रोमी 12
12
परमेश्वरकीलाइ जिउनो बलिदान
1तबइकिलाइ बिश्वासि भाइन हो, हामरि निउति परमेश्वरको ठुलो कृपाका लाग्दा म तमनलाइ अनुरोध अद्दउ, कि तमन आफना जिवनलाइ पबित्र रे परमेश्वरलाइ ग्रहणयोग्य जिउनो बलिका रुपमि अर्पण अर। परमेश्वरलाइ आराधना अद्द्या सत्य तरिका तेइ हो।
2यइ संसारका मान्सन जसा जन हो, तर परमेश्वरले तमनलाइ तमरो सोच्च्या तरिका बदलिबर तमनलाइ नयाँ मान्समि बदल्ल दिय। तब तमनले परमेश्वरको असल, ग्रहणयोग्य रे सिद्द इच्छा कि हो, त्यो बुज्जया हौ।
आत्मिक बरदान बठेइ परमेश्वरको सेवा
3मलाइ अर्या अनुग्रह बठेइ तमनमि हइ हरेकलाइ म अनुरोध अद्दउ, तमन जसा छौ तइ भण्ना बड्ता आफइलाइ जनसमझउ। तर परमेश्वरले तमनलाइ दिया बिश्वासको परिमाण अनसार सन्तुलित बिचारले सोचउ। 4क्याकि जसेरि हामरो एक सरीरमि भौत अंग हुनाहान, तर सब अंगको एकइ काम हुनइन, 5तसेरि हाम जो ख्रीष्टमी बिश्वासि छौ, हाम ख्रीष्टका शरीरका अंग हौ, रे हाम सब एक अर्खासित जोडिया छौ।
6परमेश्वरले हामलाइ दिया अनुग्रह अन्सार अलग-अलग बरदान हाम प्रयोग अरौ। अगमवाणीको हो भण्या, उइले त्यो सब्द बोल्लु पणन्छ जो परमेश्वर उइलाइ भण्या छ भणि उइले बिश्वासको अरन्छ। 7यदि अरुलाइ सेवा अदद्या बरदान मिल्या छ भण्या, सेवा काममी, सिकाउन्याले सिकाउन्या काममी, 8उत्साह दिन्याले उत्साह दिन्या काममी, दान दिन्या बरदान भयाले उद्दार-चित्तले दान दिन्या काममी, अगुवा हुन्या बरदान भयाले गम्भीर भइबर अगुवाइ अद्द्या काममी, दयाको काम अद्द्याले खुसीसित तइ काम अरउ।
ख्रीष्टिय ब्यबहार
9अरुलाइ प्रेम अर्या जसो जन धेका। जो कुरणी खराब छ, तइलाइ घृणा अर। जो कुरणी निकी छ, तइ कुरणी उत्सुक भइबर लगातार अरि राख। 10एकइ परिबारका सदस्य भया जसेरि एक-अर्खालाइ प्रेम अर। आफइ भण्ना बड्ता औरलाइ आदर अर।
11कडा मेहेनत अर रे अल्छी जन अर। उत्साहित होइबर प्रभुको सेवा अद्दाइ जा। 12तमनसित भया आसामि तमनले आनन्द अददु पणन्छ, संकष्टमि धैर्य अर, लागातार प्रार्थनामि लागी रअ। 13परमेश्वरका मान्सनका खाँचोमी सहयोग अर, पाउनाको सत्कार अरि राख।
14तमनलाइ सताउन्यालाइ आसिर्बाद दिय, सराप जन दिय। 15आनन्द अद्द्यासित आनन्द अर। रुन्या सित रोअ। 16एक-अर्खासित मिलिबर बस, घमण्ड जन अर, तर नम्र मान्सनसित संगत अर। आफना नजरमि बुद्दिमान जन होउ।
17कसइलाइ खराबको सट्टा खराब जन अर। जइ कुरणी सब मान्सनका नजरमि आदरणीय छ, तइ अद्द्या कोशिस अर। 18हुन सकन्छ भण्या, सक्या सम्म सब मान्सनसित सान्तिमि बस।
19प्यारा हो, आफइ बदला कभइ जन लिय, तर परमेश्वरलाइ बदला लिन दिय। क्याकि पबित्र सास्त्रमि प्रभुले भण्ना हान, “बदला लिन्या काम मेरो हो, मइ बदला लिन्या हु।”
20तर तमनले पबित्र सास्त्रमि लेख्या अनसार अर्न्छौ जइमि लेख्या छ, “तेरो सत्तुर भोकाइरइछ भण्या तइलाइ ख्वाइदे,
तइलाइ तिस लागिरइछ भण्या तइलाइ पानी दे।
तसो अर्या हुनाले तुइले उइलाइ लाजमि पाड्डया हो।”
21खराबिले जन जित, तर खराबिलाइ भलाइले जित।
Currently Selected:
रोमी 12: DTYNT
Highlight
Copy
Compare
Share
Want to have your highlights saved across all your devices? Sign up or sign in
Dotyali (डोटेली) New Testament, by The Love Fellowship is licensed under Creative Commons Attribution-ShareAlike 4.0 License.
