SAKARIA 2
2
Pengenehenen kerna tinali sibar-sibar
1I bas pengenehenen si deban kuidah sekalak dilaki njemak tinali sibar-sibar. 2“Ku ja kam e?” ningku man bana.
“Ku Jerusalem, lako nibarisa, ntah kasa kai belangna ras gedangna,” nina ngaloi.
3Kenca bage kuidah reh malekat si pernah ngerana ras aku e, jenari reh ka malekat si deban njumpaisa. 4Nina malekat si pemena ndai man si sada nari, “To kiamken, janah kataken man anak perana si njemak tinali sibar-sibar ah maka nandangi nterem kal denggo jelma ras asuh-asuhen i Jerusalem seh maka lanai siat adi ibahan tembokna. 5TUHAN enggo erpadan maka Ia jine kap jadi tembok api sekelewet kuta e lako engkawalisa, dingen i je me Ia ringan alu dem kemulian.”
Kalak buangen idilo gelah mulih
6-7Ikataken TUHAN man bangsaNa, “Enggo Kukerapken kam ku japa pe. Tapi genduari, o kalak buangen, lompatlah i Babilon nari, janah mulihlah ku Jerusalem. 8Ise si mekpek kam, anak matangKu jine kap si ipekpekna e.”
E maka TUHAN si Mada Kuasa nuruh aku nehken berita enda man bangsa-bangsa si enggo ngerampasi bangsaNa nina, 9“TUHAN jine kap si ngelawan kam kerina, janah bangsa si enggo pernah jadi suruh-suruhenndu ngerampasi kam me pagi.”
Kenca jadi pagi si enda, kerina pagi kalak meteh maka TUHAN si Mada Kuasa kap si nuruh aku.
10Nina TUHAN, “Rendelah alu meriah, o kalak Jerusalem! Reh nge Aku ringan i tengah-tengahndu!”
11I bas paksa e pagi melala bangsa reh ndahi TUHAN janah jadi bangsaNa. Ringan me Ia i tengah-tengahndu. 12Sekali nari Juda jadi pusaka TUHAN i bas tanehNa si badia e, janah Jerusalem me kuta si kelengna kal ateNa.
13Siniklah i adep-adepen TUHAN o kerina jelma, sabap enggo berkat Ia i bas inganNa si badia nari.
Currently Selected:
SAKARIA 2: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
