प्रेरित 27

पावललाइ रोम सहरमि पठाया

1जब ठुला हाकिम फेस्तसले समुद्रको यात्रा बठेइ हामलाइ इटालिया प्रदेसको रोम सहरमि जानु पणन्छ भणि पक्‍का भया तब तिननले पावल रे और केइ कैदीलाइ सम्राट अगस्टसको फौजको युलियस नाउँ भया कप्तानका जिम्मा लाइदियो। 2एड्रामिटेनोस सहर बठेइ एसिया प्रदेशका भौत बन्दरगाह भइबर जान्या एक जहाजमि चडिबर हामले यात्रा सुरु अर्या। माकेडोनिया प्रदेसको थेसलोनिके सहरका अरिस्तार्खस नाउँ भया एक जानो मान्स हामसित थ्यो।

3भोलिबार हाम सिदोन सहरमि पुग्या। तइ ठाउँमि कप्तान युलियसले पावललाइ दया अरीबर तिनरा साथिनका वाँ गइबर चाइन्या कुरणी लेइबर आउन्या अनुमति दियो। 4ताँ बठेइ हामले आजी यात्रा सुरु अर्या, तर जहाजका अगाडी बठेइ बतास चल्या हुनाले हामले साइप्रस टापुको आड लिइबर गया। 5किलिकिया प्रदेस रे पामफिलिया जिल्लाको पलतिर भया समुद्रका किनारमी पुग्या पछा, हाम लुकिया प्रदेसको माइरा सहरमि आया। 6ताँ कप्तान युलियसले इटालिया प्रदेस जान्या अलेक्जेन्ड्रिया सहरको एक जहाज भेट्या, रे उनले हामलाइ तइ जहाजमि चडाइदियो। 7भौत दिन सम्म सद्दिले गइबर मुस्किलले क्नीडस गाउँमी पुग्या रे बतासले आजी अगाडी जान नदिया हुनाले हाम क्रेट टापुका आड लागीबर सालमोने भणिन्या बालुवाको रासका किनारइ-किनार होइबर गया। 8भौत असजिसित टापुका किनारइ-किनार लागीबर हाम सुन्दर बन्दरगाह भणिन्या ठाउँमि आया। ताँ बठेइ लासिया सहर नजिकै थ्यो।

9ताँ पुग्दाइलाइ भौत समय लागीगइथ्यो रे समुद्रको यात्रा लगइ खतरनाक होइरइथ्यो, रे प्रायश्चित-काजबारको दिन लगइ गइसक्या थ्यो रे यइ रितुमी समुद्रमी आदिबेरि बड्यो। तबइकिलाइ पावलले तिननलाइ यिसो भण्नाइ सम्जायो, 10“मित्तुरउ, म तमनलाइ सल्लाह दिनउ कि, हामले अइल रोक्दु पणन्छ, यदि हाम अइल जहाजमि याँ बठेइ गया भण्या यो खतरा हुन्या हो, जहाज रे यइका माल समानको मान्तर नास हुन्या होइन, तर हामरो ज्यान लगइ जान्या डर छ।” 11तर कप्तानले पावलकि कुरणी माणेइन, तर जहाज चलाउन्या रे जहाजका मालिककि कुरणी माण्यो। 12सुन्दर नाउँको बन्दरगाह हिउन काट्टाइ ननिको भया हुनाले कसइ हालतले लगइ फोनिक्स बन्दरगाहमि पुगिबर हिउन बिताउनु पणन्छ भणि भौत जसा मान्सनले ताँ बठेइ जहाज चलाउन्या सल्लाह दियो। फोनिक्स क्रेट टापुको एक बन्दरगाह हो, जो दक्षिण-पश्चिम रे उत्तर-पश्चिम तिर फर्किरइछ। तबइकिलाइ यो हिउन काट्टाइ निको ठाउँ थ्यो।

