१ थेसलोनिकि 1

1यो चिठ्ठी म पावलसित भया, सिलास रे तिमोथी बठेइ हो। हाम थेसलोनिके सहरका बिश्वासिनलाइ लेख्दाछु, जो पिता परमेश्वर रे प्रभु येशू ख्रीष्टका हुन। म प्रार्थना अद्दउ कि परमेश्वरले तमनकीलाइ अनुग्रही होउन रे तमनलाइ सान्ति दिउन।

थेसलोनिके सहरका बिश्वासीनकि निउति पावलले परमेश्वरलाइ धन्यबाद दियाको।

2हाम तमनलाइ प्रार्थनामि निरन्तर याद अददाउ, रे हाम परमेश्वरलाइ तमन सबका निउति धन्यबाद दिनाउ। 3जब हाम पिता परमेश्वरलाइ प्रार्थना अददाउ, हाम प्रभु येशू ख्रीष्टमी तमनले बिश्वासका लाग्दा अर्या काम, तमनले बिश्वासिलाइ प्रेम अर्या हुनाले सहयोग अद्दाइलाइ अर्या तमरो कडा परिश्रम, तमनले प्रभु येशू ख्रीष्टको फर्कि आउन्या आसा अर्या हुनाले सतावटमी तमरो धैर्यलाइ निरन्तर सम्झनाउ।

4बिश्वासि भाइन हो, परमेश्वरले प्रेम अर्या मान्सन, तमनलाइ परमेश्वरले आफ्ना मान्सन हुनाइलाइ चुन्या हामलाइ था छ। 5क्याकि येशू ख्रीष्टको बारेमि हामरो सुसमाचार तमरा वाँ बलिमि मान्त्तर आएन तर पबित्र आत्माको सक्तिमि रे यो सत्य हो भणबर पुरा निश्चयता सित आया छ। तमन जाणन्छौ कि तमरा फाइदाकिलाइ तमनसित छनज्या हाम कसेरी बस्याथ्या।

6तमन हामरा उदाहरण रे प्रभुका उदाहरणको अनुसरण अरन्छौ। ताँ भौत कष्ट थ्यो, तर तमनले आनन्दसित सन्देसलाइ ग्रहण अर्या, जो आनन्द पबित्र आत्मा बठेइ आउन्छ। 7रे माकेडोनिया प्रदेस रे अखैया प्रदेशमि सबबिश्वासिनका बिचमि तमन नमुना बन्या।

8क्याकि तमन बठेइ परमेश्वरको बचन केवल माकेडोनिया प्रदेस रे अखैया प्रदेशमि मान्तर प्रचार अरियाको होइन, तर हरेक ठाउ जाँ हाम जानाउ, ताँ हामले परमेश्वरमि तमरो बिश्वासका बारेमि भण्या सुणनाउ। तबइकिलाइ हामले औरलाइ तमरा बिश्वासका बारेमि केइ भण्नु आवश्यक आथिन। 9क्याकि तिन मान्सनले औरलाइ भण्नाहान कि कसेरी तमनले हामरो स्वागत अर्याथ्या, जब हाम तमरा वाँ आयाथ्या। रे जिबित रे साँचो परमेश्वरको सेवा अद्दाइ, कसेरी तमन मुर्ति बठेइ टाडा भइबर परमेश्वरतिर फर्क्या। 10रे तिननले भण्नाहान कि कसेरी तमन स्वर्ग बठेइ फर्कि आउन्या उनरा चेलो जइलाइ परमेश्वरले मर्या बठेइ जिउना बनायो, उनरोइ बाटो हेरन्छौ, अथवा येशूको, जइले हामलाइ आउन्या क्रोध बठेइ बचाउन्या हुन।

Currently Selected:

१ थेसलोनिकि 1: DTYNT

Highlight

Copy

Compare