ROMA 7

Bebas i bas Undang-undang nari erkiteken kematen Kristus

1O senina-seninangku kalak Jahudi, kuakap iangkandu nge kai si nandangi kukataken enda, terlebih-lebih kam si meteh Undang-undang. Kukataken man bandu, maka undang-undang erkuasa nandangi sekalak jelma asa dekah geluhna ngenca. 2Sekalak ndehara umpamana, lit i teruh undang-undang perjabun asa umur geluh perbulangenna ngenca. Tapi adi mate perbulangenna e, ia lanai teriket man undang-undang perjabun ras perbulangenna e. 3Dage adi erjabu ia ras dilaki si deban asum nggeluh denga perbulangenna e, ia igelari erlua-lua. Tapi adi mate perbulangenna e, ia enggo bebas i bas undang-undang perjabun nari, janah labo ia icap perlua-lua aminna pe ia erjabu ras dilaki si deban. 4Bage me pe kam o senina-seninangku, adi inehen arah dampar hubungenndu ras undang-undang, kam enggo mate, erkiteken kam enggo ersada ras kula Kristus. Janah genduari kam enggo banci “erjabu” ras kalak si deban, si enggo ipekeke i bas si mate nari, gelah banci sibahan si mehuli man Dibata. 5Sabap asum nai kita nggeluh denga rikutken biakta si dekah, kerincuhenta erbahan dosa si ipekeke undang-undang e, erdahin i bas ringringta. Si enda mabai kita ku kematen. 6Tapi genduari kita enggo bebas i bas Undang-undang e nari, sabap adi inehen arah segi hubungenta ras Undang-undang si mpenjaraken kita e kita enggo mate. Erkiteken si e pendahinta man Dibata lanai bo sidalanken alu perukuren si dekah, e me erpalasken kepatuhen nandangi aturen-aturen si tersurat saja nge ngenca, tapi dahin Dibata e si dalanken alu sikap si mbaru, e me kap alu pusuh si ersuruh.

Dosa reh arah Undang-undang

7Dage kuga ninta? Undang-undang e kin dosa? Tentu lang! Tapi adi la lit Undang-undang labo aku ngerti kerna dosa. Umpamana, labo kueteh kai ermengga ate adi la ikataken Undang-undang, “Ola ermengga ate!” #Kel 20:17; Ul 5:21 8Arah perentah si e dosa ndat kesempaten peturah erbage-bage mengga ate i bas diringku. Adi la lit Undang-undang, dosa bagi barang mate kap. 9Nai pernah menahang kuakap nggeluh asum aku langa i teruh Undang-undang; tapi asum reh perentah Dibata, dosa minter nggeluh mulihi. 10E maka mate aku. Janah Undang-undang e si aturna kin mabai aku ku kegeluhen, rikutken pengalamenku kepeken mabai aku ku kematen. 11Dosa ndat kesempaten arah Undang-undang e janah alu Undang-undang e itipuna janah ibunuhna aku. #Kej 3:13

12Dage Undang-undang e badia nge. Janah pedah e badia, adil dingen mehuli. 13Ntah kin enda ertina maka si mehuli e maba kematen man bangku? Tentu lang! Tapi dosa make si mehuli e ngerehken kematen man bangku, janah alu bage, tangkas me uga kin si tuhuna biak dosa e. Dage erkiteken Undang-undang e tangkas me maka dosa e tuhu-tuhu kal jahat.

Perbeben i bas pusuh manusia

14Sieteh maka Undang-undang e biakna biak tendi kap; tapi aku biak si erkula kap, janah aku enggo terdaya jadi budak dosa. 15Lanai kuangka kai si kubahan; sabap labo kulakoken rikutken sura-surangku, tapi si ciga ateku nge kubahan. #Gal 5:17 16Tapi adi si kudalanken e la bagi sura-surangku, si enda nuduhkenca maka kuakui Undang-undang e bujur. 17Dage si tuhuna labo aku erbahanca si la mehuli e; tapi dosa si ringan i bas aku e nge erbahanca. 18Kueteh maka si mehuli la lit ringan i bas aku, e me i bas biak kulangku enda. Sabap aminna lit gia sura-surangku erbahan si mehuli, si kudalanken labo bage. 19La kudalanken si mehuli si ateku kubahan, tapi kudalanken kai si la mehuli, si la bagi sura-surangku. 20Adi kudalanken si la bagi sura-surangku, si enda ertina maka labo aku si ndalankenca e, tapi dosa si ringan i bas aku e nge.

21Dage enggo kudat biak si enda i bas diringku: Kubahan kenca ateku si mehuli, si jahat ngenca terbahan aku. 22Pusuh peratenku ermeriah ukur nandangi Undang-undang Dibata, 23tapi kugejap lit sada biak si deban i bas ringringku si erlawanen ras biak si payo kuakap i bas ukurku. Si enda me erbahanca maka aku enggo itaban biak dosa si ringan i bas ringringku. 24Andiko, cilaka me tuhu aku! Ise nge si mulahi aku i bas biak kematen enda nari? 25Kukataken bujur man Dibata si mulahi aku arah Jesus Kristus Tuhanta.

Dage adi aku jine, i bas ukurku ngenca aku ngikutken Undang-undang Dibata, tapi kulangku ndalanken biak dosa.

Currently Selected:

ROMA 7: BTX

Highlight

Copy