समुद्रमी ढाँइढुँइ आया

13जब दक्षिणी बतास सद्दिले चल्ल पस्यो, तिननले सोच्योकि हामरो योजना अन्सार हाम फोनिक्स बन्दरगाहमि पुगीजानाउ भणबर, तिननले अट्काइबर राख्या लङ्गर निकालिबर क्रेट टापुको किनारइ-किनार होइबर यात्रा अद्द पस्या। 14तर थोकाइ समय पछा तइ टापुतिर बठेइ ठुलो ढाँइढुँइ आयो, त्यो उत्तर-पूर्वी भणिन्या तुफान थ्यो। 15जब जहाज ढाँइढुँइका चपेटामि पड्यो, रे जहाजले ढाँइढुँइलाइ सहन सकेइन, तबइकिलाइ हामले जहाजलाइ हावा जइतिर लैजान्छ तसइतिर छाडदिया। 16क्लौडा भण्न्या एक नानो टापुका आडमि पुग्या पछा हामले मुस्किलले जहाजका पछाडी बाद्या नानो नालाइ बचाउन सक्या। 17तइ नानो नालाइ मल्तिर उठाइबर मर्मत अर्यो, जहाजलाइ तल्तिर बठेइ मल्तिर सम्म मोटा-मोटा डोरले कसबर बाद्या, रे सिरटिस भण्न्या बलौटे दलदलमि फसन्छ भण्न्या डरले तिननले पाललाइ थोकाइ तल्तिर झडाइदियो, रे जहाजलाइ हावासित बग्दाइ छाडिदियो। 18आब ढाँइढुँइले हामलाइ भौत उचाउन लोटाउन पस्यो, रे भोलिबार तिननले जहाजका मालसमान खित्त पस्या। 19तेसरा दिन तिननले आफनाइ हातले जहाज चलाउन्या सामान मिल्काइदियो। 20भौत दिन सम्म हामले घाम, तारा केइलगइ धेक्द सकेइन। तुफान लगातार चल्लार्या हुनाले छाड्डीबार हामले बच्या आसा लगइ मार्या।

21भौत दिन बठेइ हाममिहइ कसइले लगइ केइ खाया आथिन। तब पावलले तिनरा वाँ आइबर भण्यो, “मित्तुरउ, तमले मेरो सल्लाह माणिबर क्रेट टापु बठेइ जहाज नचलाउनु पड्डयाथ्यो, रे यिसो दुःख रे हानि तमनले भोग्दु पड्डया थेइन। 22आब म भण्नउ, साहस अर। तमनमि हइ कसइको ज्यान जान्या आथिन, तर जहाज चाइ नास हुन्या हो। 23क्याकि जइ परमेश्वरको म हु, रे जइको आराधना म अद्दउ, उनरा एक स्वर्गदुत बेलि रात मेरा वाँलाइ कल्लिया। 24उनले मलाइ भण्यो, ‘पावल, जन डराइ, तुइले सम्राटका अगाडी पक्का कल्लिनु पणन्छ, रे परमेश्वरले उनरा अनुग्रहका लाग्दा तुसित जहाजमि यात्रा अद्द्या जति सबइको जीवन बचाया छ।’ 25तबइकिलाइ मित्तुरउ, सहास अर, म परमेश्वरमि बिश्वास अद्दउ, मलाइ जसो बताइया छ, ठीक तसोइ हुन्या हो। 26तर हाम कसइ एक टापुमि ठोकिनु पणन्छ।”

