प्रेरित 11

पत्रुसको स्पष्टिकरण

1यहुदिया जिल्लामि हुन्या येशू ख्रीष्टका छान्या शिष्या रे बिश्वासि भाइनले गैर-यहुदिले लगइ परमेश्वरको बचन स्वीकार अर्या छन भण्न्या सुण्यो। 2जब पत्रुस यरुशलेम सहरमि आया, तब खतना भया यहुदि बिश्वासीको दलले पत्रुसलाइ यिसो भण्नाइ तिनरो बारेमि वाद-बिबाद अद्द पस्या, 3“गैर-यहुदि मान्सनका घर गइबर तिननसित तमले क्याकि खानपिन अर्या?”

4तब पत्रुसले जो कुरणी कर्नेलियसका घर भयाथ्यो, तिन सब एक-एक अरिबर तिननलाइ भण्न पस्या, 5“मइले योप्पा गाउँमी प्रार्थना अरन्ज्या एक दर्सन धेक्या, स्वर्ग उगण्याको रे चारइ कुना बाद्याको एक ठुलो चद्दर जसो चिज चारइ कुना बठेइ धर्तीमि ओल्लार्या धेक्या, रे त्यो मेरा वाँ आयो। 6मइले तकिबर हेरनज्य्या तइ चद्दरमि धर्तिका सब किसिमका चार खुट्टे जनाबर, जंगली पसु, घसाणीन्या जन्तु रे अग्गासका चडा लगइ थ्या। 7मलाइ यिसो भण्न्या एक आवाज सुण्या, ‘उठ पत्रुस तिनलाइ मारिबर खा।’”

8“तर मइले भण्या, ‘कसइ रितिले हुनइन प्रभु, क्याकि मइले कभइ लगइ केइ असुद्द रे अपबित्र चिज खाया आथिन।’”

9“तर तइ आवाजले दोसर्या स्वर्ग बठेइ मलाइ भण्यो, ‘यदि म परमेश्वरले केइ खानाइ निउति स्वीकारयोग्य बनाया छु भण्या, यो खानाइ निउति स्वीकार आथिन भणबर जन भणइ।’ 10त्यो कुरणी तीन बेर सम्म भयो रे त्यो चद्दर आजी स्वर्गतिर गयो।”

11“तसइ बेला कैसरिया सहर बठेइ कर्नेलियसले मेरा वाँ पठाया तीन जाना मान्सन हाम बस्या घरमि आया। 12संका नमाणिबर तिननसित जा, भणि मलाइ पबित्र आत्माले भण्यो। यिन छ जाना भाइन लगइ मसित आयाथ्या, रे हाम कर्नेलियसका घर गया। 13उनले हामलाइ भण्यो, कि एक स्वर्गदुत उइका घर कलिबर यिसो भण्नार्या उइले सुण्यो, ‘योप्पा गाउँमी भया पत्रुस भणिन्या सिमोनलाइ बोलाउनाइ मान्सन पठा। 14उइले तुलाइ बचन सुणाउन्या हो, जइ बठेइ तु रे तेरा सब परिबारले उद्दार पाउन्या हौ।’”

15“जब म बोल्ल पस्या, जसेरि पेन्तिकोसको काजबारका दिनमि पबित्र आत्मा हाममि आया तसेरि पबित्र आत्मा तिननमि लगइ आया। 16तब प्रभुले भण्या त्यो बचन मलाइ याद आयो, ‘यूहन्नाले त पानिले बप्तिस्मा दियो, तर तमनले पबित्र आत्मामी बप्तिस्मा पाउन्या हौ।’ 17प्रभु येशू ख्रीष्टमी बिश्वास अरनज्या परमेश्वरले हामलाइ जइ बरदान दियो, तिननलाइ लगइ तेइ बरदान दिया पछा परमेश्वरलाइ रोक्द सक्द्या म को हु रे?”

