SAKARIA 12
12
Kuta Jerusalem ipulahi denggo
1Enda me kata TUHAN kerna Israel, TUHAN si ngkimbangken langit, si nepa doni, dingen mereken kegeluhen man manusia. Nina, 2“Kubahan Jerusalem desken segelas anggur; bangsa-bangsa sekelewetna nginemsa, jenari minter mbewat-mbewat desken kalak mabuk. Janah kenca ikepungna Jerusalem, kuta-kuta Juda si debanna pe ikepung ka. 3Tapi adi enggo seh pagi paksana Kubahan Jerusalem desken batu si mberat; kasa bangsa si ncubakenca ngangkat batu e la banci lang suin. Kerina bangsa-bangsa doni mpersada gegehna merangi kuta e. 4I bas paksa e pagi Kugunjak kerina kudana maka sengget, janah adon kerina si ngersaksa. Kuperdiateken kalak Juda, tapi kuda musuh-musuhna Kupentangken. 5Kenca bage terpuk-terpuk suku Juda ngerana i bas ukurna nina, ‘TUHAN Dibata si Mada Kuasa mereken gegeh man bangsaNa si ringan i Jerusalem.’
6I bas paksa e pagi terpuk-terpuk Juda Kubahan desken api i bas kerangen tah pe i tengah juma gandum si enggo tasak – ikernepkenna me kerina bangsa-bangsa si lit i sekelewetna. Penduduk Jerusalem tetap ringan mejuah-juah i bas kuta e.
7Aku, TUHAN, leben mereken kemenangen man Juda, gelah kehamaten si ialoken kesusuren Daud ras kalak si ringan i Jerusalem ola belinen asangken suku Juda si debanna. 8I bas paksa e ikawali TUHAN kerina kalak si ringan i Jerusalem, e maka kalak si la megegehna pe bali pagi gegehna ras Daud nai. Kesusuren Daud minpin ia desken malekat TUHAN, bali ras Dibata jine. 9I bas paksa e pagi Kukernepken bangsa si ncubaken merangi Jerusalem.
10Kesusuren Daud ras kalak Jerusalem si debanna Kudemi alu kesah perkuah ate ras kesah kininggiten ertoto. Itatapna kalak si enggo itebakna, e maka ngandung ia ngidahsa bali ras pengandungi kalak anakna si tonggal. Tangis ia alu dem ceda ate bagi kalak si nangisi kematen anakna sintua. #Joh 19:37; Ket 1:7 #Mat 24:20; Ket 1:7 11Tupung paksa e pagi sora ngandung i Jerusalem bali gangna ras sora ngandung tupung nangisi Hadad-Rimon i bas kendit Megiddo. 12-14Tep-tep keluarga i bas negeri e erceda ate alu serap-serap: keluarga kesusuren Daud, keluarga kesusuren Natan, keluarga kesusuren Lewi, keluarga kesusuren Simei, bage pe kerina keluarga-keluarga si deban. Tep-tep keluarga erceda ate alu serap-serap, janah i bas tep-tep keluarga si erceda ate serap dilaki ras diberu.”
Currently Selected:
SAKARIA 12: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
