JEREMIA 11
11
Jeremia ras perpadanen
1Kata Dibata seh bangku nina, 2“Dengkehkenlah kai si nikataken i bas perpadanen enda. Kataken man kalak Juda ras Jerusalem 3maka Aku, TUHAN Dibata nu Israel enggo numpahi kerina kalak si la ngikutken kata perpadanen enda. 4Perpadanen e kap si Kubahan ras nini-ninina tupung ia Kubaba i Mesir nari, ingan si bali iakapna lasna ras i bas ginuhur si gara. Kukataken man bana maka ikutkennalah Aku, dingen ilakokennalah kerina si Kuperentahken man bana. Kukataken man bana, kune ikutkenna Aku, maka ia jadi bangsangKu janah Aku jadi Dibatana. 5E maka Kutepati padanKu si Kubahan man nini-ninina maka Kubereken me man bana negeri si sampur dadih ras tengguli si ianina genduari.”
Ningku ngaloi, “Payo TUHAN.”
6Kenca bage nina TUHAN man bangku, “To ku kuta-kuta Juda ras ku dalan-dalan Jerusalem. Momoken katangKu enda i jah, suruh bangsa e gelah idengkehkenna dingen ngataken kai si ikataken i bas perpadanen e. 7Tupung Kubaba nini-ninina ndarat i Mesir nari, Kupersingeti kal man bana gelah ia erkemalangen man bangKu, janah seh ngayak genduari pe tetap denga ia Kupersingeti. 8Tapi la idengkehkenna, la iikutkenna Aku. Tapi tetap mekeng pusuhna janah lalap jahat perbahanenna. Enggo Kuperentahken maka icikepna perpadanen enda, tapi itulakna. E maka Kudabuhken man bana ukumen bagi si tersena i bas perpadanen e.”
9Kenca bage nina TUHAN man bangku, “Kalak Juda ras Jerusalem enggo erpekat ngelawan Aku. 10Mulihken ka ia ndabuh kubas dosa-dosa nini-ninina nai si la nggit ngikutken kai si Kukataken bana. Enggo isembahna dibata-dibata si deban, subuk Israel bage pe Juda enggo icedakenna kal perpadanen si Kubahan ras nini-ninina. 11E maka Aku, TUHAN, Kupersingeti ia maka Kudabuhken me man bana cilaka janah la ia banci pulah. Aminna pe ia serko mindo penampat man bangKu, la Kubegiken. 12E maka lawes me kalak Juda ras Jerusalem ku gana-gana inganna mpersembahken persembahen dingen serko ia man gana-gana e mindo penampat. Tapi tupung reh cilaka e, gana-gana ndai la ngasup nampati ia. 13Enggo bali buena gana-gana kalak Juda ras kuta-kutana dingen kalak Jerusalem enggo majekken batar-batar persembahen bali buena ras dalan i bas kuta e guna mereken persembahen man Baal si nggesuh e. 14O Jeremia, ola kam ertoto dingen mindo man bangKu guna bangsa e. Tupung ia i bas kiniseran aminna pe erlebuh man bangKu mindo penampat la ia Kubegiken.”
15Nina TUHAN, “Bangsa si Kukelengi enggo erbahan jahat. Lit denga kin hakna bengket ku bas Rumah PertotonKu? Iakapna kin arah padan-padan ras arah mpersembahken daging asuh-asuhen ia banci pulah i bas cilaka nari? E kin si erbahanca meriah iakapna? 16Nai pernah Kugelari ia batang Saitun si Merabun, meramis buahna, tapi genduari alu sora si erlenggur, Kuciluk bulungna dingen Kupenggelken ranggas-ranggasna.
17Aku TUHAN si Mada Kuasa sinuanken Israel ras Juda. Tapi genduari Kuancam ia alu cilaka. Cilaka e ndabuh man bana erkiteken enggo lepak perbahanenna. Ilegina rawangKu alu nutung persembahen man Baal.”
Rencana munuh Jeremia
18Ipebetehken TUHAN man bangku sura-sura imbangku ngelawan Aku. 19Aku bali ras anak biri-biri si melemuk itegu ku penggelehen, dingen la kueteh maka imbang-imbangku enggo erpekat erbahan si jahat man bangku. Nina, “Iah si tabah batang kayu enda tupung ia meratah denga. Iah si bunuh ia gelah ise pe lanai lit si ngingetsa.”
20E maka ertoto aku ningku, “O TUHAN si Mada Kuasa, Kam kap hakim si bujur. IujiNdu kap perukuren ras pusuh peraten manusia. Man baNdu kuendesken perkarangku, kutimai pembalasenNdu nandangi bangsa enda.”
21Kalak Anatot ersura-sura munuh aku, dingen ikatakenna maka ibuatna kesahku adi tetap kuberitaken kata TUHAN. 22E maka nina TUHAN si Erdolat, “Kuukum me ia! Anak peranana mate i bas perang. Anak-anakna mate erkiteken lumben. 23Enggo kutetapken sada paksa man kalak Anatot guna idabuhi cilaka. E maka adi enggo seh paksa e, ise pe ia la banci tetap nggeluh.”
Currently Selected:
JEREMIA 11: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
