MASMUR 66
66
Ende-enden pengataken bujur
1Ende-enden.
Ersuraklah man Dibata alu meriah, o doni kerina!
2Rendelah dingen pemuliaken gelarNa,
pehagalah IA alu puji-pujin.
3Katakenlah man Dibata, nindu,
“Andiko, mejin tuhu perbahanenNdu!
Musuh mungkuk i adep-adepenNdu perban biarna,
erkiteken kuasaNdu si mbelin.
4Kerina doni nembah mungkuk man baNdu,
rende ia muji Kam,
ipujina gelarNdu.”
5Marilah dingen nehenlah si ibahan Dibata,
mehantu kal perbahanenNa i tengah-tengah manusia.
6IsalihkenNa lawit jadi taneh kerah,
nini-nininta erdalan arah e ngepar.
E maka meriah ukurta,
kerna kerina perbahanenNa. #Kel 14:21; Jos 3:14-17
7IA me pemerentah si erkuasa seh rasa lalap.
IperdiatekenNa bangsa-bangsa maka ola berontak man baNa.
8O bangsa-bangsa pujilah Dibata kami,
berekenlah puji-pujinndu man baNa.
9IA si njaga kita maka tetap nggeluh,
dingen la ipelepasNa kita ndabuh.
10O Dibata, Kam nguji kami,
desken ngane pirak i bas api,
bage me kami pengujiNdu.
11IpediatNdu kami kena siding,
iberekenNdu man kami baban si seh kal beratna.
12IpelepasNdu kami idedehi imbang-imbang kami,
ibentasi kami banjir dingen api.
Tapi genduari ibabaiNdu kami
ku bas ingan kemalemen ate.
13Reh aku ku RumahNdu maba persembahen tutungen,
dingen kukunduli padanku man baNdu, #Peng 5:4
14padan si kubelasken
tupung aku i bas kiniseran.
15Kupersembahken me man baNdu persembahen tutungen,
i bas asuh-asuhen si mburna nari.
Kupersembahken man baNdu bajar ras lembu,
cimberna nangkih ku langit.
16Marilah dingen begikenlah, o kam kerina si erkemalangen man Dibata,
maka kuturiken man bandu kerna kai si ibahanNa man bangku.
17Erlebuh aku mindo penampat man baNa,
genduari rende aku muji IA.
18Bicara aku ersura-sura erbahan si jahat,
ugapa pe TUHAN la nggit megiken pertotonku.
19Tapi enggo ibegiken Dibata aku,
ialokenNa pemindonku.
20Kupuji Dibata sabap la itulakNa pertotonku,
IA tetap erkeleng ate man bangku.
Currently Selected:
MASMUR 66: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
