प्रेरित 10

पत्रुस रे कर्नेलियस

1कैसरिया सहरमि कर्नेलियस नाउ भया एक मान्स थ्या, जो रोमी सैनिकका सुबेदार थ्या, जइका पल्टनको नाउ इटालिया थ्यो। 2जो परमेश्वरको आराधना अरन्थ्या रे तिनरा सब परिबारले परमेश्वरको डर माणन्थ्या, तिनले गरिब मान्सनलाइ भौत दान दिन्थ्या रे सदाइ परमेश्वरसित प्रार्थनामि अरिरन्थ्या। 3एक दिन, दिनका तीन बजे तिर तिनले प्रष्टसित दर्सनमि परमेश्वरका एक स्वर्गदुतलाइ आफना वाँ आउन्नारया धेक्यो रे आफलाइ, “हे कर्नेलियस” भणि बोलाया सुण्यो। 4पइ जब तिनले डिठ लाइबर तक्यो पइ तिन डराया रे कर्नेलियसले भण्यो, “प्रभु भण।” उनले तिनलाइ भण्यो, “तेरा प्रार्थना रे गरिबलाइ दिया दान सम्जनाका निउति परमेश्वरका वाँ पुग्या छन। 5आब योप्पा गाउँमी मान्सन पठा रे पत्रुस भणिन्या सिमोनलाइ बोला। 6तिन छालाको काम अद्द्या सिमोनका घर बस्या छन, जइको घर समुद्रका किनारमी छ।” 7जब तिनसित बोल्ल्या स्वर्गदुत बिदा भया तब कर्नेलियसले आफना घरका दुइ जाना नौकर रे एक जानो भक्त सिपाहिलाइ सदाइ तिनरो सेवा अददाइ बोलायो। 8रे तिननलाइ यिन सब कुरणी भण्या पछा उनले पत्रुसलाइ ल्याउनाइ योप्पा गाउँमी पठायो।

पत्रुसको दर्सन

9भोलिबार दिनको बार बजे तिर कर्नेलियसले पठाया तिनइ बैकान मान्सन योप्पा गाउँका नजिकै पुग्या, तइ बेला पत्रुस तसइ घरका छतमि प्रार्थना अद्दाइ जान्नाथ्या। 10पइ उन भौत भोकाया रे खाना खान्या इच्छा अर्यो, तर जब तिनन खानाइ बनाउनाथ्या तब पत्रुसले एक दर्सन धेक्यो। 11उनले स्वर्ग उगण्याको रे चारइ कुना बाद्या एक ठुलो चद्दर जसो चिज चारइ कुना बठेइ पृथ्बीमि ओल्लार्या धेक्यो। 12तइ चद्दरमि पृथ्बीका सब किसिमका चार खुट्टे जनाबर, जंगली पसु, घसाणीन्या जन्तु रे अग्गासका चडा लगइ थ्या। जइका बारेमि मोशाको कानुनमी भण्या छ कि तिनन असुद्द रे अपबित्र छन रे यहुदि मान्सनलाइ तइ खानाइ रोक लाया छ। 13तब उनले एक आवाज सुण्यो, “उठ पत्रुस तिनलाइ मारिबर खा।”

14तर पत्रुसले भण्यो, “कसइ रितिले हुनइन प्रभु, क्याकि मइले कभइ लगइ केइ असुद्द रे अपबित्र चिज खाया आथिन।”

15आजी दोसर्या पत्रुसले इसो आवाज सुण्यो, “यदि परमेश्वरले केइ खानाइ निउति स्वीकारयोग्य बनाया छ भण्या, यो खानाइ निउति स्वीकार आथिन भणबर जन भणइ।”

16त्यो कुरणी तीन बेर सम्म भयो रे त्यो चद्दर उतन्जेइ स्वर्गतिर गयो।

17आब आफले धेक्याको दर्सनको अर्थ कि होलो भणि पत्रुस मनमि अलमल पण्याथ्या, तसइ बेला कर्नेलियसले पठाया मान्सन सिमोनको घर खोज्जा-खोज्जाइ सिमोनका घरको ढोका अगाडी पुग्या। 18रे तिननले बोलाइबर सोध्यो, “पत्रुस भणिन्या सिमोन याँइ बस्या छन कि?”

