MASMUR 141
141
Pertoton berngi
1Masmur Daud.
O TUHAN, erlebuh aku man baNdu,
sampati min aku genduari!
Dengkehken min aku, tupung aku erlebuh man baNdu.
2Alokenlah pertotonku desken persembahen si merim,
tanku si kudadaken desken persembahen karaben. #Ket 5:8
3O TUHAN, jagai min babahku,
eruk min biberku.
4Ola min pediatNdu jahat sura-surangku,
ntah pe ngikut ken perbahanen kalak jahat.
Ndigan pe, ola min aku ikut i bas kerja-kerjana man-man.
5Adi kalak bujur mandang dingen ngukum aku, tama kiniulin kap e man bangku.
Tapi pujin i bas kalak jahat nari la kualoken,
sabap aku usur ertoto ngelawan perbahanenna si jahat.
6Kune peminpin-peminpinna ianjemken i bas tebing batu nari,
e maka tek me kalak e maka tuhu nge si kukataken.
7Desken kayu si taka dingen iripukken,
bage me pe tulan-tulanna ikerapken i tepi kuburen.
8Tapi aku tetap ernalem man baNdu, o TUHAN Dibatangku,
ku Kam nge aku cicio,
ola aku pelepasNdu mate.
9Kawali aku maka ola aku kena siding si itogengna lako nangkap aku,
kawali aku i bas ragum kalak jahat e nari.
10Bahan maka kalak jahat kena sidingna jine,
tapi aku mentas la kena kai pe.
Currently Selected:
MASMUR 141: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
