JEREMIA 50
50
Babil italuken
1Enda me kata si ibereken Dibata man bangku kerna kuta Babil ras kalak si ringan i je: #Jes 13:1–14:23; 47:1-5
2“Momokenlah berita enda man bangsa-bangsa!
Bereken tandana jenari momokenlah berita enda!
Ola buniken!
Babil enggo ndabuh!
Merodak dewana enggo meripuk!
Berhala-berhala Babil enggo juru!
Gana-gana si mbau e enggo idedehi!
3Sada bangsa i Utara nari enggo reh nerang Babilon. Ijadikenna negeri e jadi gurun pasir. Jelma ras rubia-rubia kiamen. Lanai lit kai pe si nggeluh i je.”
Israel mulih ku negerina
4Nina TUHAN, “Tupung paksa e reh me kalak Israel ras Juda iherna tangis ndarami Aku Dibatana. 5Isungkunina me dalan ku Sion e maka idalanina arah dalan e. Ibahanna me sada perpadanen ras Aku janah ndigan pe lanai ilanggarna.
6BangsangKu bali kap ras biri-biri si ipelepas permakanna bene i datas deleng-deleng. Enggo papak ia i datas deleng-deleng janah lanai ingetca dalan mulih ku kutana. 7Asa kalak si jumpa rassa ngerigepsa. Nina imbang-imbangna: ‘Kalak enda erdosa kempak TUHAN. E maka kai si ibahan kita man bana labo kita salah. Nini-ninina ernalem man TUHAN, e maka ia pe jine arus tetap tek man TUHAN.’
8O kalak Israel kiamlah i Babilon nari! Tadingken negeri e! Jadilah kam si pemenana lawes. #Ket 18:4 9Kuaturken ateKu sada terpuk bangsa-bangsa si megegeh i Utara nari. Kubahan maka iserangna Babilon. Erbaris ia i peperangen ngelawan negeri e, jenari irebutna negeri e. Si mbisana manahken anak panahna alu kebeluhen si lanai tanggung-tanggung la pernah la kena ku sasarenna. 10Babilon jadi rampasen perang dingen kalak si ngerampassa muati kai atena si ibuatna. Aku TUHAN kap si enggo melasken ranan enda.”
Babil ndabuh
11Nina TUHAN, “O kalak Babilon, irampukindu bangsangKu. Meriah dingen senang iakapndu, erdalan desken lembu si ngerik gandum, desken kuda si erngih-ngih. 12Tapi kutandu si mbelin e ihina dingen ijuruken. Babilon me pagi si meterukna i bas kerina bangsa-bangsa. Ia jadi taneh tenggiring dingen gurun pasir si kerah. 13Erkiteken rawangKu si gara, lanai banci lit sekalak pe nggeluh i Babil. Jadi runtuh-runtuhen si ergun-gun me ia. Kerina kalak si mentas arah e sengget dingen mamang atena.
14Kalak pemanah, erbarislah guna erperang ngelawan Babil dingen kepunglah. Pulahi anak panahndu kempak Babil, sabap enggo erdosa ia kempak Aku, TUHAN. 15Surakkenlah surak-surak perang sekelewet kuta. Genduari enggo terkepung Babil. Benteng-bentengna enggo pecah dingen runtuh. Erbalas Aku man kalak Babilon. E maka erbalaslah kam kempaksa. Bahanlah man bana bagi si ibahanna man kalak si deban. 16Ola pelepas kalak nuan i bas negeri e. Ola pediat kalak rani. Kerina kalak pertandang si lit i je mbiar i perang tentera, e maka mulih ia kerina ku kutana.”
Israel mulih ku kutana
17Nina TUHAN, “Kalak Israel bali kap ras biri-biri si iayak-ayak dingen ihuntakken singa. Si pemena raja Assur nerangsa, dungna Nebukadnesar raja Babil ngkilkili tulan-tulanna. 18Erkiteken si e, Aku TUHAN si Mada Kuasa Dibata nu Israel la banci la ngukum Nebukadnesar ras negerina bali ras pengukumenKu man raja Assur. 19Kupemulih me bangsangKu ku negerina jine. Ipanna me pangan si turah i Deleng Karmel dingen i daerah Basan. Besur me ia erkiteken rate-ate man buah gandum si turah i daerah Eperaim ras Gileat. 20Adi enggo seh paksa si e, lanai lit ijumpai dosa i Israel, lanai lit kejahaten i Juda, sabap Kualemi me kalak si Kupelepas denga nggeluh. Aku TUHAN kap si enggo melasken kata enda.”
