SAKARIA 11
11
Raja si la bujur idabuhken
1Talangilah pintunndu, o Libanon, maka ipan api kayu asisndu.
2Tangis ras ngandunglah, o kayu eru,
sabap kayu-kayu asis si mbelin e enggo ikernepken.
Tangis ras ngandunglah, o kayu jati Basan,
sabap kerangen tua e enggo radas.
3Peminpin-peminpin nderkuh kerina,
sabap enggo bene kemulianna.
Begikenlah sora singa erdengum,
sabap kerangen tua si jadi inganna.
Si lit segedang-gedang Lau Jordan, enggo ikernepken.
Dua permakan
4Bagenda nina TUHAN Dibatangku, “Pekulah-kulahlah bandu jadi sekalak permakan nandangi sada rarasen biri-biri si nandangi igeleh. 5Empuna munuhi biri-birina tapi la ia iukum. Idayakenna dagingna janah nina, ‘Pujilah TUHAN! Kita enggo bayak!’ Subuk permakanna pe la erkuah ate man biri-biri e.”
(6Nina TUHAN, “Ise pe lanai ateKu mekuah i doni. Aku jine me si namaken manusia ku teruh kuasa raja-rajana. Raja-raja ngeradasken doni, janah la Kukelini doni i bas kuasana nari.”)
7Perbinaga biri-biri e ngupahi aku, jenari aku enggo jadi permakan biri-biri si nandangi igeleh e. Kubuat dua ciken, sada kugelari ciken “Ngena ate” dingen sada nari “Persadan”. E maka kuarak-arak me biri-biri e. 8La aku sabar ngidah permakan si deban si telu nari si ersegat ate man bangKu, e maka Kubenterken ia kerina i bas sada bulan saja. 9Kenca bage kukataken man rarasen biri-biri e, “Aku lanai jadi permakanndu. Si mate atena, matelah; si bene, benelah. Si tading denga sibunuh-bunuhen ia sapih-sapih ia.” 10Kenca bage kubuat ciken si gelarna “Ngena ate” ndai jenari kupenggelken. Alu bage isasapken me perpadanen si enggo ibahan TUHAN ras kerina bangsa-bangsa. 11Dage perpadanen e enggo isasapken i bas wari e. Perbinaga biri-biri e mperdiateken aku, janah ietehna maka TUHAN enggo ngerana arah kai si enggo kulakoken. 12Ningku man bana, “Adi nggit kam, berekenlah upahku. Tapi adi la kam nggit, la padah.” E maka igalarina upahku telu puluh duit pirak. #Mat 26:15 #Mat 27:9-10
13Nina TUHAN man bangku, “Tamaken duit e ku bas peti perbendaharan Rumah Pertoton.” E maka kubuat duit pirak si telu puluh upah si iakapna enggo seh kal galangna adi man bangku, jenari kutamaken ku bas peti perbendaharaan Rumah Pertoton. 14Kenca bage kupenggelken ciken si peduaken, e me ciken “Persadan,” e maka persadan Juda ras Israel enggo peltep.
15Kenca bage nina TUHAN man bangku, “Pekulah-kulah bandu sekali nari jadi permakan si la terpake. 16Enggo Kusuruh sekalak permakan mpermakani rarasenku, tapi la isampatina biri-biri si nandangi mate. Biri-biri si bene pe la idaramina, si luka la itambarina, janah si la kena kai pe la iberena gagaten. Tapi daging biri-biri si mbur ipanganina, janah cekilina icaingkenna. 17Cilaka me permakan si la terpake e! Sabap enggo itadingkenna rarasenna. Nandangi ikernepken perang me kuasana. Tanna enggo mate, janah matana si kemuhen enggo pentang.”
Currently Selected:
SAKARIA 11: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
