प्रेरित 26

1राजा अग्रिपासले पावललाइ भण्यो, “तुलाइ आफनाइ पक्षमि बोल्लाइ अनुमति छ।” तब आफ्नो हातले इसारा अरिबर पावलले आफना बचाउमि भण्न पस्यो, 2“हे राजा अग्रिपास, यहुदि अगुवानले मलाइ लाया सब दोषका बारेमि आज हजुरका अगाडी मइले आफ्ना बचाउका बारेमि बोल्ल पायामि म आफलाइ भाग्यमानि माण्नउ। 3क्याकि यहुदि मान्सनका सब चाल-चलन रे वाद-बिबाद अद्द्या कुरणिका बारेमि हजूरलाइ नीकेरि था पाया हुनाले म आफलाइ भाग्यशाली माण्नउ, तबइकिलाइ मेरो बयान सान्ति सित सुणि दिय भणि म बिन्ति अद्दउ।”

4“म मेरा मान्सनका बिचइनि रे यरुशलेम सहरमि हुर्क्या। तबइकिलाइ यहुदि अगुवानलाइ मेरा जवानी अवस्था बठेइ मेरो जीवनका बारेमि था छ। 5मइले मेरा जवानी अवस्था बठेइ एक फरिसि मान्सकि जसेरि जीवन बितायाथ्या, जो हामरा धर्मको सब भण्ना कडा समुह थ्यो, यो तिननलाइ था भयइ कुरणी हो। तिननले चायो भण्या यइ कुरणीको गवाही दिन सक्दाहान। 6आज म परमेश्वरले हामरा पुर्खालाइ अर्या प्रतिज्ञामि मइले आसा राख्याउइले याँ दोषिका रुपमि कल्लीरइछु। 7परमेश्वरले प्रतिज्ञा अर्या कुरणी अद्द्या हुन, रे हामरा बारै कुलले यो प्रतिज्ञा पुरा अद्द्या हुन भण्न्या आसामि रातदिन परमेश्वरको आराधना अरन्थ्या, हे राजा अग्रिपास, यइ आसाका बारेमि यहुदि मान्सनले मलाइ दोस लाइराइछ। 8पइ पावलले ताँ जम्मा भया तिनन सब यहुदि मान्सनलाइ भण्यो, ‘तमन परमेश्वरले मर्या बठेइ जिउना बनाउनाहान भण्नेइ कुरणीमि बिश्वास अरन्छौ, पइलगइ उनले येशूलाइ मर्या बठेइ जिउना बनायो, भण्नेइ कुरणीलाइ तमन क्याइ इन्कार अरन्छौ?’”

9“नासरत गाउँका येशूको बिरोधमी भौत कारबाइ अद्दु पणन्छ भण्न्या म आफइलाइ लगइ बिश्वास थ्यो। 10मइले यरुशलेम सहरमि तसोइ अर्या, रे मुख्य पुजारि बठेइ अधिकार पाइबर प्रभु येशूमि बिश्वास अद्द्या भौत मान्सनलाइ झेल मान्तर हालेइन, या सम्मकि तिननलाइ मारन्ज्या तिनराइ बिरोधमी मइले मेरो सहमत लगइ दिया। 11पइ सब यहुदि सभाघरमी तिननलाइ बेर बेरि सजाय दिइबर तिनरो बिश्वास छुटाउन्या रे तिननलाइ येशूको निन्दा अद्द्या बनाउनाइ कोशिस अर्याथ्या। तिनरा बिरोधमी रिसले मात्तिबर और सहरमि लगइ मइले तिननलाइ सताया।”

12“यिसेरी मुख्य पुजारि बठेइ अधिकार रे आज्ञा पाइबर म दमस्कस सहरतिर गया। 13हे राजा अग्रिपास, छाकला मइले स्वर्ग बठेइ सुर्य भण्नालगइ उजालो ज्योति धेक्या, जो म रे मसित यात्रा अद्द्या मेरा साथिनमि चम्कियो। 14रे हाम सब जमिनमी लोट्या, तब हिब्रु भासामि मलाइ यिसो भण्न्या आवाज मइले सुण्या, ‘शाउल, शाउल, तु क्याइ मलाइ सताउनाछइ? मलाइ दु:ख दिन्या केशिस अरिबर, सुयामि लात्ती हाण्या जसेरि तु आफइलाइ दु:ख दिन्नाछइ।’”

