MASMUR 143
143
Pertoton mindo penampat
1Masmur Daud.
O TUHAN, dengkehken min pertotonku,
perdiateken min pemindonku.
Erkiteken kinibujuren ras pertetapNdu, aloi min aku.
2Aku suruh-suruhenNdu kap, ola min aku erpekara ras Kam
sabap la lit kalak si la ersalah i adep-adepenNdu. #Rom 3:20; Gal 2:16
3Musuhku ngelis-ngelis aku,
jenari idampeskenna aku ku taneh.
Itamakenna aku ku bas tutupen si gelap,
e maka enggo seri aku ras kalak si enggo ndekah mate.
4Enggo labuh kal aku,
bene kal ukurku.
5Kupeinget-inget wari-wari si enggo lepas,
kuukuri kerina perbahanenNdu,
kukusur-kusur i bas pusuhku kai si enggo ilakokenNdu.
6Kuangkat tanku ertoto aku man baNdu,
desken taneh kelegon, muas aku man baNdu.
7O TUHAN, genduari aloi min aku,
enggo bene pengarapenku.
Ola ibunikenNdu baNdu man bangku,
maka ola aku bali ras kalak si perlawesna kempak doni kematen.
8Persingeti bangku tep-tep erpagi-pagi kerna keleng ateNdu si tetap,
man baNdu saja ngenca aku ernalem.
Pertotonku kupenangkih man baNdu,
tuduhken man bangku dalan si man dalinenku.
9Kam me inganku cicio, o TUHAN,
pulahi min aku i bas imbang-imbangku nari.
10Kam kap Dibatangku,
ajari aku ngelakoken peratenNdu.
Mehuli min Kam kempak aku,
jenari babai aku arah dalan si pinter.
11Pegeluh min aku o TUHAN erkiteken gelarNdu,
erkiteken kiniulinNdu tangtangi min aku i bas kesusahen nari.
12Erkiteken keleng ateNdu man bangku,
bunuhlah kerina imbang-imbangku.
Erkiteken aku suruh-suruhenNdu,
kernepken min kerina musuh-musuhku.
Currently Selected:
MASMUR 143: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
