MASMUR 11
11
Kiniteken man TUHAN
1Masmur Daud.
Aku ernalem man TUHAN.
Seh kal bodohna kalak si ngerana man bangku nina,
“Kabanglah kam ku deleng-deleng desken perik,
2sabap enggo ipegesteng kalak jahat panahna
dingen i bas gelap nari enggo irentangna kempak kalak bujur.
3La lit kai pe banci ilakoken kalak bujur,
adi palas kebujuren enggo iruntuhken.”
4 TUHAN lit i bas rumahNa si badia;
kesain kinirajanNa lit i Surga.
Kerina kalak iperdiatekenNa itehNa
kai sangana ibahan manusia.
5Iujina kalak bujur ras kalak jahat,
dingen nembeh kal ateNa kempak kalak si erngena ate man si jahat.
6Ipesusurna batu merara, kertah gara ku babo kalak jahat;
jenari iukumna alu angin melas.
7 TUHAN adil dingen ngena ateNa perbahanen si mehuli.
Kalak si ngelakoken perentahNa, nggeluh me i bas adep-adepenNa.
Currently Selected:
MASMUR 11: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
