कलस्सी 4

ख्रीष्टिय अनुग्रह

1मालिक हो, तमरा लगइ स्वर्गमि मालिक छन भण्या जाणिबर नौकरसित न्याय रे एकनासो ब्यबहार अर।

2सतर्क होइबर धन्यबाद सहित लगातार प्रार्थना अर। 3हामरा निउति लगइ प्रार्थना अर, ताकि ख्रीष्टको त्यो रहस्य प्रचार अद्दाइलाइ परमेश्वरले हामलाइ मौका दिउन, म आब झेलमि छु क्याकि मइले यो सनदेस प्रचार अर्याथ्या। 4प्रार्थना अर, ताकि म ख्रीष्टको रहस्य सब मान्सनका अगाडी घोषणा अद्द सकु।

5तमन बिश्वासि होउ भणबर धेकाउनाइ निउति सब मौका नीकेरि प्रयोग अर, येशूमि बिश्वास नअद्द्या सित बुद्दिमानिसित ब्यबहार अर। 6नुनले स्वादिलो बनाया जसो तमरो बोलिबचन सदाइ कृपालु रे चाख लाग्दो होउ। यदि तमनले इसो अर्या भण्या, तमन जाणन्या हउ कि कसेरी तमरो बिश्वासका बारेमि प्रश्न अद्द्यालाइ जबाफ दिनु पड्या हो।

अन्तिम अबिबादन

7तुखिकसले मेरा बिसयमि सब कुरणी तमनलाइ भण्न्या छन। उ मेरो प्यारो बिश्वासि भाइ, बिश्वासयोग्य सेवक रे प्रभुमि मेरो सहकर्मी हो। 8येइ अभिप्रायले मइले तिननलाइ तमरा वाँ पठाया हु कि तमनले हामरा बिसयमि था पाउन्याछौ कि हाम कसेरी काम अददाछौ रे तइ काम बठेइ तमन बिश्वासमि बलिया होउ। 9तिननसित ओनेसिमस आउन्ना छन, तिन तमरा सहर बठेइ आया हुन, रे तिन हामरा बिश्वासि रे प्रिय भाइ हुन। याँ को सब हालखबर तिननले तमनलाइ भण्न्या हुन।

10मेरा संगि कैदी अरिस्तार्खसले तमनलाइ अबिबादन पठाया छन। बारनाबासको भान्ज मर्कुसले अबिबादन पठाया छन। तमनले मर्कुसका बिसयमि पइल्ली चिठ्ठी पाइसक्याछौ। उन तमरा वाँ आया भण्या उनलाइ स्वागत अर। 11येशू जइलाइ मान्सनले युस्तस भण्नाहान, तिनले तमनलाइ अबिबादन पठाया छन। परमेश्वरको राज्यका निउति मेरा सहकर्मी मध्ये यहुदि बिश्वासि यिन तीन जाना मान्तर हुन। यिन बठेइ मलाइ उत्साह मिल्या छ।

12तमरा सहर बठेइ आया येशू ख्रीष्टका दास इपाफ्रासले लगइ अबिबादन पठाया छन। तिन सदाइ तमनकीलाइ लगनशिल भइबर प्रार्थना अददाहान, ताकि परमेश्वरले तमनलाइ बलिया रे सिद्द बनाउन सकुन, रे तमन परमेश्वरको पुरा इच्छा पालन अद्दाछौ भणबर पक्‍का हुन सक। 13क्याकि म तिनरि निउति गवाही दिनउ, कि तमन, रे लाउडिकिया सहर रे हिरापोलिस सहरका मान्सनका निउति तिनले तमनकीलाइ लगनशिल भइबर प्रार्थना अददाहान। 14प्यारो वैध लूका रे डेमासले लगइ तमनलाइ अबिबादन पठाया छन।

15लाउडिकिया सहरका बिश्वासि भाइन रे बैनि नुम्फास रे तिनरा घर भएका मण्डलिलाइ मेरो अबिबादन भणिदिय। 16तमरा बिचमि यो चिठ्ठी पड्या पछा लाउडिकिया सहरका मण्डलिमि लगइ यो पड्ड लाया, रे मइले लाउडिकिया सहरका बिश्वासिलाइ लेख्या चिठ्ठी तमन लगइ पड्या। 17पक्‍का अर कि तमनले प्रभु बठेइ पाया सेवाको काम पुरा अर भणबर अर्खिप्पसलाइ भणिदिय।

18म पावल, यो चिठ्ठीको भाग तमनलाइ अबिबादन अददाइ आफनाइ हातले लेख्दाछु। याद अर कि म झेलमि छु रे मेरा निउति प्रार्थना अर। परमेश्वर तमन प्रति अनुग्रही होउन। आमेन।

Currently Selected:

कलस्सी 4: DTYNT

Highlight

Copy

Compare