JOSUA 4
4
Batu peringet-ingeten ipajekken
1Kenca kerina bangsa e enggo ngepari Lau Jordan nina TUHAN man Josua, 2“Pilih sepuluh dua kalak, sekalak i bas tep-tep suku nari. 3Jenari suruh ia muat batu sepuluh dua i tengah-tengah Lau Jordan nari e me i bas ingan tedis imam-imam e. Suruh ia maba batu-batu e jenari tamaken i bas inganndu erberngi sendah.”
4E maka idilo Josua si sepuluh dua kalak si enggo ipilihna e, 5jenari nina, “Lawes lah kam ku Lau Jordan leben asa Peti Perpadanen TUHAN Dibatandu. Buat lah batu i je tersada kam, sada guna tep-tep suku Israel, jenari persan. 6Batu enda jadi sada peringet-ingeten man bangsa e kerna kai si enggo ibahan TUHAN. Denggo, adi isungkun anak-anakndu kai ertina batu enda man bandu, 7kataken man bana maka Lau Jordan ngadi maler asum Peti Perpadanen TUHAN ngepari lau e. Batu enda tentu rusur ngingetken bangsa Israel kerna kai si enggo jadi i jenda.”
8Iikutken kalak ndai perentah Josua. Sue ras si enggo ipedahken TUHAN man Josua, ibuatna batu sepuluh dua i tengah-tengah Lau Jordan nari, sada man tep-tep suku Israel, ibabana ku ingan erkemah, jenari itamakenna i je. 9Josua pe ngamparken sepuluh dua batu i tengah-tengah Lau Jordan, i bas ingan tedis imam-imam si ngelanja Peti Perpadanen e. (Batu e lit denga i je.) 10Imam-imam tedis i tengah-tengah Lau Jordan seh kerina enggo dung ilakoken kai si enggo isuruh TUHAN man Josua guna idalanken bangsa e. Enda me kai si enggo iperentahken Musa.
Pedas-pedas bangsa e ngepar. 11Kenca ia enggo ngepar kerina, imam-imam erdalan leben asangken bangsa e maba Peti Perpadanen TUHAN. 12Dilaki i bas suku Ruben ras Gat bage pe setengah i bas suku Manase nari, si sikap erperang, leben ngepar asangken kalak si debanna e kerina bagi si enggo isuruh Musa man bana. 13I lebe-lebe TUHAN kira-kira empat puluh ribu dilaki si sikap erperang lawes ngepar ku kendit deherken Jeriho. 14Kai si ibahan TUHAN i bas wari e, erbahanca maka bangsa Israel malang ngenehen Josua. Ipehaga bangsa e ia kidekah geluhna, bali ras ipehagana Musa.
15Kenca bage ikataken TUHAN man Josua 16gelah isuruhna imam-imam si ngelanja Peti Perpadanen e ndarat i Lau Jordan nari. 17E maka minter isuruh Josua imam-imam e ndarat. 18Janah kenca imam-imam e seh i darat mulai ka lau ndai maler bagi si gelgel, mulsak launa seh ku tepi.
19Ikepari bangsa e Lau Jordan i bas wari pesepuluhken bulan si pemena jenari ibahanna inganna erkemah i Gilgal, arah Timur Jeriho. 20I je isusun Josua batu si sepuluh dua ndai si ibuat i bas Lau Jordan nari. 21Ikatakenna man bangsa Israel nina, “Adi isungkun anak-anakndu kam denggo kai ertina batu enda, 22turiken man bana kerna kejadin tupung Israel ngepari Lau Jordan arah taneh kerah. 23Turiken man bana maka TUHAN Dibatandu ngkerahi Lau Jordan guna kam seh kam ngepar, bali ras enggo ikerahiNa Lawit Merah man kami. 24Erkite-kiteken si enda kerina bangsa i doni enda meteh kuga belinna kuasa TUHAN, janah ipehagandu TUHAN Dibatandu seh rasa lalap.”
Currently Selected:
JOSUA 4: BTX
Highlight
Share
Compare
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