18यिन कुरणी सुण्या पछा यहुदि बिश्वासि चुप रया, रे यिसो भण्नाइ तिननले परमेश्वरको महिमा अर्यो, “आब त परमेश्वरले गैर-यहुदिलाइ लगइ अनन्त जीवनका निउति पाप अद्द छाडिबर येशूतिर फर्क भण्या छ।”

एन्टिओखिया सहरमि मण्डलि

19स्तिफनसलाइ मार्या पछा, प्रभु येशूमि बिश्वास अद्द्या सब मान्सनलाइ दुख दिया हुनाले भौत मान्सन यरुशलेम सहर छाडिबर गया। तर तिननले यहुदि मान्सनलाइ मान्तर येशू ख्रीष्टका बारेमि सन्देश दिनाइ, फोनिके जिल्ला, साइप्रस टापु रे सिरिया जिल्लाको एन्टिओखिया सहर सम्म यात्रा अर्यो। 20तर तिननमि हइ कोइ-कोइ बिश्वासिन साइप्रस टापु रे कुरेनि सहरका मान्सन थ्या। तिननले एन्टिओखिया सहरमि आइबर ग्रीक भासा बोल्या यहुदिलाइ लगइ प्रभु येशूका बारेमि बचन प्रचार अर्यो। 21प्रभुको सक्तिशाली हात तिननसित थ्यो, रे भौत गैर-यहुदि मान्सनले उनरा सन्देशमि बिश्वास अर्यो रे प्रभु येशूमि बिश्वास अद्द सुरु अर्यो।

22यो रैबार यरुशलेम सहरमि भया मण्डलिका मान्सनका वाँ पुग्यो, रे तिननले बारनाबासलाइ एन्टिओखिया सहरमि पठायो। 23तिन ताँ आइबर परमेश्वरको अनुग्रह धेकिबर खुशी भया, रे तिनन सबलाइ पुरा मनले प्रभुप्रति बिश्वासि रइरनाइ उत्साह दियो। 24बारनाबास चाइ पबित्र आत्मा रे बिश्वासले भरिया मान्स थ्या। रे उनले अद्दा भौत मान्स प्रभु येशूमि बिश्वास अर्यो।

25तब बारनाबास एन्टिओखिया सहर छाडबर शाउललाइ खोज्जाइ बारनाबास टार्सस सहरमि गया। 26जब तिनले उनलाइ भेट्यो तब उनलाइ एन्टिओखिया सहर लेइबर आया, तब शाउल रे बारनाबास दुएय पुरा एक बर्ष सम्म एन्टिओखिया सहरमि भया मण्डलिका मान्सनसित तिनन संगति अद्दाइ रया, रे भौत मान्सलाइ येशू ख्रीष्टको बारेमि सिकायो। ख्रीष्टका शिष्यालाइ पइल्ली बेर एन्टिओखिया सहरमि ख्रीष्टियन भणियो।

27तसइ बेला कोइ बिश्वासि जो भबिष्यवक्तान थ्या, तिनन यरुशलेम सहर बठेइ एन्टिओखिया सहरमि आया। 28तिननमि हइ अगाबस नाउँ भया एक जाना भबिष्यवक्ता कल्लिबर सारा संसारमी ठुलो अनिकाल पड्डाइ बटिरइछ भण्न्या पबित्र आत्मा बठेइ भविष्यवाणी बोल्यो। त्यो अनिकाल सम्राट क्लौडियसको सासनकालमि पड्यो। 29तब सब शिष्याले आ-आफ्नो क्षमता अनसार यहुदिया जिल्लामि बस्या बिश्वासि भाइनलाइ सायता अद्द्या बिचार अर्यो। 30तिननले तसोइ अर्यो, रे बारनाबास रे शाउलका हात बठेइ तिननले यरुशलेम सहरमि भया मण्डलिका अगुवानलाइ रुप्प्या पठाइदियो।

Currently Selected:

प्रेरित 11: DTYNT

Highlight

Copy

Compare