JEREMIA 51
51
Umputen ukumen man Babilon
1Nina TUHAN, “Kubaba angin si engkernepken Babilon ras kalak si ringan i je. 2Kusuruh me bangsa si deban ngkernepken Babilon desken angin engkabangken segal. Tupung wari pengkernepen e enggo seh, itadingkenna negeri e lume. 3Ola bereken waktu man tentera-tenterana manahken anak panahna. Ola pediat ia make baju besina. Ola cidahken perkuah ate man anak peranana! Kernepken kerina tenterana! 4Kerina me ia luka dingen maten i gedang-gedang dalan kuta-kutana. 5Aku, TUHAN Dibata si Mada Kuasa langa nadingken Israel ras Juda, aminna pe ia enggo erdosa man bangKu, Aku si Badia nu Israel. 6Pedas tadingken Babilon! Lompatken guna engkelini kesahndu! Ola kam mate erkiteken dosa-dosa Babilon. Genduari erbalas ateKu dingen ngukumsa rikutken patutna. 7Babilon desken calung emas kap i bas tanKu, erbahan kerina belang-belang doni enda mabuk. Bangsa-bangsa doni enda minem anggur taresa, erbahanca kerina enggo mehado. #Ket 17:2-4; 18:3 8Babilon rempet me guling dingen kernep! Erceda atelah kerna si e! Tambari min lukana, mbera-mbera malem denga ia. 9Nina kalak pertandang si tading i je, ‘Enggo si cubaken nambari Babilon, tapi enggo melawenca. Sitadingkenlah ia genduari, ota kita mulih ku kutanta. Babilon enggo iukum Dibata alu kerina gegehna dingen enggo keri ikernepkenna.’ ” #Ket 18:5
10Nina TUHAN, “Nina bangsangKu, ‘Enggo icidahken TUHAN maka kita nge si payo. Ota kita mulih gelah situriken man kalak si ringan i Jerusalem kai si enggo ilakoken TUHAN Dibatanta.’ ”
11 TUHAN enggo nuruh raja-raja Medi, sabap ateNa engkernepken negeri Babilon. Bagenda me IA erbalas erkiteken Rumah Pertoton si enggo ceda.
Nina puanglima-puanglima tentera, “Telapi anak panahndu! 12Sikapkenlah ampang-ampangndu! Angkatlah panji-panji nerang benteng-benteng Babilon. Pegegehi penjagan! Tamaken si erjaga-jaga. Suruh kalak si nggempangi!”
TUHAN enggo ngelakoken rikutken kataNa nandangi kalak Babilon. 13I bas negeri enda melala lau mbelin, melala erta-erta si meherga, tapi paksana enggo seh, tinali kegeluhen itek-tek. #Ket 17:1 14TUHAN si Mada Kuasa enggo ersumpah i bas dirina jine, maka isuruhNa me nterem tentera nerang Babilon desken labang si erkemut dingen ersurak ia kerina perban menang.
Ende-enden Pujin man Dibata
15Alu gegehNa, TUHAN enggo njadiken doni enda,
alu kepentarenNa enggo itepaNa pertibi enda,
janah alu pengertinNa langit ikimbangkenNa.
16I bas perentahNa ergeruhguh lau i datas langit,
ibabaNa embun i bas tampuk doni nari.
Ibabana kilap i bas udan,
isuruhna angin rembus i bas penimpanenna nari.
17Ngidah si e, kepeken kerina manusia motu kepe, la erpemeteh
kalak si mahan gana-gana mela iakapna,
sabap gana-gana si ibahanna la tuhu,
la lit kegeluhen i bas ia.
18Kerina ia sia-sia dingen penipu
nandangi kernep me ia tupung TUHAN reh ngukumsa.
19Tapi Dibata nu Jakup la kap seri rassa,
IA kap si enggo njadiken si nasa lit.
Dingen IA kap si enggo milih Israel jadi bangsaNa jine.
TUHAN si Mada Kuasa, e kapen gelarNa.
Perpalu Dibata
20Nina TUHAN,
“O Babilon, kam ndube pergudamKu, senjatangKu i bas perang.
Kupake kam ngeripukken bangsa-bangsa ras kerajan-kerajan,
21ngeripukken kuda ras si ngersaksa,
ngeripukken gereta kuda ras si mabasa,
22munuhi kerina dilaki ras diberu,
munuhi kerina orangtua ras anak si nguda,
munuhi anak perana, ras si nguda-nguda,
23nggelehi permakan ras rarasenna,
nggelehi kalak si nenggala ras lembu penenggalana,
ngeripukken si erkuasa ras puanglimana.”