15“पइ मइले भण्या, ‘ओ प्रभु, तम को हौ?’ प्रभुले मलाइ भण्यो, ‘म येशू हु, जइलाइ तु सताउन्नाछइ।’ 16आब उठ रे आफना खुट्टामी कल्ले, क्याकि ममि तुइले धेक्या रे मइले तुलाइ धेकाउन्या कुरणीको निउति सेवक रे गवाही निउक्त अद्द्या इच्छाले म तेरा वाँ धेका पड्या हु। 17म तुलाइ तेरा आफनाइ मान्सन रे गैर-यहुदि मान्सन बठेइ छुटकारा दिनउ, जइका वाँ म तुलाइ पठाउनउ, 18कि तुइले तिनरा आँखा खोल्दे, ताकि तिनन अनारा हइ उजाला तिर, रे सैतानको सक्ति बठेइ परमेश्वरतिर फर्किजाउन। तब परमेश्वरले तिनरा पापको क्षमा अद्दाहान रे पबित्र अरिया मान्सनसित तिननले एक ठाउँ पाउन्या हुन, क्याकि तिननले ममि बिश्वास अद्दाहान।”

19“तबइकिलाइ, हे राजा अग्रिपास, स्वर्ग बठेइ आया दर्सनलाइ मइले इन्कार अरेइन। 20तर पइल्ली दमस्कस सहरमि, पइ यरुशलेम सहरमि रे सारा यहुदिया प्रदेस भरि रन्यालाइ, रे गैर-यहुदि मान्सनलाइ लगइ पाप अद्द छाडिबर परमेश्वरतिर फर्क रे आफना पाप अद्द छाडिबर तमन परमेश्वरतिर फर्किया छौ भणि धेकाउन्या काम अर भणि मइले प्रचार अर्या। 21तबइकिलाइ यहुदि मान्सनले मलाइ मन्दिरमि समाइबर माद्दाइ खोज्यो। 22तर आजका दिन सम्म परमेश्वर बठेइ मइले सायता पाइराइछु। तबइकिलाइ नाना ठुला सबलाइ गवाही दिनोइ म कल्लिया छु। अगमबक्तानले रे मोशाको कानुन पक्‍का पुरा हुन्या हुन भण्न्या कुरणी बाहिक मइले और केइलगइ भण्या आथिन। 23तिननले भणिराइथ्यो कि ख्रीष्टले दु:ख भोग्दुइ पणन्छ, रे मर्या बठेइ जिउना हुन्या पइलो होइबर उनले यहुदि मान्सन रे गैर-यहुदि मान्सनलाइ उनरो सुसमाचार घोषणा अद्द्या हुन कि तिनन बाच्च सक्द्या हुन।”

24पावलले आफ बाँच्चाइ यिन कुरणी बोल्ला बोल्लाइ ठुला हाकिम फेस्तसले जोरले भण्यो, “ए पावल, तु बौलिया हइ, तेरा भौत ज्ञानले तुलाइ बौलारि बनाइराइछ।”

25तर पावलले भण्यो, “माननीय ठुला हाकिम फेस्तस, म बौलिया होइन, तर म सत्य छु, रे बुद्दिमानि कुरणी अद्दाछु। 26क्याकि राजा अग्रिपास आफइले यिन कुरणिका बारेमि जाणन्छौ, जइका अगाडी म नडराइबर बोल्ला छु। क्याकि यिन केइ कुरणी उन बठेइ लुक्या आथिन, क्याकि यो कुरणी गुपचुपमि अरिया होइन। 27राजा अग्रिपास, कि हजुरले अगमबक्तानमी बिश्वास अरन्छौ? म जाँण्नउ, हजुर बिश्वास अरन्छौ।”

28राजा अग्रिपासले पावललाइ भण्यो, “कि थोकाइ समय तु मलाइ ख्रीष्टियन बनाउन खोज्जाछइ?”

29पावलले जबाफ दियो, “थोकाइ बेर हौ कि भौत समय हौ, म परमेश्वरसित प्रार्थना अद्दउ कि, तमन मान्तरइ होइन तर आज मेरा कुरणी सुण्या जति सब मान्सन ख्रीष्टियन होइजाउन, तर म जसो कैदी भइबर होइन।”

30तब राजा अग्रिपास, ठुला हाकिम फेस्तस, फेस्तसकि नानि बैनि बरनिकि रे ताँ बस्या जति सब मान्सन उठबर गया। 31जब तिनन बाइर जान्नाथ्या, तब तिनन एक अर्खासित यिसो भण्नाइ कुरणी अद्द पस्या, “यइ मान्सले मृत्यु दण्ड पाउन्या अथवा कैदमी बस्स्या लायकको केइ काम अर्या आथिन।”

32राजा अग्रिपासले ठुला हाकिम फेस्तसलाइ भण्यो, “यइले उइको न्याय अददाइ सम्राटका वाँ बिन्ति नअर्या भया त यइ मान्सलाइ छाडदिया लगइ हुनेइथ्यो।”

Currently Selected:

प्रेरित 26: DTYNT

Highlight

Copy

Compare