BILANGEN 35
35
Kuta-kuta si iendesken man kalak Lewi
1I Kendit Moap i kepar Lau Jordan petingtang ras Jeriho nina TUHAN man Musa, #Jos 21:1-42 2“Kataken man bangsa Israel maka i bas taneh si ialokenna arus iberekenna man kalak Lewi piga-piga kuta man inganna tading bage pe mbalmbal i sekelewet kuta-kuta e. 3Kuta-kuta enda ibereken man sikerajangen kalak Lewi, janah i je me ia ringan. Mbalmbal e man ingan lembu ras kerina asuh-asuhenna si deban. 4Mbalmbal ingan asuh-asuhen e belangna empat ratus lima puluh meter i bas tiang tepi tembok nari, 5gelah alu bage enggo jadi empat segi, e me 900 meter janah kuta e jine lit i tengah-tengah. 6Arus iberekenndu man kalak Lewi enem kuta ingan erlindung gelah kalak si munuh alu la sengaja banci lompat ku je. Tambah si e, bereken pe man bana empat puluh dua kuta si deban, 7ras mbalmbalna, maka enggo bias jumlahna empat puluh waluh kuta. 8Buena kuta-kuta kalak Lewi i bas tep-tep suku itentuken sue ras belangna daerahna.”
Kuta-kuta ingan erlindung
(Ul 19:1-13; Jos 20:1-9)
9 TUHAN nuruh Musa #Jos 20:1-9 10ngatakenca man bangsa Israel nina, “Kenca enggo ikeparindu Lau Jordan janah enggo bengket ku taneh Kanaan, 11arus ipilihndu kuta-kuta ingan erlindung man ingan lompat kalak si munuh alu la sengaja. 12I bas kuta-kuta e ia banci aman i bas kade-kade kalak si enggo mate ndai nari si erbalas atena. Sekalak jelma si ituduh munuh, la banci ibunuh adi langa ia iadili i tengah-tengah jelma si nterem. 13Pilihlah enem kuta, 14telu arah Timur Lau Jordan janah telu i taneh Kanaan. 15Kuta-kuta e gunana jadi kuta-kuta ingan erlindung man kalak Israel ras man kalak asing si ringan kentisik ntah pe tetap i tengah-tengahna.
Tep-tep kalak si munuh kalak si deban alu la sengaja banci lompat ku salah sada kuta e.
16-18Tapi bage gia, adi sekalak jelma make besi, ntah batu, ntah kayu jadi senjata munuh kalak si deban, ia enggo ersalah munuh, janah ia ibunuh. 19Kade-kade si mate ndai si ndeherna ertanggung jawab munuh pemunuhna ndai. Adi itunduksa ia, la banci la ibunuhna pemunuh e.
20Adi sekalak jelma ernembeh ate man kalak si deban jenari ibunuhna ia alu ngonjumken ia ntah alu menter ia, 21ntah pe alu ninju ia, ia enggo ersalah munuh janah ia arus ibunuh. Kade-kade si mate ndai si ndeherna ertanggung jawab munuh pemunuh ndai. Adi itunduksa ia, la banci la ibunuhna pemunuh e.
22Tapi umpamaken lit sekalak jelma la sengaja munuh kalak si deban alu ngonjumken ia ntah pe alu menterken sada-sada barang man bana, tapi labo erkite-kiteken atena nembeh; 23ntah pe, umpamaken lit sekalak jelma menterken sada batu, jenari munuh kalak si deban si labo ndai idahna, janah labo ndai lit sura-surana nakitisa, bage pe kalak si kena pementerna e labo imbang-imbangna. 24I bas soal-soal si bagenda, asum ngeranaken ranan e, perpulungen arus mihak kalak si munuh alu la sengaja ndai, janah labo arah kade-kade kalak si mate e si erbalas atena. 25Kalak si ersalah munuh jelma e arus iselamatken perpulungen e i bas kade-kade kalak si mate ndai nari, janah arus itaruhkenna ia mulih ku kuta ingan perlindungen ku ja ia lompat ndube. Ia arus ringan i je seh Imam si Mbelin si jadi imam asum e mate. 26Tapi adi kalak si ersalah munuh ndai nadingken kuta ingan erlindung inganna lompat e, 27jenari adi kade-kade kalak si mate ndai jumpa ras ia jenari ibunuhna ia, perbahanen perbalasen enda labo sada pembunuhen si salah. 28Kalak si enggo ersalah munuh arus ringan i bas kuta ingan erlindung e seh Imam si Mbelin mate, tapi kenca si e banci ia mulihken ku rumahna. 29Peraturen enda arus iikutkenndu ras kesusurenndu ntah i ja gia kam ringan.
30Kalak si ituduh munuh banci ikataken ersalah jenari ibunuh adi lit dua kalak ntah lebih saksi; bukti i bas sekalak saksi nari la cukup jadi sokongen man sada tuduhen pembunuhen. #Ul 17:6; 19:15 31Sekalak pemunuh la banci la ibunuh. La banci ia pulah i bas ukumen enda nari alu nggalar duit tebusen. 32Adi sekalak jelma enggo kiam ku bas sada kuta ingan erlindung ola pelepas ia nggalar duit tebusen gelah mulih ku rumah ope denga Imam si Mbelin mate. 33Adi bage ibahanndu, taneh inganndu ringan e enggo jadi keliamen ibahanndu. Taneh e jadi keliamen erkite-kiteken pembunuhen, janah seakatan arah kematen kalak si munuh e, la lit dalan ngelakoken acara pembersihen guna taneh i ja sekalak jelma enggo ibunuh. 34Ola ibahanndu keliamen taneh inganndu tading, sabap Aku kap TUHAN janah Aku ringan i tengah-tengah bangsa Israel.”
Currently Selected:
BILANGEN 35: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.