Ukumen man Babilon
24Nina TUHAN, “Idahndu me Aku erbalas man Babilon ras man kalak si ringan i je, erkiteken perbahanenna si jahat nandangi Jerusalem. 25O Babilon, kam desken deleng si engkernepken doni enda kap, tapi Aku TUHAN jine jadi imbangNdu. Kutangkap me kam, Kuradasken ku taneh, Kubahan kam jadi abu. 26Asa ndigan pe lanai lit batu i bas runtuhenndu nari si ipake guna majekken. Kam tetap jadi gurun pasir seh rasa lalap. Aku TUHAN kap si enggo melasken kata enda.
27Pajekken panji guna erperang! Embus terompet gelah kerina bangsa-bangsa doni enda megisa! Sikapken bangsa-bangsa lako erperang ras Babilon! Kataken man raja-raja Ararat. Mini ras Askenas gelah iserangna. Angkat sekalak si minpin perang e. Baba kuda desken labang si erkemut. 28Sikapken bangsa-bangsa kerina gelah ia erperang ras Babilon. Suruh kalak ngataken ndahi raja-raja Media, peminpin-peminpinna ras pegawai-pegawaina bage pe tentera si lit i teruh kuasana gelah ia ersikap. 29Enggirgir dingen mundu-undu doni enda erkiteken sura-sura TUHAN mahan Babilon jadi gurun pasir, la lit kalak si nggeluh i je. 30Tentera-tentera Babilon enggo ngadi erperang janah sinik saja ia i bas bentengna. Enggo bene ukurna dingen enggo bali ia ras pernanden. Pintu gerbang kuta enggo runtuh, rumah-rumah enggo iciluk. 31Kenca pertenahen enggo kiam ngatakenca man raja Babilon reh ka kiam pertenahen si deban ngatakenca maka arah apai pe Babilon enggo runtuh. 32Musuh-musuh enggo engkuasai ingan ngepar lau mbelin. Benteng-benteng enggo iciluk. Enggo bene kal ukur tentera Babilon. 33Rempet ia itabah musuh jenari idedehi kalak bagi gandum i bas ingan pengeriken. Aku TUHAN si Mada Kuasa Dibata nu Israel, kap si enggo melasken kata enda.”
34Jerusalem enggo melumat igat-gati raja Babilon
jenari ipanganina.
Ipelumena kuta e desken ngkuseken guci,
desken naga galang si enggo nelen kuta e.
Ibuatna kerina si ngena atena,
si debanna isampetkenna.
35Bagendalah nina kalak Sion,
“Babilon la banci la iukum
erkiteken perbahanenna man banta!”
Bagendalah nina kalak Jerusalem,
“Babilon la banci la iukum
erkiteken kiniseran si ibahanna banta!”
Isampati TUHAN me Israel
36E maka nina TUHAN kempak kalak Jerusalem, “Aku si ngerunggui perkarandu. Aku erbahanca maka musuh-musuhndu ngaloken ukumen bagi kai si enggo ilakokenna man bandu. Kupekerah sumbul lau Babilon, maka kerah lau belinna kerina. 37Negeri e jadi runtuh-runtuhen si ergun-gun man ingan rubia-rubia si meliar nggeluh. Jadi mejin me ingan e. La lit sekalak pe si nggeluh i je, janah asa kalak si ngidah enggirgir ia. 38Kerina kalak Babilon erdengum desken singa, dingen merawa bagi anak singa. 39Sangkar kin kalak enda? Kusikapken me man bana sada pesta dingen Kubahan maka mabuk dingen ersurak-surak ia. Tunduh me ia jenari asa ndigan pe lanai keke. 40Kutamaken ia kupenggelehen desken anak lembu, kambing dingen anak biri-biri. Aku TUHAN kap si enggo melasken ranan enda.”
Nasip Babilon
41Nina TUHAN kerna Babilon, “Negeri si ipuji kerina doni enda enggo italuken! Andiko, mejin kal Babilon iakap bangsa-bangsa doni enda kerina! 42Lawit ergulung i babo Babilon, Babilon enggo itutupi galumbang-galumbang si ergeruhguh. 43Kuta-kutana enggo seh kal mejinna, dingen enggo bali ras gurun pasir si kerah. La lit sekalak pe si nggeluh entah mentas arah e. 44Bel, dewa Babilon la banci la Kuukum. Kubahan maka iutahkenna barang-barang si itangkona. Asa ndigan pe ia lanai isembah bangsa-bangsa doni enda.