19पत्रुसले दर्सनका बिसयमि सुच्चार्या बेलामि पबित्र आत्माले उनलाइ भण्यो, “हेर तीन जाना मान्सन तुलाइ खोज्जा छन। 20तिनन गैर-यहुदि मान्सन भया लगइ उठ रे तल्तिर ओल केइ संका नअरिबर तिननसित जा, क्याकि मइले तिननलाइ पठाया हु।”

21पत्रुस ओल्या रे तिन मान्सनका वाँ जाइबर भण्यो, “हेर जइलाइ तमन खोज्जा छौ त्यो मै हु, मलाइ खोज्या क्याइ हो? कि कामले तमन याँ आया हो?”

22तिननले भण्यो, “कर्नेलियस नाउँ भया सुबेदारले हामलाइ पठायो हो। उन असल रे परमेश्वरकि डर माणन्या मान्स हुन, रे उनले पुरा यहुदि जाति बठेइ आदर पाया छ। एक पबित्र स्वर्गदुत उनरा वाँ धेका पण्या रे तमलाइ उनरा घरमि बोलाइबर तमरा बचन सुण्न्या आज्ञा स्वर्गदुतले दिया छ। 23पइ उनले तिननलाइ भित्तर बोलाइबर सत्कार अर्यो। रे भोलिबार पत्रुस तिननसित हिट्या रे केइ योप्पा गाउँका भाइन लगइ उनसित गया।”

कर्नेलियसका घरमि पत्रुस

24भोलिबार तिनन कैसरिया सहरमि पुग्या। रे कर्नेलियसले आफना साका सन्तान रे, इष्टमित्रलाइ बोलाइबर जम्मा अर्यो रे कर्नेलियसले तिनरो बाटो हेद्दाथ्या। 25पत्रुस भित्तर आउन्तक कर्नेलियसले तिनसित भेट अर्यो रे पत्रुसका खुट्टाइनि पणिबर आराधना अर्यो। 26तर पत्रुसले इसो भणबर तिनलाइ उठायो, “कल्लिय, मेरो आराधना जन अर, म लगइ मान्स त हु।”

27तिनसित कुरणी अद्दइ भित्तर पस्या रे ताँ तिनले भौत जाना मान्सन जम्मा भया धेक्यो। 28पइ पत्रुसले तिनलाइ भण्यो, “हाम यहुदि मान्सनले एक गैर-यहुदि मान्ससित संगति अद्दु वाँ उइका वाँ जानु हामरा कानुनको बिरुद्द हो, तर कसइ मान्सनलाइ असुद्द भण्नु हुनइन भणि परमेश्वरले मलाइ धेकाइराइछ। 29तबइकिलाइ बोलाउन्ज्या म तमरा वाँ आया। तबइकिलाइ म तमनलाइ सोद्दउ कि तमनले मलाइ याँ क्याइ बोलाया हो?”

30कर्नेलियसले भण्यो, “चार दिन अगाडीकी कुरणी हो, दिनका तीन बजे म प्रार्थना अद्दाथ्या, मेरा घरमि तसइ बेला एक जानो चम्किला लत्ता लायाको मान्स मेरा अगाडी कल्लियो। 31रे भण्यो, ‘कर्नेलियस परमेश्वरले तेरो प्रार्थना सुण्या छ, रे तुइले गरिबलाइ दिया दानको सम्जना होइरइछ। 32तबइकिलाइ योप्पा गाउँमी मान्सन पठा रे पत्रुस भणिन्या सिमोनलाइ याँ बोला, उन समुद्रका किनारमी छालाको काम अद्द्या एक जना सिमोनका घरमि बस्या छन। जब तिन आउन्याहुन रे तिनले सन्देश भण्न्या छन।’ 33तबइकिलाइ उतनजेइ तमरा वाँ मान्सन पठाया हु, रे तम दया अरिबर अरिदिया, आब प्रभु बठेइ तमलाइ आज्ञा भया सब कुरणी सुण्नाइ हाम सब याँ परमेश्वरका अगाडी जम्मा भयाछौ।”

