકારો આપા ખાતુરે ઇસુ ખ્રિસ્ત એક ઘેટા હોચે બલિદાન વી ગીયો. ઇ આમનેહે આમા પાપુમેને છુટકારો આપા ખાતુરે ઇસુ ખ્રિસ્ત એક ઘેટા સમાન બલિદાન વી ગીયો. ઇ આમનેહે તીયા ઘેટાલે યાદ કેરાવેહે, જો ઇસ્રાએલ દેશુ લોકુહુને માયને તીયા ગુલામીમેને છુટકારા માટે પાસ્ખા તેહવાર ઉજવ્યો. 8જેહેકી પાસ્ખા તેહવારુ દિહ યહુદી લોકુહુ પોતા કોમે બાદા ખમીરુલે ફેકી દેદલો આને વગર ખમીરુ રોટલી ખાદલી, તેહેકીજ આમુહુ વિશ્વાસી બોનાં પેલ્લા જેહેકી ખારાબ વેહવાર કેતલા તીયાલે છોડી ધ્યા, આને હારો વેહવાર કેરા, એટલે આમનેહે સાદા ઈમાનદાર આને હાચા બોના જોજે.

9માયુહુ તુમનેહે પેલ્લાજ પત્રમે લેખલો, કા વ્યેભિચાર કેનારા સંગતી માઅ કીહા. 10ઈયા મતલબ ઓ નાહ કા ઈયા જગતુમે વ્યેભિચાર કેનારાકી, કા લોભ કેનારા, કા જે લોક બીજાહાને ધોકો દેતાહા તીયા આરી, કા મુર્તિ પુજા કેનારા, આરી બિલકુલ સંગતી માંઅ કીહા. પેન કાદાચ એહેડા લોકુ સંગતી નાય કેરુલો વેરી તા દુનિયાજ છોડી દાંઅ પોળી. 11પેન માઅ લેખુલો મતલબ ઓ નાહ કા, કા કાદાચ કેડો બી એક વિશ્વાસી માનેહે, પેન તોઅ વ્યેભિચાર કેહે, કા લોભ કેહે, કા મુર્તિ પુજા કેહે, કા ગાય દેહે, કા હોરો પીનારો હાય, કા બીજા લોકુહુને ધોકો દેહે તા તીયા સંગતી માઅ કીહા, ઓતોજ નાય પેન એહેડા લોક આરી ખાવુલો બી નાય. 12કાહાકા કા અવિશ્વાસી લોક ન્યાય કેરુલો માઅ જીમ્મેદારી હાય કા જે લોક મંડળીમે આવતાહા તીયા ન્યાય કેરા. 13પેન અવિશ્વાસી લોકુ ન્યાય પરમેહેર કેરી.

ઈયા ખાતુરે જેહેકી પવિત્રશાસ્ત્રમે લેખલો હાય, “એહેડા ખોટે કામે કેનારાહાને તુમા મંડળીમેને કાડી થોવે.”

Currently Selected:

1 કુરિંથીઓ પત્રો 5: DUBNT

Highlight

Copy

Compare