Tembok-tembok Babilon enggo runtuh. 45Kalak Israel kiam ije nari! Kelinilah bandu i bas rawangKu si gara nari. 46Ola bene ukurndu, ola mbiar erkiteken berita-berita si ibegindu. Tep-tep tahun mbar erbage-bage berita – berita-berita kalak jahat i negeri enda, dingen berita-berita kerna raja siperangen. 47E maka enggo me seh paksana Aku ngukum gana-gana Babilon. Belang-belang negeri e mela iakapna. Kerina si ringan i je la banci la ibunuh. 48Kerina si lit i bas doni ras datas langit ersurak-surak tupung Babilon ndabuh ku teruh kuasa bangsa si reh i Utara nari lako engkernepkenca. #Ket 18:20 49Babilon si erbahanca mate kerina kalak i belang-belang doni enda. E maka genduari Babilon la banci la mate erkiteken kematen nterem kalak Israel. Aku TUHAN kap si enggo melasken ranan enda.” #Ket 18:24
Kata TUHAN man kalak Israel i Babilon
50Nina TUHAN man bangsana i Babilon, “Kam enggo pulah i bas kematen nari! Genduari laweskenlah! Olanai timai! Aminna pe kam ndauh i bas Aku nari, ingetlah Aku, TUHANndu, ingetlah Jerusalem. 51Nindulah, ‘Enggo juru dingen mela kal iakap kami. Enggo tuhu medungu kal kita erkiteken kalak asing si enggo muat ingan-ingan si badia i bas Rumah Pertoton.’ 52Dage Kukataken maka enggo seh me paksana Aku ngukum gana-gana Babilon. Kalak si luka ndehereng i belang-belang doni enda. 53Aminna Babilon banci nangkih ku langit dingen majekken benteng-benteng si paguh i jah, Kusuruh nge kalak ngerontaskenca. Aku TUHAN kap si enggo melasken kata enda.”
Umputen kerna Babilon ikernepken
54Nina TUHAN,
“Dengkehkenlah sora serko i Babilon,
ceda ate erkiteken negeri e enggo kernep.
55Kukernepken ateKu Babilon,
Kupesip ateKu ia.
Tentera si nerangsa bali ras galumbang si ergeruhguh,
alu sora si gejek.
56Enggo reh ia ngkernepken Babilon
tentera Babilon enggo talu
panahna enggo penggel.
Aku Dibata si ngukum kalak jahat.
Kubalas me man bana bagi patutna.
57Kubahan maka mabuk penguasana,
kalak pentar, peminpin-peminpin ras tenterana.
Tunduh me ia, asa ndigan pe lanai keke.
Aku, Raja kap si ngerana enda,
Aku kap TUHAN si Mada Kuasa.
58Tembok-tembok Babilon si enteguh la banci la radas ras taneh,
janah menara pintu-pintu gerbang si meganjang pe meseng.
Kerina pendahin bangsa-bangsa la kap lit ertina,
kerina kelatihenna kempak api kap perlawesna.
Aku kap TUHAN si Mada Kuasa si ngerana enda.”
Tenah Jeremia ipeseh ku Babilon
59Suruh-suruhen Raja Sedekia e me Seraya anak si Neria kempu si Mahsea. I bas tahun peempatken Sedekia jadi raja Juda, lawes Seraya rassa ku Babilon, dingen kubereken man bana piga-piga perentah. 60Kusuratken i bas sada buku kerina cilaka si nandangi engkenai Babilon, subuk kerna kerina perkara-perkara si deban kerna Babilon. 61Ningku kempak Seraya, “Kenca kam seh i Babilon, alu megang ogekenlah kerina si tersurat i jenda man bangsa e. 62Kenca bage ertotolah kam nindu, ‘O TUHAN, enggo ikatakenNdu maka ikernepkenNdu ateNdu negeri enda, gelah lanai lit i je si nggeluh, subuk manusia bage pe rubia-rubia, dingen jadi taneh si melungen me negeri e seh rasa lalap.’ 63O Seraya, kenca enggo dung iogekenndu surat enda man bangsa e, iketken ku bas sada batu jenari ambekken ku Lau Eprat, 64jenari nindulah, ‘Bagenda me jadina man Babilon, gedap me ia dingen asa ndigan pe lanai keke, erkiteken cilaka si nandangi idabuhken TUHAN ku je.’ ” Sibar enda kedungen ranan si Jeremia. #Ket 18:21
Currently Selected:
JEREMIA 51: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