34तब पत्रुसले भण्न पस्या, “साँच्चि म जाण्नउ, परमेश्वर कसइको पक्षपात अद्दाइन। 35तर हरेक जातिमी जइले परमेश्वरको डर माणन्छ रे धार्मिकताको काम अरन्छ, परमेश्वरले तिननलाइ स्वीकार अददाहान। 36तमन त्यो सन्देश जाणन्छौ, जो परमेश्वरले हाम अर्थात्‌ इस्राएल देशका मान्सनलाइ पठायो। उनले सान्तिका बारेमि सुसमाचार सुणायो, जो येशू ख्रीष्टमी बिश्वास अद्द्या मान्सनलाइ मिलन्छ। उन मान्तर सब मान्सनका प्रभु हुन। 37तमनलाइ थाइछ, यूहन्नाले प्रचार अर्याको बप्तिस्मा पछा त्यो बचन गालील जिल्ला बठेइ सुरु अरिबर सारा यहुदिया जिल्ला भरि प्रचार भयो। 38अर्थात नासरत गाउँका येशूलाइ परमेश्वरले पबित्र आत्मा रे सक्तिले अभिषेक अर्यो, उन भलाइका काम अद्दाइ रे सैतान लाग्या मान्सनलाइ निको पाड्डाइ सबतिर घुम्या, क्याकि परमेश्वर उनसित थ्या।”

39“उनले यहुदिया देस रे यरुशलेम सहरमि अर्या तिन सब कामका गवाही हाम छु, यरुशलेम सहरमि यहुदि अगुवानले उनलाइ क्रुसमि टाङबर मार्या हो। 40तर उनलाइ परमेश्वरले तेसरा दिन मर्या बठेइ जिउना बनायो रे उनलाइ मान्सनले धेक्यो। 41सब मान्सनले त उनलाइ धेकेइन तर हाम जइलाइ परमेश्वरले गवाहिकी निउति पइल्ली बठेइ छान्यो, रे उन मर्या बठेइ जिउना भया पछा हामले उनसित खाया रे पिया। 42उनले हामलाइ सब मान्सनलाइ सुसमाचार प्रचार अद्दाइ रे परमेश्वरले येशूलाइ जिउना रे मर्या मान्सनको न्याय अद्दाइ नियुक्त अर्या छन, भणि गवाही दिनाइ आज्ञा दियो। 43सब अगमबक्तानले उनराइ बारेमि गवाही दिनाहान कि उनलाइ बिश्वास अद्द्या हरेकले ख्रीष्टले क्रुसमि अर्या कुरणिका लाग्दा पापको क्षमा पाउन्छ।”

44पत्रुसले यिन बचन बोल्ला बोल्लाइ पबित्र आत्मा बचन सुण्न्या सब मान्सनमि आया। 45गैर-यहुदिमि लगइ पबित्र आत्मा आया भणबर पत्रुससित आया खतना अर्या यहुदि बिश्वासीनले अचम्म माण्यो। 46क्याकि तिननले फरक फरक भासामि बोल्लार्या रे परमेश्वरको प्रसंसा अद्दार्या उननले सुण्यो। तब पत्रुसले जबाफ दियो, 47“जइले हामले जसो परमेश्वर बठेइ पबित्र आत्मा पाया छन, आब यिननलाइ पानिमि बप्तिस्मा लिनाइलाइ कसइले लगइ रोक्द सक्दइन।” 48पत्रुसले तिननलाइ प्रभु येशू ख्रीष्टको नाउँमि बप्तिस्मा दिय भणि आज्ञा दियो। तब तिननले पत्रुसलाइ केइ दिन ताइ रनदिय भणि बिन्ति अर्यो।

Currently Selected:

प्रेरित 10: DTYNT

Highlight

Copy

Compare