MASMUR 50
50
Penembahen si payo
1Masmur Asap.
Ngerana TUHAN Dibata si Mada Kuasa,
ilebuhNa kerina doni enda,
i kepultaken nari terus ku kesunduten.
2Dibata ersinalsal i Sion nari,
kuta si mejile la teralang.
3Reh me Dibatanta, labo IA sinik saja,
api si merawa ngelebei IA,
dingen angin kalinsungsung ngkelewetisa.
4Langit ras doni idiloNa,
guna naksiken IA ngerunggui bangsaNa.
5Isuruhna gelah ipepulung kerina bangsaNa i adep-adepenNa,
bangsa si enggo erbahan iketen perpadanen ras IA, alu mereken persembahen man baNa.
6Langit ermomo kerna kebenaren Dibata
maka bujur kap keputusenNa.
7“O Israel, ngerana ateKu man bandu, o kam bangsangKu kerina, dengkehkenlah.
Kusaksiken ateKu man bandu,
Aku kap Dibata, Dibatandu.
8Labo erkiteken persembahenndu kam Kuukum,
persembahen tutungenndu lit nge lalap i lebengKu.
9Lembu i bas karang lembundu la Aku perlu,
kambing i bas rarasenna la Aku merhat.
10Sabap sikerajangenKu nge kap rubia-rubia i kerangen,
bage pe asuh-asuhen i das deleng-deleng si meribu-ribu.
11Aku nge empuna kerina perik-perik i bas awang-awang,
bage pe kerina si nggeluh i mbalmbal si mbelang.
12Adi melihe Aku, la bandu Kupindo,
sabap Aku kap empuna doni ras kerina si lit i je.
13Kupan kin daging jenggi lembu?
Ntah Kuinem kin dareh kambing?
14Bahanlah pengataken bujur jadi persembahen man Dibata,
sehkenlah kai si enggo ipadankenndu man si Meganjangna.
15Erlebuhlah man bangKu tupung kam i bas kiniseran;
Aku si nampati kam,
jenari ipujindu me Aku.”
16Tapi nina TUHAN man kalak jahat,
“Engkai maka ibelaskenndu perentah-perentahKu?
Kai urusenndu ncakapken perpadanKu?”
17Nembeh atendu adi Kupandang kam,
itulakndu perentahKu.
18Erteman kam ras tep-tep pinangko si idahndu,
bage pe ras kalak si perlua-lua.
19Si jahat usur ibelaskenndu,
la pernah kam alang-alangen erbahan taki pacik.
20Katawari pe icekurakindu seninandu,
dingen idaram-daramindu kesalahen.
21Ilakokenndu e kerina tapi sinik saja Aku;
e maka isangkandu seri biakta.
Tapi genduari Kurawai kam,
dingen ateKu erpekara ras kam.
22Dengkehkenlah,
o kam si enggo lupa man Dibata.
Jaga maka ola sempat kam ikernepken,
jenari ise pe la lit sinampati kam.
23Ngataken bujur e me persembahen si pehagaken Aku
janah si patuh ngikutken Aku tentu Kukelini.
Currently Selected:
MASMUR 50: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
