HAKIM-HAKIM 4
4
Debora ras Barak
1Kenca mate Ehud, bangsa Israel erdosa ka man TUHAN. 2E maka ibereken TUHAN maka Jabin ngkuasai Israel, sekalak raja kalak Kanaan si erkuasa i kuta Hasor. Puanglima perangna Sisera gelarna. Sisera tading i kuta Haroset-Hagoyim. 3Jabin lit siwah ratus gereta besina. Iperentahna bangsa Israel alu kejam, janah mesui kal ate bangsa e ibahanna lit dua puluh tahun dekahna. E maka erlebuh bangsa Israel mindo penampat man TUHAN.
4Debora, ndehara Lapidot sekalak nabi. Ia hakim si ngerunggui bangsa Israel i bas paksa e. 5Biasana kundul-kundul ia i teruh batang kurma, kelang-kelang Ramah ras Betel i deleng-deleng Eperaim. Ku je me ia idahi bangsa Israel mindo keputusen-keputusenna. 6I bas sada wari isuruhna reh si Barak anak Abinoam i kuta Kedes i Naptali nari, janah nina, “TUHAN Dibata Israel mereken man bandu perentah enda, ‘Buatlah sepuluh ribu kalak i bas suku Naptali ras Sebulon nari jenari babai ia ku Deleng Tabor. 7Aku mabasa Sisera, puanglima tentera Jabin, ngelawan kam i Lau Kison. Ibabana gereta besina ras tenterana, tapi Kubereken man bandu kemenangen ngelawan ia.’ ”
8Nina Barak ngaloisa, “Aku lawes adi kam pe ikut ras aku, tapi adi la kam ikut, aku pe la nggit lawes.”
9Nina Debora njabapsa, “Bage-bage! Ikut aku lawes ras kam. Tapi la kam ndat kehamaten i bas kemenangen e, erkiteken TUHAN ngendesken Sisera ku bas tan sekalak diberu.” E maka berkat Debora ras Barak ku Kedes. 10Idilo Barak suku Sebulon ras Naptali ku Kedes, janah sepuluh ribu kalak dilaki ngikutkenca. Debora ikut ras ia.
11I bas paksa si e, Heber bangsa Keni e enggo sirang ras bangsana e me kap kesusuren Hobab, silih Musa. Ipajekkenna kemahna deherken Kedes, rembak ras batang kecing Sananim.
12Kenca ieteh Sisera maka Barak enggo nangkeng ku Deleng Tabor, 13ipepulungna gereta perangna si siwah ratus e ras kerina tenterana, e maka isuruhna lawes i Haroset-Hagoyim nari ku Lau Kison.
14Kenca bage nina Debora man Barak, “To! TUHAN mabai kam! I bas wari enda iberekenNa man bandu kemenangen ngelawan Sisera.” Kenca bage ngincuah Barak ras sepuluh ribu kalak anak buahna i Deleng Tabor nari. 15Sanga Barak ras tenterana lawes ngelawan, ihuntakken TUHAN Sisera rikut ras gereta perang besina ras tenterana kerina. Nusur Sisera i das gereta perangna nari jenari kiam ia. 16Ielis Barak gereta perang ras tentera e seh i Haroset-Hagoyim, e maka ibunuhna kerina tentera Sisera. Sekalak pe la lit tading.
17Kiam Sisera ku kemah Jael, ndehara Heber bangsa Keni e, erkiteken Raja Jabin i Hasor nari e erteman ras keluarga Heber. 18Ialo-alo Jail Sisera ndarat janah nina man Sisera, “Mari tuan, mari ku kemahku. Ola mbiar.” E maka bengket Sisera, ibuniken Jael ia i balik kire-kire. 19Nina Sisera man diberu e, “Enta sitik lau, muas kal aku.” Italangi diberu e kantong kulit ingan susu, ibere minemna Sisera, e maka ibunikenna ka ia mulihi. 20Kenca bage ikatakenna man diberu e nina, “Tedis kam i lebe pintun kemah, janah adi lit kalak reh nungkun kam ntah lit sekalak i jenda, ‘la lit’, nindu.”
21Erkiteken latih kal akap Sisera, minter entabeh pertunduhna. E maka ibuat Jael martel ras pantuk-pantuk kemah, ideherina Sisera manjar-anjar, kenca bage ibunuhna alu mekpek pantuk-pantuk ndai alu martel arah pipi Sisera pultak ku taneh. 22Sanga Barak reh ndarami Sisera, ndarat Jael ngalo-ngalo janah nina man Barak, “Mari ku jenda! Enda kutuduhken man bandu jelma si idaramindu.” E maka bengket Barak ras Jael. Iidahna Sisera ampar i babo taneh, enggo mate. Pultak takalna ibahan pantuk-pantuk kemah e.
23I bas wari e ibereken Dibata kemenangen man bangsa Israel ngelawan Jabin, raja bangsa Kanaan e. 24Reh dekahna reh tambahna gegeh kalak Israel naluken Jabin, raja kalak Kanan, seh maka kernep ibahanna.
Currently Selected:
HAKIM-HAKIM 4: BTX
Highlight
Share
Compare
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.