HAKIM-HAKIM 5
5
Ende-enden Debora ras Barak
1I bas wari e iendesken Debora ras Barak ende-enden:
2Pujilah TUHAN!
Itetapken bangsa Israel ukurna erperang
alu ukur meriah.
3Begikenlah o raja-raja!
Begikenlah o kam pemerentah!
Rende ateku, rende man TUHAN,
Dibata bangsa Israel.
4 TUHAN, sanga itadingkenNdu Deleng Seir,
sanga Kam ndarat nadingken negeri Edom
mugur-ugur doni enda janah udan ndabuh i langit nari.
Payo, lau mambur i embun nari.
5Mundu-undu deleng i lebe-lebe TUHAN Deleng Sinai,
mundu-undu deleng i lebe-lebe TUHAN Dibata Israel. #Kel 19:18
6I bas paksa Samgar anak Anat,
i bas paksa Jael
lanai lit arak-araken perbinaga mentasi negeri e,
janah kalak gawah-gawah erdalan arah dalan si deban.
7Kuta-kuta Israel tempa-tempa terulang, O Debora;
enggo mesuni seh kam reh,
reh desken sekalak nande man bangsa Israel.
8Kenca bage lit perang i negeri e
sanga bangsa Israel milih dibata-dibata si mbaru,
empat puluh ribu kalak dilaki i bas bangsa Israel,
lit kin si ngangkat ampang-ampang, ntah lembing?
9Megah kal ukurku ngidah puanglima-puanglima Israel,
bage pe rayat si ermeriah ukur ngendesken bana.
Pujilah TUHAN!
10Turikenlah e o, kam si ngersak kelede mbentar,
kam si kundul i babo pelana,
ras kam si terpaksa erdalan nahe ku japa pe kam lawes.
11Begikenlah! Jelma si nterem ersurak i kelewet sumur.
Nuriken kemenangen TUHAN,
kemenangen bangsa Israel!
Kenca bage bangsa TUHAN ngincuah i kutana nari.
12Pinpinlah, Debora, pinpinlah terus!
Pinpinlah terus! Rendelah! Pinpinlah terus!
Ku lebe kam, o Barak anak Abinoam!
Babai tabanenndu erdalan!
13Kenca bage nusur kalak si setia ndahi peminpinna;
bangsa TUHAN reh man baNa, sikap guna erperang.
14Reh ia i Eperaim nari ku baluren e,
arah pudi suku Benyamin ras rayatna.
Puanglima-puanglima nusur i Makir nari,
perwirana nusur i Sebulon nari.
15Peminpin Isakar reh ras Debora;
tuhu, Isakar reh ras Barak pe,
janah ikutkenna Barak ku baluren e.
Tapi suku Ruben erbelah-belah;
la terputuskenca ikut tah lang.
16Engkai maka ia tading deherken karang asuh-asuhen?
Megiken suling pendilo rarasen?
Tuhu, suku Ruben erbelah-belah;
la terputuskenca ikut tah lang.
17Suku Gat tading i Timur Lau Jordan,
janah suku Dan tetap tading deherken kapal.
Suku Aser tading i tepi lawit;
kalak enda la nggit miser i tepi lawit nari.
18Tapi bangsa Sebulon ras Naptali,
pang ngasamken kesahna i bas perang.
19Taanak, deherken lau i Megido,
reh raja-raja janah erperang;
raja-raja Kanaan e erperang,
tapi pirak la lit irampasna.
20Bintang-bintang pe ikut erperang.
I bas perdalanenna i langit nari,
erperang ia ngelawan Sisera.
21Lau Kison ergalun ngombakken musuh,
Lau Kison deras permalerna.
Aku maju, maju terus, alu megegeh!
22Kenca bage reh kuda ngeratuh
sora tapak-tapakna kuritap i babo taneh.
23“Sumpahilah kuta Meros,” nina malekat TUHAN.
“Kena sumpah, kena sumpah kerina si tading i je.
La ia reh nampati TUHAN,
la ia reh bagi tentera si erperang guna TUHAN.”
24Sangap me Jael
ndehara Heber bangsa Keni e
diberu si sangapna i bas kerina diberu si ringan i bas kemah.
25Ipindo Sisera man Jael lau, tapi iberekenna susu.
Tare mangkuk si mejile, idudurkenna susu si mehulina.
26Ibuatna pantuk-pantuk kemah alu tanna si kawes,
janah sada martel tukang alu tanna si kemuhen
ipaluna Sisera, ipecahkenna takalna;
itajakna takalna seh pultak.
27Erjimpuh Sisera,
guling ampar i deher nahe Jael.
I deher nahe Jael erjimpuh Sisera jenari guling;
guling ia ku taneh, mate.
28Ipernehen nande Sisera arah jendela,
itungkirna arah jarikjak jendela.
“Engkai maka bage lawenna gereta reh?” nina nungkun.
“Engkai maka bage meletna kudana mulih?”
29Ngaloi diberu-diberu si pentarna,
janah iulih-ulihina ngerana man dirina jine,
30“Ndatken barang perang nge kalak ndai, janah mbagi-bagikenca,
sada ntah dua diberu man tiap sekalak tentera,
uis si mejile man Sisera
piga-piga potong kain sulam man kerahung kemberahen.”
31Mbera kerina musuhNdu bage permatena O, TUHAN,
tapi teman-temanNdu ersinalsal bagi matawari si sangana nangkih!
E maka dame negeri e empat puluh tahun dekahna.
Currently Selected:
HAKIM-HAKIM 5: BTX
Highlight
Share
Compare
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.