जहाज तुट्याको

27जब चौथो रात होइरइथ्यो, रे एड्रियास भणन्या समुद्रमी हाम घचेटिन्नाथ्या, तब अधरात तिर जहाज चलाउन्या मान्सनले हाम कसइ जमिनका नजिक पुग्दाछु भण्न्या अनुमान अर्यो, 28रे तिननले पानीको गइलाइ नापिबर हेरन्ज्या तिननले सैतीस मिटर छ भणन्या पत्ता लायो, रे केइ समय पछा थोकाइ उथ गइबर नापन्ज्या तिननले अठ्ठाइस मिटर छ भणन्या पत्ता लायो। 29पानी थोकाइ भया हुनाले पखानमि ठक्‍कर लागन्छ कि भण्न्या डरले, तिननले जहाजका पछा बठेइ चार लङ्गर खिद्दियो, रे परभात होइजाउ भणि प्रार्थना अद्द पस्या। 30जब जहाज चलाउन्या मान्सन जहाज बठेइ भाग्दाइ खोज्जाथ्यो, तिननले जहाजका अगाडीका लङ्गर झडाउन्या बहाना बनाइबर नानो ना समुद्रमी खिती सक्या थ्यो, 31तब पावलले कप्तान रे सिपाइनलाइ भण्यो, “यिन जहाज चलाउन्या मान्सन भाग्या भण्या हाम कोइलगइ बच्च सक्द्या होइन।” 32तब सिपाइनले नानो नाका डोरि काटि दियो, रे नालाइ जान्दियो।

33झिसमिस्या उजालो हुन्नाथ्यो, पावलले तिनन सबलाइ खानाइ खान्या बिन्ति अर्यो। रे तिननलाइ भण्यो, “आज चौद्द दिन भइय्या, तमन चिन्ता अद्दा-अद्दाइ भोक्भोकाइ केइ नखाइबर बसिरइछौ। 34तबइकिलाइ केइ खा भणि म तमनलाइ बिन्ति अद्दउ। केइ खाया भण्या तमन तागत पाउन्या हौ, तमन कसइका मुन्टाका एक रौ लगइ नास हुन्या आथिन।” 35यिन कुरणी भण्या पछा पावलले रोटा समायो, रे सबका अगाडी परमेश्वरलाइ धन्यबाद दिइबर त्यो तोडबर खान पस्या। 36तब तिननले लगइ हौसला पाइबर केइ खानाइ खायो। 37(जहाजमि हुन्या हाम जम्माइ दुइ सय छयहत्तर जाना मान्सन थ्या।) 38तिननले अगाउन्ज्या सम्म खाया पछा, जहाजलाइ हलुको बनाउनाइ तिननले समुद्रमी सब गउँ फाल्दियो।

39उजालो भया पछा लगइ तिननले तइ ठाउँ पछेण्न सकेइन, तर तिननले एक समुद्रको किनार धेक्यो, जो बालुवाले भरिया थ्यो। तिननले सक्यो भण्या जहाजलाइ ताँइ किनार ल्याउन्या योजना अर्यो। 40तिननले लंगरका डोरि काटि दियो रे लङ्गर समुद्रमी झड्ड दियो। तसइ बेला पाललाइ बाद्या डोरि फुकाइ दियो। तइ पछा तिननले जहाजका अगाडीका पाल मल्तिर उठाइदियो रे जहाजलाइ हावाले किनारतिर लैजान दियो। 41तर पानीका तल्तिर लुक्या बालुवाका रासमि जहाज ठोकिबर ताँइ धसियो, जहाजको अगाडीको भाग अट्कियो रे चल्लइ सकेइन, पइ पछाडिको भाग छालका लहरले टुट् पस्यो।

42कैदी बाँउ काटीबर भाग्दान कि भणि सोचिबर सिपाइनले तिननलाइ माद्द्या बिचार अर्यो। 43तर कप्तानले पावललाइ बचाउन्या मन अरिबर तिननलाइ तसो अद्द बठेइ रोक्यो। तर उनले बाँउ काट्ट सक्द्या जति सबलाइ जहाज बठेइ समुद्रमी फट्टक हालिबर जमिन तिर बाँउ काट्टया आज्ञा दियो, 44रे जो बाँउ काट्ट जाण्नाइन तिननलाइ फल्यामि रे जहाजका टुट्या भाग समाइबर पारि जा भण्यो। यिसेरी तिनन सब नीकेरि किनारमी पुग्या।

Currently Selected:

प्रेरित 27: DTYNT

Highlight

Copy

Compare