JEREMIA 12
12
Jeremia ersoal ras TUHAN
1O TUHAN, adi ersoal ateku ras Kam kerna perkarangku,
Kam nge tentu si benar.
Amin bage pe ateku nungkun kerna keadilen man baNdu.
Engkai maka bayak kalak jahat?
Engkai maka sangap kalak si la bujur?
2IpeturahNdu e maka rurat ia,
turah janah erbuah ka.
Tuhu mehuli nge cakapna kerna Kam,
tapi si tuhuna labo Kam diatena.
3O TUHAN itandaiNdu kap aku,
idahNdu kap perbahanenku,
uga kelengna ateku Kam.
Tegulah kalak jahat, desken biri-biri si itegu ku penggelehen.
Jagailah ia, ngayak seh paksa penggelehen.
4Asa kai nari dekahna kerah negeri kami?
Asa kai nari dekahna melus dukut-dukut i juma?
Rubia-rubia ras perik-perik mate me,
erkiteken bangsa kami jahat perbahanenna.
Nina, “Labo idah Dibata perbahanenta.”
5Nina TUHAN,
“O Jeremia adi ras jelma pe talu kam erlumba,
uga banci kam ngasup erlumba ras kuda?
Adi i tengah mbalmbal si teneng pe la kam ngasup tedis,
kai banci ibahanNdu i kerangen Baluren Lau Jordan?
6Sabap senina-seninandu, sima-simandu jine enggo enghianati kam.
Ipersadana arihna lako ngelawan kam.
Ola kam tek man bana,
aminna mehuli pe rananna bandu.”
Ceda ate TUHAN erkiteken bangsaNa
7Nina TUHAN,
“Enggo Kutadingken Israel,
enggo Kutulak bangsa pilihenKu,
bangsa si Kukelengi enggo Kuendesken
gelah ikuasai imbang-imbangna.
8Bangsa pilihenKu enggo nundalken Aku,
desken singa i tengah kerangen,
erdengum sorana kempak Aku,
e maka nembeh ateKu ia.
9Bangsa pilihenKu desken perik kap,
arah apai nari pe reh kuliki nangkisi ia.
Dilo min kerina rubia-rubia si meliar,
maka ia reh manganisa kerina.
10Nterem peminpin bangsa si deban
enggo encedaken peken anggurKu.
JumangKu iperjakina,
tanehKu si mejile enggo jadi gurun pasir ibahanna.
11Negeri e ibahanna jadi taneh si mesawang,
enggo terulang i adep-adepenKu.
Kerina negeri enggo jadi gurun pasir,
ise pe la lit si mperdiatekenca.
12Enggo reh kalak si ngerampukisa,
deleng-deleng gurun pasir ibentasina.
Enggo Kusuruh perang ngkernepken kerina negeri e
sekalak pe i je la banci dame geluhna.
13BangsangKu enggo nuan gandum tapi rih nge si ipepulungna.
Erdahin erbintuas ia, tapi la kap lit ulihna.
Erkiteken rawangKu si gara,
e maka la lit ulih jumana.”
Padan TUHAN man negeri-negeri sekelewet Israel
14Nina TUHAN, “Lit ateKu si man cakapenken kerna negeri-negeri sekelewet Israel si enggo encedaken negeri si nai Kubereken man bangsangKu Israel. Kubuat kerina bangsa si jahat e i tengah-tengah negerina nari desken ngeruah sinuan-sinuan, jenari Kupulahi Juda i bas ia nari. 15Tapi kenca ia enggo Kuruah, Kucidahken me perkuah ateKu man bana. Kuulihken kerina bangsa-bangsa e ku bas taneh pusaka, ku bas negerina jine. 16Kune alu bulat ukurna ialokenna agama bangsangKu, dingen ersumpah ia nina asa TUHAN nggeluh, bagi pengajarina nai bangsangKu ersumpah i bas gelar Baal, e maka bangsa-bangsa e ikut jadi bangsangKu, dingen terberita. 17Tapi adi la ia erkemalangen kempak Aku, e maka Kuruah ia seh keri, maka kernep. Aku kap TUHAN si enggo melasken kata enda.”
Currently Selected:
JEREMIA 12: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
