ENDE-ENDEN SALOMO 7
7
Dilaki
1Impalku, seh kal kam mberuna,
perdalanndu seh kal jilena tupung kam erselop.
Percengkung pahandu desken sada perhiasen,
bekas bahenen sekalak tukang si beluh.
2Pusungndu desken mangkuk si mejile,
katawari pe dem alu anggur si icampur ras rempah-rempah.
Awakndu bali ras sada raden
ikeleweti bunga-bunga encole.
3Polandu bali ras dua belkih,
bali ras balua si rindu dua.
4Kerahungndu desken menara gading,
matandu desken telagah i kuta Hesbon,
deherken pintu gerbang kuta si mbelin e.
Igungndu mejile seri ras menara i Libanon,
si pajek engkawali kuta Damaskus.
5Takalndu meganjang desken uruk Karmel
bukndu si idandan erndilap desken sutra alus.
Perban jilena
raja pe leket matana ngenenca.
6Mejile kal kam, seh kal mberuna
kam si ikelengi i bas kerina si ate ngena.
7Potongen dagingndu desken batang kurma
polandu seri ras tandan buah kurma.
8Kunangkihi ateku batang kurma e,
jenari kuputikken ateku tandanna.
Polandu desken sengkerangke buah anggur
kesahndu merim bagi bau buah apel,
9biberndu entebu desken buah anggur!
Diberu
Maler min man impalku lau anggur,
maler ku bas biber ras ipenna.
10Impalku kap si empuna aku,
aku kapen sura-surana.
11Ota impal, lawes kita ku mbalmbal,
jenari erberngi kita i tengah rudang-rudang.
12Lampas kita medak, gelah sinehen batang anggurta
ntah mawen enggo reh tunasna,
ntah mawen enggo terlak bungana,
ntah mawen batang galiman enggo erbunga.
I je kubereken keleng ateku man bandu impalku.
13Kayu si merim uratna,
buah si entebu nanamna lit deherken pintunta.
O impal enggo kusikapken man bandu,
subuk si enggo ndekah bage pe si mbaru denga iputikken.
Currently Selected:
ENDE-ENDEN SALOMO 7: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
