१ थेसलोनिकी 4

पवित्रताके लिए बुलाहट

1अन्तमे हे विश्वासी भ्या-बहिनसब, हमेसब तोरासिके प्रभु येशूके नाममे आग्रह करैछियौ कि जेरंके हमेसब तोरासिके सिखैलियौ छे, परमेश्वरके खुश करेवाला जीवन जी। तुहेंसब पहलहैसे एरंके जीवन जियैछैं, आर हमेसब तोरासिके एरंके जियैके लिए आरहौ बेसी उत्साह दैछियौ। 2कहिनेकी तोरासिके मालुम छौ कि प्रभु येशू हमरासिके देल अधिकारद्वारा हमेसब तोरासिके निर्देशनसब देलियौ छे। 3कहिनेकी परमेश्वरके इच्छा यी छै कि तुहेंसब पवित्र बन, यानिकी शारीरिक इच्छाके मुताबिक कोनो पाप नैकर। 4आर तुहेंसब हरेक आपन शरीरके पवित्रता आर आदरके साथ नियन्त्रण करैले सिख। 5आर तोरासिके परमेश्वरके नैचिन्हेवाला अविश्वासीसिके जुगुर कामुकताके कुवासनावाला काम नैकरना चाही। 6एरं करिके, कोय भी आपन विश्वासी भ्या-बहिनके विरुद्धमे पाप नैकरक आर ओकर फैदा नैउठाबक कहिनेकी प्रभु येशू एरंको सभे काम करेवाला आदमीसिके सजाय देतै। हमेसब तोरासिके एकर बारेमे पहलहै साफसे कहैलियौ रहे आर गम्भीर चेतावनी देलियौ रहे। 7कहिनेकी परमेश्वर अपनासिके अनैतिक जीवन जियैके लिए नै, मगर पवित्र जीवन जियैके लिए बोलैल्कै छे। 8सेल्याके जे यी आदेशसिके इन्कार करैछै, ऊ आदमीके नै मगर परमेश्वरके इन्कार करैछै, जे परमेश्वर तोरासिके आपन पवित्र आत्मा दैछौ।

प्रेम आर काम

9मगर आपन विश्वासी भ्या-बहिनसिके प्रति प्रेमके विषयमे कक्रहौ तोरासिके लिखैके जरुरत नैछै, कहिनेकी एक दोसरके प्रेम करिहैं कहिके तुहेंसब आपनहैं परमेश्वरसे शिक्षा पैल्हैं छे। 10आर माकेडोनिया प्रदेशमे सभे महर भेल आपन संगी विश्वासीसिके प्रति तुहेंसब पहलहै ही प्रेम देखैलहैं छे। मगर विश्वासी भ्यासब, हमेसब तोरासिके आग्रह करैछियौ कि तुहेंसब प्रेममे आरहौ बढते जो। 11आर हमेसब जेरंको तोरासिके आज्ञा देलियौ छे ओहिने करिके शान्तिपूर्ण जीवन जी, आर दोसर आदमीके मामलामे दखल नैदहैं आर आपन-आपन परिवारके पालैके लिए काम कर। 12ताकी अविश्वासी आदमीसब तोरसिके सभे दिनके जीवनमे केरंको व्यवहार करैछैं से देखिके तोरासिके आदर कर्तौ आर तोरासिके जरुरत पडल चीजके लिए ककरोपर भी भर नैपडे पड्तौ।

मुर्दासे फेर जिन्दा हुऐके आशा

13हे हमर विश्वासी भ्या-बहिनसब, तुहेंसब यी जान कहिके हमेसब चाहैछियै कि ऊ विश्वासीसिके कि हैतै जे पहेला ही मर्ल छै। एरं नैहै कि तुहें दोसर आदमीसिके जुगुर शोक कर कहिनेकी ऊसब मर्लके बाद फेर जिन्दा हैतै कहिके ओकरासिके आशा नैहैछै। 14कहिनेकी अपनासब विश्वास करैछियै, येशू मर्लै आर फेर जिन्दा भी भेलै आर ओहिने करिके परमेश्वर येशूमे विश्वास करिके मरेवाला आदमीसिके भी येशूके संगे फेर वापस आन्तै। 15कहिनेकी प्रभु येशूके वचन मुताबिक हमेसब तोरासिके यी कहैछियौ कि अपनासब जे जिन्दा छियै, आर प्रभु येशू फेर वापस आबैतक जिन्दा रहबै ते पहेला मर्ल आदमीसब येशूके भेट नैकरैतक आपनसिके ओकरसे भेट नैहैतै। 16कहिनेकी प्रभु येशू आपनहैं स्वर्गसे निच्चा ऐतै, उटा समयमे प्रभु येशू बडका आवाजसे आदेश देतै, प्रधान स्वर्गदूत बडका आवाजसे बोल्तै आर परमेश्वरके धुतहुक फुक्ल जैतै, आर ख्रीष्टमे मर्ल विश्वासीसब पहेला जिन्दा हैतै। 17तब अपनासब जे जिन्दा छियै आर धर्तीमे जेसब बाँकी रहबै, ओकरसिके संगे बादलमे उठ्याके लजैल जैबै, आर येशूसंगे बादलमे भेट कर्बै, उटा समयसे अपनासब सभे दिन प्रभु येशूके संगे रहबै। 18सेल्याके यी बातसिके द्वारा एक दोसरके उत्साह दहैं।

Currently Selected:

१ थेसलोनिकी 4: KYVNT

Highlight

Copy