PERNGANDUNGEN 5
5
Pertoton mindo perkuah ate
1O TUHAN, inget min kai si enggo jadi man kami.
Perdiateken min kami nehen min uga melana iakap kami.
2Tading-tadingen kami ibuat kalak si la itandai
bangsa si deban nge si ngiani rumah kami.
3Bapa kami enggo ibunuhi imbang-imbang kami,
e maka genduari enggo mbalu nande kami.
4Lau man inemen terpaksa igalari kami,
kayu man ranting terpaksa itukur kami.
5Mekelek kami ielis-elis, alu pasangen i das kuduk kami,
latih iakap kami, tapi la ipediat kalak kami ngadi.
6Guna ndatken pangan maka ola mate,
mindo kami man bangsa Mesir ras Assur.
7Enggo erdosa nini-nini kami, tapi genduari lanai ia i je.
Genduari mesui ate kami mersan dosa-dosana.
8Genduari kami iperentah bangsa budak,
janah ise pe la ngasup mulahi kami i bas kuasana nari.
9Pemunuh gawah-gawah arah juma-juma nari.
Iasamken kami kesah kami lako ndarami pangan.
10Lumben mahanca kami penakiten,
seh maka kuling kami seri lasna ras ginuhur.
11Ndehara kami enggo iperkosa Deleng Sion,
i bas tep-tep kuta i Juda anak kami si nguda-nguda ipaksana.
12Peminpin-peminpin kami enggo iukum gantung
pertua-pertua kami lanai iergakenna.
13Anak-anak perana ipaksana ngerik gandum desken budak,
danak-danak jongkang perban beratna maba ranting.
14Pertua-pertua lanai ngada-ngada i bas pintu gerbang,
si medanak lanai engkuit kulcapi.
15Keriahen enggo lawes i bas geluh kami nari.
Paksa landek enggo salih jadi paksa ngandung.
16Kerina si iagahken kami lanai lit tading.
Kami enggo erdosa, janah genduari kami enggo bene.
17Mesui kal pusuh kami,
janah si e menam la teridah arah iluh kami mambur.
18Sabap Sion enggo terulang, enggo melungen,
biang kerangen gawah-gawah arah runtuhenna.
19Tapi kam kap O TUHAN raja si rasa lalap,
si merentah terus ku bas kedungen paksa-paksa.
20Engkai maka bage dekahna kami itadingkenNdu?
Ndigan denga kin kami ingetNdu?
21Baba kami mulihken man baNdu, O TUHAN! Baba kami mulihken!
Ulihken kemulian kami si nai.
22Ntah itulakNdu kin kami rasa lalap?
La kin lit sibarna Kam merawa?
Currently Selected:
PERNGANDUNGEN 5: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.