MASMUR 140
140
Pertoton mindo pengkawali
1Masmur Daud.
2O TUHAN, pulahi min aku i bas kalak jahat nari,
kelini min aku idur kalak si la lit i bassa perkuah ate.
3Katawari pe si jahat irencanakenna
lalap atena peturah perubaten.
4Dilahna desken nipe si erbisa,
rananna bali ras bisa nipe upar. #Rom 3:13
5O TUHAN, kawali min aku i bas kuasa kalak si des ate,
jagai min aku i bas kalak si jahat nari,
si atena ncilakaken aku.
6Kalak megombang erbuni-buni nidingi aku,
itogengna banto guna nangkap aku.
Gedang-gedang dalan itogengina siding, guna nidingi aku.
7Kukataken man TUHAN, “Kam kap Dibatangku.”
Dengkehkenlah pertotonku mindo penampat, o TUHAN.
8O TUHAN Dibatangku, Kam kap penampatku si megegeh,
enggo ikawaliNdu aku i bas perang.
9O TUHAN, ola bereken seh sura-sura kalak jahat,
ola bahan seh sura-surana.
10Ola bere kemenangen man imbang-imbangku,
sumpahna man bangku ndabuhlah man bana mulihken.
11Bahanlah maka rara api ndabuh ku ia,
jenari iambekken ia ku bas lubang si mbages gelah lanai banci ndarat.
12Kalak si mahan-mahani salah kalak, ola pediat ringan i bas negeri enda,
kutundukken kalak jahat alu cilaka, janah benelah ia.
13O TUHAN, kueteh maka Kam kap pembela kalak si musil-musil,
janah kalak si itindas ibelaNdu.
14Kalak benar ipujina Kam,
nggeluh ia i bas adep-adepenNdu.
Currently Selected:
MASMUR 140: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
