ROMA 8

Nggeluh rikutken aturen Kesah Dibata

1Tapi genduari ukumen lanai perlu idalani kalak si lit i bas persadan ras Kristus Jesus. 2Kesah, si biakna kin mereken kegeluhen man kalak si lit i bas persadan ras Kristus Jesus, enggo mulahi kam i bas biak dosa ras kematen nari. 3Kai si la ngasup Undang-undang erbahanca erkiteken biak kula manusia kote, enggo ibahan Dibata. Enggo iukum Dibata dosa si rurat i bas biak kula manusia alu nuruh AnakNa jine si reh bagi rupa manusia si erdosa guna naluken dosa. 4Si enda ibahan Dibata gelah kita, si lanai nggeluh rikutken sura-sura ukur manusia tapi rikutken Kesah, banci ndalanken perentah si mehuli si lit i bas Undang-undang e. 5Sabap kalak si nggeluh rikutken sura-sura ukur manusia, pusuhna ikuasai sura-sura e. Kalak si nggeluh rikutken sura-sura Kesah, pusuhna ikuasai sura-sura Kesah. 6Adi kalak si pusuhna ikuasai sura-sura ukurna mate kap; tapi adi kalak si pusuhna ikuasai Kesah Dibata nggeluh me ia dingen malem atena. 7Pusuh si ikuasai sura-sura ukur manusia ermusuhen kap ras Dibata; sabap pusuh si bage la ngikutken Undang-undang Dibata, janah la kin ngasup pe ngikutken Undang-undang e. 8Kalak si nggeluh rikutken sura-sura ukur manusia la banci ngena ate Dibata ibahanna.

9Kam labo nggeluh rikutken sura-sura ukur manusia, tapi kam nggeluh rikutken sura-sura Kesah adi tuhu kin Kesah Dibata ringan i bas kam. Kalak si la lit Kesah Kristus i bas ia, la ia sikerajangen Kristus. 10Tapi adi Kristus ringan i bas kam, maka amin arus gia kulandu mate erkiteken dosa, tendindu nggeluh kap erkiteken Dibata enggo ngerembakken kam kempak diriNa. 11Adi Kesah Dibata si enggo mpekeke Jesus i bas si mate nari ringan i bas kam, maka Dibata si enggo mpekeke Kristus i bas si mate nari e la banci lang mereken geluh si mbaru man kulandu si arus mate e, arah KesahNa si ringan i bas kam e. #1Kor 3:16

12Dage o senina-senina, tuhu rutang kita; tapi labo guna nggeluh rikutken sura-sura ukur manusia. 13Sabap adi nggeluh kam rikutken sura-sura ukur manusia, kempak kematen kap perlawesndu. Tapi adi ibunuhndu perbahanen-perbahanen biak kulandu alu Kesah Dibata, maka nggeluh me kam. 14Kasa kai kalak si itegu-tegu Kesah Dibata, anak-anak Dibata kap. 15Sabap Kesah si ibereken Dibata man bandu labo erbahanca kam jadi budak mulihken, seh maka kam mbiar rusur, tapi Kesah e erbahanca kam jadi anak-anak Dibata, janah erkiteken si e banci kita ngerana man Dibata, “O Bapa! O Bapa kami!” #Mrk 14:36; Gal 4:6 #Gal 4:5-7 16Kesah Dibata ikut ersaksi ras tendinta ngataken maka kita anak-anak Dibata kap. 17Dage adi kita anak-anak Dibata tentu sialoken nge kai si enggo isikapken Dibata guna anak-anakNa. Janah kita pe ikut dat bagin i bas kai si enggo isikapken Dibata man Kristus e; sabap adi dat bagin kita i bas kiniseranNa, dat bagin ka me pe kita i bas kemulianNa.

