PERNGANDUNGEN 4
4
Jerusalem kenca runtuh
1Emas si isepuh enggo magem,
kerina batu Rumah Pertoton ampar merap gedang-gedang dalan.
2Anak perana Sion seri kap mbarenda ras emas,
tapi genduari seri nge ras kudin taneh.
3Indung serigala pe ipepinemna anak-anakna,
tapi bangsangku bali kap ras perik unta si kejam man anak-anakna.
4Ipelepasna anak-anakna si mbaru tubuh mate lumben ras muas.
Anak-anak mindo pangan tapi la lit sekalak pe si merekenca.
5Kalak si semal man pangan entabeh mate kelihen i gedang-gedang dalan.
Si biasa medem i bas bantal sutra medem i bas gun-gunen sampah.
6Bangsangku enggo iukum, lebihen asangken ukumen man kalak Sodom,
si rempet itombangken alu tan Dibata. #Kej 19:24
7Peminpin-peminpinta la keliamen bersih kal bali ras salju,
paguh, dingen megegeh, erndilap ndilap perbahan sehatna.
8Genduari amparen ia i bas pasar, lanai itandai, ayona biringen asangken ageng;
kulingna kerah bagi ranting, ringut mbaluti tulan-tulanna.
9Mate i bas perang ulin kap asang si pudin mate,
manjar-anjar perpatena perban lumben, sabap lanai lit nakan si man pangan.
10Kecedan si reh engkenai bangsangku seh kal hantuna,
seh maka nande si ngkelengi anak-anakna pe itanggerna anakna jine man panganna. #Ul 28:57; Esek 5:10
11 TUHAN nguseken gegeh rawana si gurlah,
ipegaraNa api i Sion nuluhisa gelah radas ras taneh.
12Ise pe la tek, raja-raja bangsa si deban pe la tek,
maka musuh banci mengketi pintu gerbang Jerusalem.
13Tapi jadi me bage, erkiteken nabi-nabina enggo erdosa,
imam-imamna ersalah kerna kematen kalak bujur.
14Peminpin-peminpin mampa-mampa i gedang-gedang dalan, desken kalak pentang,
uisna melket ibahan dareh, seh maka la lit ise pe banci ndadapsa.
15“Lawes! Keliamen!” ningkalak. “Lawes! Ola dadap!”
E maka mampa-mampa ia i bas sada bangsa nari ku bangsa si deban, la lit ise pe si ngaloken ia.
16Lanai diate TUHAN pe ia, TUHAN jine si engkernepken ia kerina.
Imam-imam ras peminpin-peminpinna lanai iperdiateken TUHAN.
17Idarami kami kalak si nggit nampati kami, tapi sia-sia.
Itimai kami penampat i bas sada bangsa nari, tapi sada bangsa pe la tersampatisa kami.
18Musuh sangana nggempangi kami, lanai kami banci erdalan i bas pasar-pasar.
Wari-wari kami enggo dem beliganna, wari pendungi enggo seh.
19Kalak si ngayaki kami pedasen asangken rajawali nangkis i datas awang-awang.
Ielisna kami arah deleng-deleng, iemona kami i bas taneh mesawang.
20Ikuasaina ulu kegeluhen kami, e me raja pilihen TUHAN,
e me kalak si iarapken kami engkelini kami i bas serangen musuh-musuh nari.
21O kalak Edom, ras Us, tawaken, tawai asa ngasupndu.
Calung cilaka si ngkenai kam pe nandangi reh me, kam pe nandangi mabuk janah itangtangi kalak uisndu.
22Enggo genep ukumen dosa Sion, lanai ndekah TUHAN mpediat kita tertaban.
Tapi kam o Edom, TUHAN la banci lang ngukum kam ipetangkasNa me kerina kesalahenndu.
Currently Selected:
PERNGANDUNGEN 4: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
