JEREMIA 46
46
Mesir italuken i Karkemis
1Enda me kata TUHAN man bangku kerna bangsa-bangsa, 2si pemena e me kerna Mesir. Enda me kata TUHAN kerna tentera Neko, raja Mesir, si italuken Nebukadnesar raja Babilon i Karkemis deher Lau Eprat i bas peempat tahunken Joyakim anak Josia jadi raja Juda: #Jes 19:1-25; Esek 29:1–32:32
3“Nina puanglima-puanglima Mesir,
‘Sikapken ampang-ampangndu,
ota kita ku peperangen!
4Pasanglah kudandu, ersaklah.
Erbarislah, pakelah topi wajandu.
Garut lembingndu
Pake baju besindu!’ ”
5Nungkun TUHAN nina, “Kai si ibahanndu?
Alu nggirgir mulihken ia.
Tentera surut kerina
si mbisana gentar, ngerbul kerina asa gegehna
lanai itulihkenna pe ku pudi.
6Si kiam e lanai ngasup kiam,
tenterana lanai banci pulah.
I Utara, i tepi Lau Eprat,
tertuktuk dingen guling kap ia.
7Ise kin ah si keke desken Lau Nil,
desken lau belin si enggo mulsak launa?
8Kalak Mesir kap ah, si keke bali ras Lau Nil
bagi lau belin si enggo mulsak launa.
Nina Mesir, ‘Keke aku nutupi doni enda.
Kulemba kerina kuta ras kalak si nggeluh i je.
9Suruh maka lawes kerina kuda
suruhlah maka erdalan gereta perangna.
Suruhlah kerina serdadu
kalak Sudan, kalak Libia maba ampang-ampang
bage pe kalak si beluh manah i Lidia nari.’ ”
10Enda wari TUHAN si Mada Kuasa si Erdolat.
Erbalas ateNa sendah,
sendah iukumna ateNa imbang-imbangNa.
PedangNa mangani seh besur,
ngincep dareh seh puas.
Sendah TUHAN erbahan persembahen gelehen,
i Utara i tepi Lau Eprat.
11O kalak Mesir laweslah ku Gileat
darami i jah tambar!
Sia-sia nge kerina tambarndu!
Sada pe la ngasup mereken kejuah-juahen man bandu.
12Enggo tereteh man bangsa-bangsa maka mela kal iakapndu.
Kerina kalak enggo megi perserkondu.
Tep-tep tentera terantuk kempak tentera si deban,
dingen duana ia guling ku taneh.
Kerehen Nebukadnesar
13Tupung Nebukadnesar raja Babilon reh nerang Mesir seh kata TUHAN man bangku nina, #Jer 43:10-13
14“Momokenlah i bas kuta-kuta Mesir,
i Migdol, Mempis, Tahpanhes:
‘Ersikaplah, pertahankenlah,
kerina kelewetndu enggo ilemba perang!
15Engkai maka guling Apis dibatandu si medolat?
Perban igudam TUHAN!’
16Kerina tenterandu tertuktuk e maka guling.
Sekalak ngerana man si debanna nina:
‘Pedasken! Ota kita mulih ku bangsanta,
maka ola kita ipan pedang imbangta!’
17Bahanlah gelar si mbaru man raja Mesir,
‘Si meganjang ngerana si bene kesempatenna.’
18Aku TUHAN si Mada Kuasa, Aku kap Raja.
Aku kap Dibata si nggeluh, ningKu:
Bagi Deleng Tabor ganjangen asangken deleng si deban,
bagi Deleng Karmel tedis i babo lawit,
bage me gegehna kalak si reh ngelawan kam.
19O kalak Mesir ersikaplah kam guna iangkut tertaban!
Mempis jadi me bagi gurun pasir,
jadi radas me, lanai sekalak pe si nginganisa.
20Mesir bali kap ras lembu nguda si mbur,
iserang sada untung-untung i Utara nari.
21Tentera-tentera si iupahina pe
bali ras anak lembu mbur si la ergegeh.
Lanai terbanca tedis, lanai terbanca erperang,
kerina ia mulih jenari ngerbul.
Enggo seh wari cilaka man bana
e me paksa kebenenna.
22Perkiam kalak Mesir, erdeso bagi sora nipe
tupung reh deherna tentera musuhna.
Imbangna reh maba kapak
bali ras kalak si nabah batang kayu
23si ngeradasken kerangen tua.
Teremna la terbeligai
tenterana teremen asangken labang.
24Juru kal iakap bangsa Mesir
ia italuken bangsa si reh i Utara nari,
Aku TUHAN kap si enggo melasken kata enda.”
25Nina TUHAN si Mada Kuasa, Dibata nu Israel, “Kuukum me Amon, gana-gana Tebes, rikut ras Mesir, dibata-dibatana, ras raja-rajana. Kulegi me raja Mesir ras kerina kalak si ernalem man bana, 26jenari ngendeskenca kempak kalak si ersura-sura munuh ia, e me Nebukadnesar raja Babilon ras tenterana. Kenca si e lit kang kalak si tading i Mesir bagi si enggona. Aku TUHAN kap si enggo melasken kata enda.”
TUHAN mulahi bangsaNa
27“O bangsangKu, ola kam mbiar,
o Israel ola kam gentar.
I bas negeri si ndauh e: Kupulahi me kam,
i bas negeri inganndu tertaban nari.
Mulih me kam ku negerindu dingen alu dame nggeluh kam i je.
Kam aman dingen la lit si erbanca kam mbiar. #Jer 30:10-11
28Reh me Aku ngkelini kam.
Kukernepken me bangsa-bangsa,
inganndu genduari kuerapken
tapi kam, la kukernepken.
Labo kam la Kuukum, tapi Kuukum kam,
bujur kap pengukumKu.
Aku TUHAN kap si enggo melasken kata enda.”
Currently Selected:
JEREMIA 46: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