Pengarapen anak-anak Dibata

18Rikutken perkiranku maka kiniseran si inanami kita genduari labo kai kal pe e adi ibandingken ras kemalemen ate si pagin ipetangkas Dibata man banta. 19Kerina si enggo ijadiken Dibata tertima-tima alu ate metedeh ndigan Dibata mpetangkas kemulian anak-anakna. 20Sabap kerina si ijadiken Dibata e enggo lanai erguna, labo erkiteken sura-surana jine, tapi erkiteken bage me sura-sura Dibata. Amin bage gia lit arapen. #Kej 3:17-19 21Sabap i bas sada wari pagi ibebasken Dibata me kerina si enggo ijadikenNa e i bas perbudaken si erbahanca ia kernep, gelah ia merdeka janah ngenanami kebebasen dingen kemulian ras kerina anak-anak Dibata. 22Sabap ieteh maka seh paksa si genduari enda kerina si enggo ijadiken Dibata kelsehen ras-ras dingen seh kal akapna suina desken sekalak pernanden si nandangi mupus. 23Janah labo e saja, tapi kita pe si enggo ngaloken Kesah selaku jaminen i bas pemere-pemere Dibata si nandangi iberekenNa man banta, kelsehen nge nimai Dibata ndungi pengangkatenta jadi anak-anakNa, e me nebusi badanta. #2Kor 5:2-4 24Sabap alu erpengarapen nge maka kita enggo ikelini; tapi adi enggo iidah kai si iarapken lanai bo e pengarapen. Sabap ise kin ngarapken kai si enggo idahna? 25Tapi adi erpengarapen kita nandangi kai si langa idah, sitimai e alu saber.

26Bage me pe Kesah Dibata reh nampati kita, kita si kote enda. Sabap la sieteh kuga arusna kita ertoto; Kesah e me ertoto kerna kita man Dibata alu kelsehen si la terbelasken. 27Dibata si ngidah pusuh peraten manusia, meteh kai sura-sura Kesah; sabap Kesah e mindo man Dibata guna anak-anak Dibata, janah sue ras peraten Dibata.

28Sieteh maka i bas kai pe Dibata erdahin guna kiniulin man kalak si erkeleng ate man baNa, e me kalak si enggo ipilih Dibata arah sura-suraNa. 29Kalak si enggo itandai Dibata arah lebe nai, enggo itetapkenNa gelah bali ras tempas AnakNa, Jesus Kristus, gelah Anak e jadi sintua i tengah-tengah seninana si nterem. 30E maka enggo ipilih Dibata kalak si enggo itetapkenNa e; kalak si enggo ipilihNa e enggo iperembakNa ras diriNa; janah kalak si enggo iperembakNa ras diriNa e enggo ipermuliakenNa.

Arah Jesus Kristus teridah keleng ate Dibata man banta

31Adi bage, kuga dage ninta kerna si enda kerina? Adi Dibata temanta, ise kin ngasup ngelawan kita? 32AnakNa kal pe la itahanNa, tapi iendeskenNa AnakNa e man gunanta kerina. Adi AnakNa kal pe iberekenNa man banta, tentu iberekenNa nge kai pe man banta radu ras AnakNa e. 33Ise kin pang ngaduken kalak si enggo ipilih Dibata? Dibata jine mutuskenca maka ia la ersalah! 34Dage ise banci ngukumsa? Kristus Jesus nge ngenca! Tapi IA jine enggo mate guna kita, enggo nggeluh mulihi, janah enggo merentah ras Dibata guna kita! Kristus Jesus pagi jadi pembelanta i lebe-lebe Dibata. 35Ise kin ngasup nirangken kita i bas keleng ate Kristus nari? Banci kin kiniseran nirangkenca, ntah kepiceten, penganiayan, kurang pangan tah uis, ancamen, ntah kematen? 36Bagi lit tersurat i bas Pustaka Si Badia,

“Erkite-kiteken Kam me maka gedang-gedang wari kami ibunuhi kalak.

Bali kami iakapna ras biri-biri si nandangi igeleh.” #Msm 44:23

37Tapi i bas si enda kerina tuhu-tuhu kita lebihen asa kalak si permenang erkiteken Kristus si erkeleng ate man banta. 38Sabap aku enggo tek maka la lit kai pe si ngasup nirangken kita ras keleng ate Kristus: subuk kematen tah kegeluhen, subuk malekat-malekat, penguasa-penguasa ras kuasa-kuasa i langit, subuk kai si jadi genduari bage pe kai si jadi pagin. 39Subuk kai pe si i babo doni tah si i teruh doni, la lit kai pe i bas kerina si enggo ijadiken Dibata si ngasup nirangken kita ras keleng ate Dibata, e me keleng ate si cidahkenNa i bas Kristus Jesus Tuhanta.

Currently Selected:

ROMA 8: BTX

Highlight

Copy