BILANGEN 36
36
Aturen kerna taneh tading-tadingen si nialoken diberu
1Kepala-kepala keluarga i bas terpuk Gileat anak Mahir ntah pe kempu Manase anak Jusup, lawes njumpai Musa ras peminpin-peminpin si deban. 2Nina, “TUHAN enggo nuruh kam magiken taneh man bangsa Israel alu erbahan tikam tanduk. Tole enggo ipedahkenNa pe man bandu mereken taneh kade-kade kami Selapehat man anak-anakna si diberu. #Bil 27:7 3Tapi cuba perdiateken, adi erjabu ia ras dilaki i bas suku si deban nari, tanehna e tentu enggo salih jadi sikerajangen suku si deban ndai, janah belang taneh si enggo itentuken man kami enggo erkurang. 4I bas Tahun Pemulihen, asum kerina taneh si enggo idayaken iulihken man empuna si mula-mula, taneh anak-anak si diberu Selapehat secara tetap enggo itambahken man suku inganna sereh janah suku kami enggo kebenen taneh e.”
5E maka ibereken Musa man bangsa Israel pedah si tersurat arah teruh enda si rehna i bas TUHAN nari. Nina, “Payo nge kai si ikataken suku Manase, 6janah erkite-kiteken si e TUHAN ngataken maka anak-anak si diberu Selapehat banci erjabu ras ise pe rikutken sura-surana tapi i bas sukuna e ngenca. 7Taneh tep-tep kalak Israel arus tetap i bas sukuna. 8Tep-tep diberu si ngaloken taneh tading-tadingen i bas suku kalak Israel arus erjabu ras dilaki si sada suku ras ia. Alu bage tep-tep kalak Israel ngaloken taneh tading-tadingen nini-ninina. 9Janah taneh e la banci pindah i bas sada suku ku suku si deban. Taneh tep-tep suku la banci la tetap jadi sikerajangen suku e jine.”
10-11E maka, Mahlah, Tirsah, Hogelah, Milkah, ras Nuah, anak-anak si diberu Selapehat, ndalanken bagi si ipedahken TUHAN man Musa, erjabu ia ras anak-anak si dilaki senina-senina bapana. 12Erjabu ia i bas terpuk-terpuk suku Manase anak Jusup, e maka tanehna e tetap tading i bas kalak si sada suku ras bapana.
13Enda me peraturen-peraturen ras pedah si ibereken TUHAN man bangsa Israel arah Musa i Kendit Moap i kepar-kepar Lau Jordan petingtang ras Jeriho.
Currently Selected:
BILANGEN 36: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.