रोमी 11
11
इस्राएल देशका बाँकि रया मान्सन
1तबइकिलाइ म सोद्दउ, कि परमेश्वरले आफना मान्सनलाइ त्यागिराइछ ब? होइन बिलकुल होइन! क्याकि म लगइ अब्राहामको सन्तान, बेन्यामीनका कुलको एक इस्राएल देशका मान्स हु। 2परमेश्वरले पइल्ली बठेइ चुन्या आफना मान्सनलाइ त्याग्या आथिन। तमन जाँणन्छौ कि पबित्र सास्त्रमि एलिया अगमबक्ताका बारेमि कि लेख्या छन, उनले इस्राएल देशका मान्सनका बारेमि परमेश्वरसित गुनासो अर्यो। 3उनले भण्यो, “हे प्रभु, तिननले तमरा अगमबक्तालाइ मार्या छन, तमरा बेदि नास अर्यो रे म मान्तर एक मान्स हु जो जिउनो छु रे जइले अइल सम्म तममि बिश्वास अर्या छु रे तिनन मलाइ मद्द खोज्जा छन।”
4तर परमेश्वरले एलिया अगमबक्तालाइ भण्यो, “झुटा देबता बालको आराधना नअद्द्या सात हजार मान्सन मइले आफना निउति राखिराइछु।” 5तसेरि अइलका समयमि लगइ परमेश्वरको अनुग्रहका लाग्दा यिन यहुदि मान्सनको नानो भाग बिश्वासि छन जइलाइ परमेश्वरले आफ्नो सत्य मान्सनका रुपमि छान्या छ।
6यो असल काम अर्या आधारमी होइन तर अनुग्रह बठेइ परमेश्वरले तिननलाइ छान्या हो। यदि यइ काम बठेइ हो भण्या अनुग्रह आब अनुग्रह रयइन। 7तबइकिलाइ यो भण्याथ्यो:, इस्राएल देशका मान्सन परमेश्वरसित धर्मि हुन खोज्या लगइ तिनन सफल भयइन तर परमेश्वरले चुन्या मान्सन उनसित धर्मि ठहरिया। और बच्या मान्सनका हृदय परमेश्वरले कठोर बनायो रे तिननले परमेश्वरकि कुरणी सुणन अस्वीकार अर्यो। 8जसेरि पबित्र सास्त्रमि यशैया अगमबक्ताले भण्या छ: “परमेश्वरले तिननलाइ सुस्त मन दिया छ। उनले तिननलाइ नधेक्द्या आँखा रे नसुण्न्या कान दिया छ, रे आजका दिन सम्मलगइ तिनन यिसाइ छन।”
9रे राजा दाउद भण्नाहान,
“पासामी फस्या चडो अथवा खड्डाइनि पड्या गोरु जसाइ
तिनन भोजमि हुन्जया अचानक फसुन ताकि तिननले ठीक सजाय पाउन।
10तिनरा आँखा अन्धा होइजाउन ताकि तिनन धेक्द जन सकुन,
रे तिननलाइ सदाइ तिनरा समस्यामि रन्या बना।”
कलमी अर्या हाँगा
11आजी म सोद्दा छु, “कि इस्राएल देशका मान्सनले यिसो ठक्कर खायो कि कभइ उठ्ठ सकेइन?” होइन! बिलकुल होइन! तर तिनरा पापका लाग्दा गैर-यहुदि मान्सनमि मुक्ति आइरइछ, ताकि इस्राएल देशका मान्सन डाहि होउन। 12यदि इस्राएल देशका मान्सनका पापका लाग्दा गैर-यहुदि मान्सन भलाइ तिर लाग्या भण्या साच्ची तइ भण्ना भौत असल कुरणी गैर-यहुदि मान्सनकि निउति आउँन्या हो जब यहुदि मान्सन परमेश्वरमि फर्किबर आउन्याहुन।
13म तमन गैर-यहुदि मान्सनलाइ भण्ना छु। गैर-यहुदि मान्सनको छान्या शिष्य भया हुनाले म मेरा सेवकाइमि गर्व अद्दउ। 14यइ आसामि कि मेरा आफनाइ यहुदि मान्सनलाइ डाहि बनाउन सकु, ताकि तिननमि हइ कसइलाइ बचाउन सकु।
15क्याकि जब इस्राएलका मान्सनले परमेश्वरलाइ इन्कार अर्यो यो संसारकी निउति मिलापको कारण भयो, तिननले ख्रीष्टलाइ मसिहका रुपमि स्वीकार अददु एक मान्सले मृत्यु बठेइ जीवन पाया जसो हो। 16यदि मुछ्या धुलाको एक अंश पइलो-भेटिका रुपमि परमेश्वरलाइ दिया छ भण्या, पुराइ डल्लो परमेश्वरको हो। यदि जडो परमेश्वरलाइ दिया छ भण्या हाँङा लगइ परमेश्वरको हो।
17इस्राएलका मान्सन असल जैतुनको रुख जसाइ हुन, रे पुर्खा अब्राहाम, इसहाक रे याकुब तइ रुखका जडा जसाइ हुन। तर यदि कोइ हाँङा काटिया, रे तमन जंगली जैतुन भइबर तिननमि कलमी भयाछौ। यहुदि मान्सन बठेइ तमनले फाइदा पाया जसेरि जंगली जैतुनका हाङाले असल जैतुनका रुखमी कलमी भइबर तइ रुख बठेइ फाइदा पायाछौ। 18तिन काट्या हाँङामि घमण्ड जन अर। यदि घमण्ड अद्दु छ भण्या, यो याद अर, कि जडालाइ थाम्द्या तु हइनि, तर जडाले तुलाइ थामन्छ।
