MATIUS 5
5
Pengajaren Jesus i das uruk
1Kenca Jesus ngidah jelma si nterem, inangkihNa sada uruk. Kenca IA kundul reh ajar-ajarNa pulung deherken IA. 2Jenari ibenakenNa ngajari ajar-ajarNa e.
Kerna ketuahen si tuhu-tuhu
(Luk 6:20-23)
3Nina Jesus,
“Ketuahen kalak si nggejap maka ia labo kai pe ertina i lebe-lebe Dibata;
sabap man bana me Kinirajan Surga.
4Ketuahen kalak si erceda ate erkiteken dosa;
sabap Dibata me ngapuli ia. #Jes 61:2
5Ketuahen kalak si meteruk ukurna;
sabap isehken Dibata me padanNa man bana. #Msm 37:11
6Ketuahen kalak si muas melihe nehken peraten Dibata;
sabap ibesuriNa me ia. #Jes 55:1-2
7Ketuahen kalak si perkuah ate dingen perkeleng;
sabap ia me ngaloken perkuah ate Dibata.
8Ketuahen kalak si meciho pusuh peratenna;
sabap itandaina me tuhu-tuhu Dibata. #Msm 24:3-4
9Ketuahen kalak si erbahan perdamen;
sabap iakui Dibata me ia anakNa.
10Ketuahen kalak si ngenanami kiniseran erkite-kiteken nehken peraten Dibata;
sabap man bana me Kinirajan Surga. #1Pet 3:14
11Ketuahen me kam adi erkite-kiteken kam ajar-ajarKu igombang-gombangi, ipesega-sega dingen ipelawes kalak kam janah alu kata guak ipalitkenna si jahat man bandu. #1Pet 4:14 12Ermengkah dingen meriahlah atendu, sabap enggo isikapken Dibata upahndu si mbelin i Surga; sabap bage me pe nabi-nabi si nggeluh leben asangken kam ipesega-sega kalak.” #2Kro 36:16; Perb 7:52
Sira ras terang
(Mrk 9:50; Luk 14:34-35)
13“Bagi sira si seh kal perluna guna pangan, bage pe kam nandangi kerina manusia. Tapi adi sira e lanai masin, lanai banci ibahan masin mulihi. Sira e lanai erguna, e maka iambekken jenari idedehi kalak. #Mrk 9:50; Luk 14:34-35
14Bagi terang si seh kal perluna i bas gelap, bage pe kam nandangi doni enda. Kuta si lit i das uruk la banci lang teridah. #Joh 8:12; 9:5 15Labo isagani kalak lampu kenca bage itutupina alu tumba; tapi itamakenna ku datas nahe pertendangen, gelah terang iakap kalak kerina si lit i bas rumah e. #Mrk 4:21; Luk 8:16; 11:33 16Dage, ersinalsal lah min terangndu i lebe-lebe kalak si nterem gelah adi idahna perbahanenndu si mehuli, ipujina Dibata, Bapandu si i Surga.” #1Pet 2:12
Pengajaren kerna Undang-undang Agama Jahudi
17“Ola iakapndu Aku reh ncedai Undang-undang si ibereken Musa ras si iajarken nabi-nabi. Aku reh labo ncedai, tapi guna nehken si enggo isuratkenna e. 18Ingetlah katangKu enda! Seh masap langit ras doni, sada titik ntah sada bagin si kitikna pe i bas Undang-undang e la bene adi langa kin seh kerina kai si enggo isuratken e. #Luk 16:17 19E maka ise la ngikutken si enggo isuratken e, aminna gia bagin si kitikna, janah ibabaina papak kalak si deban, ia me si la mehergana i bas Kinirajan Surga. Tapi ise ngikutkenca janah ibabaina kalak si deban ngikutken si enggo isuratken e, ia me si mbelinna i bas Kinirajan Surga. 20Kukataken pe man bandu maka labo kam banci bengket ku bas Kinirajan Surga adi la kin tutusen atendu erbahan si ngena ate Dibata asa guru-guru agama ras kalak Parisi.”
Kerna merawa
(Luk 12:57-59)
21“Enggo ietehndu maka nai ikataken man nini-nininta, ‘Ola munuh; kalak si munuh iadili.’ #Kel 20:13; Ul 5:17 22Tapi genduari Kukataken man bandu: Ise merawa nandangi seninana, iadili pagin, ise si ngisakken kalak, arus iadili i lebe-lebe Pengadilen Agama. Janah ise ngataken seninana: ‘O kemali!’, ia pagin itamaken ku api naraka. 23Dage, adi asum atendu nehken persembahen man Dibata ingetndu maka sangkut ukur seninandu nandangi kam, 24tadingkenlah lebe persembahenndu e jenari erdame ras ia. Kenca bage persembahkenlah persembahenndu e man Dibata.
