ENDE-ENDEN SALOMO 8
8
1Adi turangku sada nande sada bapa min ndai kam,
si pernah pepinemken i bas pola nandengku,
kuemai kam adi kita jumpa i tengah dalan,
janah la lit si emperdiatekenca.
2Kurumah nandengku kam kubaba,
maka banci iajarindu aku kerna ate keleng.
Kubereken man bandu anggur campur rempah,
lau buah delima man inemenndu.
3Tanndu si kawes natang takalku,
tanndu si kemuhun napu-napu aku.
4O diberu-diberu Jerusalem erpadanlah kam,
maka la atendu ngganggu kami si sangana singenan.
Ende-enden si peenemken
Diberu-diberu
5Ise si reh i bas gurun pasir ah nari?
Sicikepen tan ia ras impalna.
Diberu
I teruh batang apel kuingeti kam
i je kap inganndu tubuh ndube.
6Ola talangi pusuhndu man ise pe
seakatan man bangku ngenca.
Ise pe ola cikepndu seakatan aku,
ngena ate seri gegehna ras kematen,
mecimberu bali rawana ras doni kematen.
Apina ndilat-ndilat desken dilah api,
gurlah desken api si gara.
7Api si bage la ternimpeti alu lau,
banjir pe la ngasup nggedapkenca.
Tapi adi lit kalak si ncubaken
nukur keleng ate alu kebayakenna,
kinilingen saja nge si ialokenna.
Turang diberu ndai
8Lit turang kami
kitik denga polana
Kai nge ndia si ibahan kami,
kune lit kalak si nungkuni ia?
9Bicara tembok kuta min ndai ia,
ibahan kami i babona menara pirak.
Bicara pintu gerbang min ndai ia,
ibide kami ia alu kayu cemara.
Diberu
10Aku kap tembok,
janah polangku kap menarana.
Ieteh impalku nge
maka adi ras ia dat aku kepuasen ras dame.
Dilaki
11Lit sada peken anggur Salomo
i bas sada ingan, Baal-Hamon gelarna.
Piga-piga kalak perjuma
newai peken anggur e i bas ia nari,
tep-tep kalak nggalar seribu duit pirak.
12Aminna pe Salomo reh alu duitna si meribu-ribu
janah si erdahin i bas jumana iupahi dua ratus duit,
la diateku pe e; sabap lit kap peken anggurku jine.
13O impal, pedengkehken maka kubegi sorandu i bas peken nari,
temanku enggo sikap megiken kam ngerana.
Diberu
14Mari impalku, pedas kam reh, kiamken bagi belkih
tah pe bagi belkih si nguda denga kiamken arah babo deleng-deleng ingan turah rempah-rempah.
Currently Selected:
ENDE-ENDEN SALOMO 8: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