Ukumen Dibata man Babil
21Nina TUHAN, “Peranglah kalak Marataim ras Pekod. Bunuh dingen kernepkenlah ia. Lakokenlah tep-tep kai si Kuperentahken man bandu. Aku TUHAN kap si enggo melasken kata enda. 22I bas negeri e terbegi me gejek sora perang janah jadi me kecedan mekelek i je. 23Mbarenda enggo getem kal doni enda ipalu Babilon. Genduari palu-palu e ka enggo ka meripuk. Kerina bangsa-bangsa sengget kerna kai si enggo jadi kempak negeri e. 24O, Babilon ilawanndu Aku, janah kam enggo kena siding si Kutogeng man bandu, alu la ietehndu. 25Ingan penimpanen senjatangKu enggo Kutalangi. Alu rawangKu si gara enggo Kupedarat senjata e kerina, sabap Aku TUHAN si Mada Kuasa si Erdolat lit si man dahinKu i Babilon. 26Perangilah ijapa nari pe, pecahken lumbung-lumbungna gelah talang! Pegun-gunlah barang rampasen e bagi pinugun page! Kernepken negeri e! Olanai sitik pe tadingken ia! 27Bunuhi kerina tenterana! Gelehi kerina! Bagenda me jadina man kalak Babilon! Enggo seh paksa pengukumen bana!
(28Pengongsi-pengongsi si pulah i Babilon nari dingen seh i Jerusalem, nuriken uga TUHAN Dibatana erbalas man bangsa Babilon kerna pernembehna nandangi Rumah Pertoton TUHAN.)
29Kataken maka iperang kalak pemanah e Babil. Suruh kerina ndarat asa si beluh make panah ras anak panah. Kepung kuta e, ola bere sekalak pe pulah. Ulihken man bana kerina si enggo ilakokenna. Bahan man bana bagi perbahanenna man kalak. Sabap si ilakokenna e, e me perbahanen si megombang ngelawan Aku, si Badia nu Israel. #Ket 18:6 30E maka bunuhilah kerina anak peranana i bas gedang-gedang dalan kuta e. Kerina tenterana la banci la ikernepken i bas paksa e. Aku TUHAN kap si enggo melasken kata enda.
31O kalak Babilon si megombang. Aku TUHAN si Mada Kuasa si Erdolat, Aku kap imbangndu! Enggo seh paksana Aku ngukum kam. 32Kam bangsa si megombang la banci la terantuk dingen guling janah la lit kalak si nampati kam keke. Kuciluk ateKu kuta-kutandu. Kukernepken ateKu si lit i sekelewetna.”
33Nina TUHAN si Mada Kuasa, “Radu ras kalak Israel, Juda enggo itindih. Kerina kalak si enggo naluken dingen naban ia la ipelepasna lawes. 34Tapi kalak si mulahi ia megegeh kap – TUHAN si Mada Kuasa kap gelarNa. IA jine kap si ngerunggui perkara bangsaNa. Iberekenna dame ku doni enda, tapi man Babilon iberekenna kiniseran.”
35Nina TUHAN,
“Reh me pedang nampul Babilon!
Nampuli kalak si ringan i je.
Nampul pengulu-pengulu ras kalak si pentar.
36Pedang reh nggeleh nabi-nabi perguak.
Andiko bodoh kal kepe ia!
Pedang reh nebak tenterana.
Andiko enggirgir kal kap ia!
37Kernepkenlah kerina kuda ras geretana!
Pedang reh nampul tentera upahenna.
Andiko kote kal ia kerina!
Kernepkenlah kebayakenna;
rampuki ras rampasilah!
38Bahan maka sekali-sekali reh kelegon i negeri e,
kerahi lau belinna.
Babilon e me negeri si dem alu gana-gana si mejin
e me si nebu-nebu kalak si ringan i je.
39E maka rubia-rubia si meliar, serigala ras perik unta nari ngenca pagi ringan i Babil. Ndigan pe lanai lit i je kalak si tading, asa ndigan pe lanai. #Ket 18:2 40Jadi me man Babil bali ras Sodom ras Gomora bali ras tupung ia ku kernepken ras kuta si lit i sekelewetna. Asa ndigan pe i je lanai lit si nggeluh. Aku TUHAN kap si enggo melasken ranan enda. #Kej 19:24-25
41Nehenlah! Ena sangana reh bangsa i Utara nari,
bangsa si ndauh-ndauh nari si lanai tanggung gegehna,
nterem raja si enggo ersikap lako erperang.
42Panah ras pedangna enggo ibuatna,
kejam dingen la lit i bas ia perkuah ate.
Sorana bali ras lawit si ergeruhguh,
tupung iersakna kudana.
Enggo sikap ia erperang ngelawan Babilon.
43Raja Babilon enggo megi beritana,
e maka enggo kote tanna.
Sedak iakapna perban aru atena
mesui iakapna desken pernanden si sangana mupus.
44Bali ras singa ndarat i kerangen tua gedang-gedang Lau Jordan nari nangkeng ku mbalmbal si meratah, bage me Aku TUHAN reh dingen mahan maka rempet kalak Babilon kiam nadingken negerina. Kenca bage raja si Kupilih me si jadi raja i tengah-tengah bangsa e. Ras ise kin Aku terpeseri? Ise pang ngelawan Aku? Pemerentah si apai kin si pang rubat ras Aku? 45E maka dengkehkenlah kai si enggo Kurencanaken nandangi kuta Babil, dingen kai ateKu si Kulakoken man kalak si ringan i je. Anak-anakna pe la banci la isaren janah kerina kalak gentar. 46Tupung Babil guling, lit sora si megang seh maka kerina doni enda mundu-undu. Sora tangis mesera terbegi ku bangsa-bangsa si deban.”
Currently Selected:
JEREMIA 50: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