19आफना मनमि यो जन सोचउ कि परमेश्वरले कसइ यहुदि मान्सनलाइ रुखका टुट्या हाँङा जसेइ इन्कार अर्यो, ताकि उनले तमन गैर-यहुदि मान्सनलाइ स्वीकार अद्द सकुन, जो कलमी भया हाँङा जसाइ हुन। 20यो सत्य हो, तिनरा अविश्वासका लाग्दा हाँङा काटिया हुन। तमन तमरा बिश्वासले स्थिर छौ। तबइकिलाइ घमण्ड जन अर, तर डर माण। 21क्याकि यदि परमेश्वरले मुल हाँङामि दया अरेइन भण्या, उनले तमनमि लगइ दया अद्द्या होइन।
22तबइकिलाइ परमेश्वरको दया रे कठोरतालाइ ध्यानमि राख: पतन भयामि कडा ब्यहोरा, तर उनराइ दयामि रइरया भण्या तमनलाइ लगातार परमेश्वरको दया धेकाइन्या हो, नतित तमन लगइ काटिन्या हौ।
23रे यदि यहुदि मान्सन लगइ बिश्वास अद्द लाग्या भण्या तिनन आजी तसइ रुखमी कलमी अरिन्या हुन। क्याकि परमेश्वरले तिननलाइ आजी लगइ कलमी अद्द सक्दाहान। 24जंगली हाङाकिलाइ असल रुखको भाग हुनु स्वाभाबिक हुनइन। रे तमन गैर-यहुदि मान्सन जंगली जैतुनको रुख बठेइ काटीबर असल जैतुनका रुखमी कलमी भया हाँङा जसाइ हौ। पइलगइ तिन यहुदि मान्सन असल रुख बठेइ बड्या हाँङा जसाइ हुन, तसइ जैतुनका रुखमी जोडिनु सजी छ।
25बिश्वासि भाइन हो, म तमन गैर-यहुदि घमण्डि भया चाहानइन। तबइकिलाइ म इस्राएल देशका मान्सनलाइ कि भयो भणन्या कुरणीको रहस्य ब्याख्या अद्दया हु। इस्राएल देशका केइ मान्सन हटि भया छन, रे तिनन तब सम्म हटि हुन्या हुन जबसम्म परमेश्वरमि आउन्या तमन गैर-यहुदि मान्सनको संख्या पुरा हुनइन।
26यिसेरी सारा इस्राएल देशका मान्सनले उद्दार पाउन्या हुन, जसेरि पबित्र सास्त्रमि लेखिरइछ:
“उद्धारक यरुशलेम सहर बठेइ आउन्याहुन,
उनले याकुबका बंस बठेइ अधर्म हटाउन्या हुन।”
27“रे तिननसित मेरो करार यइ हुन्या हो,
जब म तिनरा पाप क्षमा अद्दया हु।”
28यहुदि मान्सन परमेश्वरका सत्तुर हुन, क्याकि तिनन सुसमाचारमि बिश्वास अद्द चाहान थेइन, रे तइले तमरो फाइदा भयो। तर परमेश्वरले तिननलाइ प्रेम अददाहान क्याकि उन आफइले तिननलाइ चुन्यो, जसेरि उनले तिनरा पुर्खालाइ बाचा अर्याथ्यो। 29क्याकि परमेश्वरले उपहार रे बोलावटका बारेमि आफ्नो मन कभइ बदेल्लाइन।
30क्याकि जसेरि तमन लगइ एक बेर परमेश्वरको आज्ञापालन नअद्द्या थ्या, तर आब इस्राएल देशका मान्सनका अनाज्ञाकारिताका लाग्दा तमनले कृपा पाइराइछौ। 31तमनलाइ कृपा धेकाया हुनाले इस्राएल देशका मान्सनले लगइ कृपा पाउन भणि तिनन अइल आनआज्ञाकारी होइरइछन। 32क्याकि परमेश्वरले सब मान्सनलाइ अनाज्ञाकारी हुन दिनाहान, ताकि उनले सब मान्सनलाइ दया अद्द सकुन।
33आहा! परमेश्वरको अनुग्रह भौत महान छ रे बुद्दि रे ज्ञान कति गइलो! उनरा निर्णय कसइले ब्याख्या अद्द सक्दइन, रे उनरा तरिका कसइले बुज्ज सक्दइन।
34“प्रभुका मनलाइ कसइले जाण्या आथिन
अथवा उनले अददु पड्डया कामकीलाइ बिलकुल कसइले सल्लाह दिया आथिन।”
35अथवा, कसइले लगइ परमेश्वरलाइ कभइ केइ दिया आथिन।
तबइकिलाइ परमेश्वरले तिननलाइ फिर्ता दिनु पड्डइन।
36क्याकि सब चिज परमेश्वर बठेइ आउनाहान। सब चिज उनले बनाया छन, रे सब चिज उनराइ हुन। उनले सदाइ महिमा पाउनु पणन्छ! आमेन।
Currently Selected:
रोमी 11: DTYNT
Highlight
Copy
Compare
Share
Want to have your highlights saved across all your devices? Sign up or sign in
Dotyali (डोटेली) New Testament, by The Love Fellowship is licensed under Creative Commons Attribution-ShareAlike 4.0 License.
