MASMUR 49
49
Percuma ernalem man kebayaken
1Masmur anak-anak si Korah.
2Begikenlah o kerina bangsa,
o kam si ngiani doni enda dengkehkenlah.
3Subuk rayat bage pe si perpangkat,
si musil-musil dingen si bayak.
4I bas babahku nari luar kata-kata kepentaren,
perukurenku mbages kal ertina.
5Kuperdiateken me kuan-kuanen,
janahku ngkuit kulcapi, kuturiken ertina.
6La aku mbiar paksa-paksa kiniseran,
tupung aku ikepung musuh-musuhku.
7E me kalak bayak, si ernalem man kebayakenna,
dingen si megombang erkiteken erta-ertana.
8Ise pe la banci nebusi kesahna,
ntah pe nggalari tebusna man Dibata.
9Sabap tebusen guna geluh manusia meherga kal kap,
e maka kai saja pe igalarkenna la pernah cukup,
10gelah ia isilahi kematen,
dingen banci nggeluh rasa lalap.
11Kerina kalak ngidahsa maka kalak pentar pe mate nge,
bali ras kalak motu ras bodoh.
Kerina ia nadingken kebayakenna man sinursurna.
12Kuburen me jadi rumahna rasa lalap,
i je me ia tading rasa lalap,
aminna pe tupung geluhna, mbelang tanehna.
13Kinihagan manusia labo banci mulahi ia i bas kematen nari,
bali ras rubia-rubia ia pe mate nge.
14Nehenlah, kuga jadina man kalak si ernalem man dirina,
bage me kedungenna man si puas iakapna ngenen ertana.
15Enggo itetapken maka ia mate bali ras biri-biri,
kematen kap jadi permakanna;
Pinter ia lawes ku bas kuburen,
jenari tading i bas doni kalak mate,
badanna minter macik.
16Tapi Dibata si mulahi aku,
ikeliniNa aku i bas kuasa kematen nari.
17Ola ukurndu gulut ngidah kalak jadi bayak,
dingen erta-ertana pe ertambah-tambah.
18Labo ibabana erta-ertana e tupung ia mate,
kebayakenna labo ikut ikuburken radu ras ia. #Peng 5:15
19Aminna pe sangap kalak i bas geluhna,
dingen perban sangapna ia iangkat-angkat,
20idahina kang nini-ninina,
ku bas ingan si gelap seh rasa lalap.
21Kehagan manusia labo pulah i bas kematen nari,
bali ras rubia-rubia ia pe mate nge.
Currently Selected:
MASMUR 49: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
