SAKARIA 1
1
TUHAN ndilo bangsaNa gelah mulih ku Ia
1I bas bulan pewaluhken, tahun peduaken kenca Darius jadi raja Persia, reh kata TUHAN man Nabi Sakaria anak Berekia, kempu Iddo. #Esa 4:24–5:1; 6:14 2TUHAN si Mada Kuasa nuruh Sakaria ngatakenca man bangsa e nina, “Aku, TUHAN, nembeh kal ateKu kempak nini-ninindu, 3tapi genduari Kukataken man bandu: Mulihlah ku Aku, maka Aku mulih ku Kam. 4Ola kam bagi nini-ninindu nai. I bas paksa si nai-nai nabi-nabi nehken katangKu man bana, gelah itadingkenna kejahaten ras dosa-dosana. Tapi la ia nggit megiken ras ngikutken Aku. 5Nini-ninindu ras nabi-nabi e lanai nggeluh genduari. 6Arah nabi-nabi suruh-suruhenKu Kubereken man nini-ninindu perentah ras kata pertenget, tapi la diatena. Erkiteken si e dat kiniseran ia. Kenca bage jera ia janah iakuina maka Aku, TUHAN si Mada Kuasa enggo ngukum ia sue ras perbahanenna, bagi si enggo Kutetapken i bas ukurKu.”
Pengenehenen nabi kerna piga-piga kuda
7I bas tahun peduaken kenca Darius jadi raja, i bas wari dua puluh empat, bulan si pesepuluh sadaken (e me bulan Sebat), reh kata TUHAN man bangku arah pengenehenen. 8Kuidah malekat TUHAN ngersak kuda si megara. Ngadi ia i teruh batang kayu i bas sada baluren, janah arah pudina lit piga-piga kuda si deban, rupana megara, mekambing, ras mbulan. #Ket 6:2,4 9Kusungkun malekat e, ningku, “Kai ertina si e, Tuan?”
Erjabap ia nina, “Banci kuturiken man bandu kai ertina. 10TUHAN nuruh kuda e kerina niar-niar doni enda.”
11Kenca bage iturikenna man malekat e nina, “Enggo isiar kami doni enda, janah idah kami kerina doni enda teneng dingen dame.”
12Kenca bage nina malekat ndai, “O TUHAN si Mada Kuasa, enggo nembeh ateNdu man Jerusalem ras kuta-kuta Juda pitu puluh tahun dekahna. Kasa kai nari dekahna maka icidahkenNdu perkuah ateNdu man bana?”
13Ialoi TUHAN malekat ndai alu kata-kata pengapul si melias, 14jenari isuruh malekat e aku ermomo kerna kai si ikataken TUHAN si Mada Kuasa e; nina TUHAN, “Mbelin kal kekelengenKu man Jerusalem, dingen katangKu si badia e tetap lit i bas ukurKu. 15Tapi nandangi bangsa-bangsa si nggeluh ersenang-senang nembeh ateKu, sabap tupung Kuamper rawangKu man bangsangKu, reh ka ia ngurupi nambahi kiniseran bangsangKu e. 16Dage genduari enggo mulih Aku ku Jerusalem encidahken perkuah ateKu man kuta e. Rumahku ipajekken pagi mulihi, dingen kuta e ipanteki ka.”
17Isuruh malekat ndai ka pe aku ngatakenca bagenda, “Ikataken TUHAN si Mada Kuasa maka kerina kuta-kuta e senang ka pagi akapna mulihi, janah isampatiNa pagi sekali nari Jerusalem dingen ikatakenNa maka kuta e me kuta si kelengna kal atena.”
Pengenehenen kerna tanduk
18I bas pengenehenen si deban kuidah empat tanduk. 19Kusungkuni malekat si pernah ngerana ras aku e ningku, “Kai ertina tanduk e?”
Ngaloi ia nina, “Tanduk e nggambarken bangsa-bangsa doni si enggo engkerapken kalak Juda, Israel, ras Jerusalem.”
20Kenca bage icidahken TUHAN man bangku empat kalak pande besi. 21Nungkun aku, “Kai ate kalak enda maka ia reh?”
Ngaloi TUHAN nina, “Kalak enda reh lako pebiar-biar ras ngeruntuhken bangsa-bangsa si ngeradasken negeri Juda dingen engkerapken pendudukna.”
Currently Selected:
SAKARIA 1: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