25Adi iaduken kalak kam janah ibabana ku pengadilen, erdamelah ras ia ope denga seh i pengadilen. Sabap adi enggo seh i pengadilen iendeskenna me kam man hakim, jenari iendesken hakim kam man polisi. Kenca bage itamaken polisi kam ku bas penjara. 26Adi kam i bas penjara, lanai kam ipulahina adi langa kin bali utangndu e kerina.”
Kerna erlua-lua
27“Enggo ietehndu maka lit ikataken, ‘Ola erlua-lua.’ #Kel 20:14; Ul 5:18 28Tapi genduari Kukataken man bandu: Ise ngenehen sekalak diberu, jenari leket ukurna ras diberu e, si tuhuna ia enggo erlua-lua i bas ukurna. 29Dage, adi matandu si kemuhen erbahanca kam erdosa, pulditkenlah e jenari ambekkenlah! Sabap ulin sada bagin badanndu bene asa kerina iambekken ku bas naraka. #Mat 18:9; Mrk 9:47 30Adi tanndu si kemuhen erbahanca kam erdosa, keretlah e jenari ambekken! Sabap ulin bene sada tanndu asangken kerina badanndu iambekken ku bas naraka.” #Mat 18:8; Mrk 9:43
Kerna ngulihken ndehara
(Mat 19:9; Mrk 10:11-12; Luk 16:18)
31“Lit ka pengajaren bagenda, ‘Ise ngulihken ndeharana, arus ibahanna surat mulih man ndeharana!’ #Ul 24:1-4; Mat 19:7; Mrk 10:4 32Tapi genduari Kukataken man bandu: Ise ngulihken ndeharana labo erkiteken ndeharana e erlua-lua ras kalak si deban, ia si erbahanca ndeharana e erlua-lua adi sereh ia man kalak si deban, janah si ngempoi diberu e pe erlua-lua.” #Mat 19:9; Mrk 10:11-12; Luk 16:18; 1Kor 7:10-11
Kerna ersumpah
33“Enggo pe ietehndu maka i bas nini-nininta nai lit pengajaren bagenda, ‘Ola ersumpah kerna si la tuhu, tapi bahanlah kai si enggo isumpahkenndu i lebe-lebe Tuhan.’ #Im 19:12; Bil 30:2; Ul 23:21 34Tapi genduari Kukataken man bandu: Ola ersumpah kerna kai-kai pe, ola ersumpah i bas gelar langit, sabap langit kap ingan kundul Dibata; #Jak 5:12; Jes 66:1; Mat 23:22 35ola ersumpah i bas gelar doni, sabap doni kap ingan naheNa; bage pe ola ersumpah i bas gelar Jerusalem, sabap Jerusalem kuta Raja Simbelin kap. #Jes 66:1; Msm 48:3 36I bas gelar takalndu pe ola kam ersumpah, sabap labo kam erkuasa nalihken selambar buk pe jadi mbentar ntah mbiring. 37Katakenlah, ‘ue’ adi tuhu janah katakenlah, ‘lang’ adi la tuhu. Lain asangken si e i bas Iblis nari kap rehna.”
Kerna erbalas
(Luk 6:29-30)
38“Enggo ietehndu maka nai lit bagenda pengajaren, ‘Mata gancih mata, janah ipen gancih ipen.’ #Kel 21:24; Im 24:20; Ul 19:21 39Tapi genduari Kukataken man bandu: Ola erbalas nandangi kalak si enggo ersalah man bandu. Adi iparap kalak kurumndu si kemuhen, bereken parapna kurumndu si kawes. 40Janah adi iaduken kalak kam erkiteken morah atena bajundu, bereken pe ras cabinndu man bana. 41Adi ipaksa kalak kam maba barangna sada kilometer dauhna, babalah barang e dua kilometer dauhna. 42Adi mindo kalak man bandu berekenlah; bage pe ola tulak adi kalak minjam kai-kai pe man bandu.”
Ngkelengi imbang-imbang
(Luk 6:27-28,32-36)
43“Enggo pe ietehndu kerna ajaren enda, ‘Kelengilah temanndu, janah elem-elemlah man imbang-imbangndu.’ #Im 19:18 44Tapi genduari Kukataken man bandu: Kelengilah imbang-imbangndu, janah ertotolah man Dibata kerna kalak si erbahanca kam ngenanami kiniseran. 45Alu bage kam enggo jadi anak-anak Dibata. Sabap labo saja man kalak si mehuli ibereken Dibata matawariNa, tapi pe man kalak si jahat. Bage pe labo saja man kalak si bujur ibereken Dibata udan, tapi pe man kalak si la bujur. 46Sabap adi si ngkelengi kam saja ngenca ikelengindu, man kade Dibata mbalas perbahanenndu e? La kin kalak si muat cuke pe bage ka nge perbahanenna? 47Janah kai kin lainna kam ras kalak si deban adi ras temanndu saja ngenca kam siperkuanen? Kalak si la nandai Tuhan pe bage nge perbahanenna. 48E maka kam arus serta bagi Bapandu si ni Surga pe serta.” #Im 19:2; Ul 18:13
Currently Selected:
MATIUS 5: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.