JOSUA 3
3
Bangsa Israel ngepari Lau Jordan
1Pepagina lampas, keke Josua ras kerina bangsa Israel, berkat ia i bas inganna erkemah i Sitim nari ku Lau Jordan. I je erkemah ka ia kerina ope denga ngepar. 2Telu wari kenca si e, peminpin-peminpin bangsa e lawes niari ingan erkemah e 3janahna ermomo man bangsa e nina, “Kenca idahndu imam-imam ngangkat Peti Perpadanen TUHAN Dibatandu, minter tangtangi kerina kemahndu jenari ikutken lah ia. 4La enggo pernah kam i jenda, e maka kalak e si nuduhken dalan man bandu. Tapi ola deheri Peti Perpadanen e erdalanlah kira-kira sada kilometer i pudina.”
5Nina Josua man bangsa e, “Bersihken bandu, rikutken aturen agama, sabap pagi TUHAN erbahan sada tanda kuasa i tengah-tengahndu.” 6Kenca si e isuruhna imam-imam ngelanja Peti Perpadanen e janah erdalan leben asa bangsa e. Minter ilakoken imam bagi si ikataken Josua.
7Nina TUHAN man Josua, “Erkiteken perbahanenKu si sendah mulai me kam ipermuliaken bangsa Israel, janah iangkana maka Aku kap ras kam bagi Aku enggo ras Musa. 8Suruh imam-imam si ngangkat Peti Perpadanen maka adi enggo ia seh i Lau Jordan, la banci la tedis ia i bas lau e.”
9Jenari nina Josua man bangsa e, “Mari begiken kai si ikataken TUHAN Dibatandu man bandu. 10I bas perdalanenndu la banci la ipelawesNa kerina kalak Kanaan, Heti, Hewi, Peris, Girgasi, Amori ras Jebusi. Itehndu me maka Dibata si nggeluh lit i tengah-tengahndu. 11E maka Peti Perpadanen TUHAN si nasa lit, ngepari Lau Jordan leben asa kam. 12Genduari pilih sepuluh dua kalak, sekalak i bas tep-tep suku Israel nari. 13Kenca imam-imam, si ngangkat Peti Perpadanen TUHAN si nasa lit, ndedehken nahena ku bas lau, Lau Jordan la banci la ngadi maler, janah lau si maler ku berneh pulung i bas sada ingan, tempa-tempa itambak.”
14-15Tupung e sangana paksa peranin, janah lau e sangana banjir. Kenca bangsa e berkat i bas ingan erkemah e nari guna ngepari Lau Jordan, imam-imam si maba Peti Perpadanen e kerina erdalan arah lebe, 16minter ngadi launa maler janah nengneng terus ku gugung i kuta Adam, e me kuta deherken Saretan. Lau si maler ku berneh ku Lawit Mate enggo kerah tuhu-tuhu, e maka bangsa e banci ngepar deherken Jeriho. 17Asum bangsa e erdalan ngepar arah taneh si kerah, imam-imam si ngelanja Peti Perpadanen TUHAN tedis i babo taneh kerah i tengah-tengah Lau Jordan seh kerina bangsa e ngepar.
Currently Selected:
JOSUA 3: BTX
Highlight
Share
Compare
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
